Pepe ប្រកាស​ចូល​និវត្តន៍​ពី​អាជីព​បាល់ទាត់

ខ្សែការពារ​ជើង​ចាស់ Pepe បាន​ប្រកាស​ចូលនិវត្តន៍​ពី​អាជីព​បាល់ទាត់​ហើយ​កាល​ពី​ម្សិលមិញ។ កីឡាករ​វ័យ 41 ឆ្នាំ​រូបនេះ​បាន​បង្ហាញ​ខ្លួន 34 ប្រកួត​ឲ្យ​ក្លឹប Porto អំឡុង​យុទ្ធនាការ​រដូវកាល​មុន 2023-2024 ប៉ុន្តែ​គាត់​មិន​បាន​ចុះ​ហត្ថលេខា​ដើម្បី​បន្ត​កុងត្រា​ថ្មី​ជាមួយ​ក្លឹប​យក្ស​ព័រទុយហ្គាល់​មួយ​នេះ​ទេ។

ដោយ​ឡែក Pepe ក៏​ជា​កីឡាករ​ដ៏​សំខាន់​សម្រាប់​ក្រុម​ជម្រើស​ជាតិ​ព័រទុយហ្គាល់​នៅ​ក្នុង​ព្រឹត្តិការណ៍ Euro 2024 ផង​ដែរ ដោយ​ក្នុង​អំឡុង​ពេល​នោះ គាត់​បាន​បង្ហាញ​ខ្លួន​ចំនួន 4 ប្រកួត និង​ជួយ​ឲ្យ​ក្រុម​ជម្រើស​ជាតិ​របស់​ខ្លួន​ឡើង​ទៅ​ដល់​វគ្គ 8 ក្រុម​ចុង​ក្រោយ តែ​ក៏​បាន​ធ្លាក់​ក្រោម​ស្នាដៃ​របស់​បារាំង។

ខ្សែការពារ​កណ្តាល​រូប​នេះ បាន​ក្លាយ​ជា​កីឡាករ​ដែល​មាន​វ័យ​ចំណាស់​ជាង​គេ​បំផុត​នៅ Euro 2024 និង​ជា​កីឡាករ​ដែល​អាយុ​ច្រើន​ជាង​គេ​ពេល​ដែល​គាត់​បង្ហាញ​ខ្លួន​នៅ​ក្នុង​ការ​ប្រកួត UEFA Champions League សម្រាប់​ក្លឹប Porto កាល​ពី​រដូវកាល​មុន​ផង​ដែរ។

គួរ​រំលឹក​ផ​ង​ដែរ​ថា Pepe បាន​ទទួល​កេរ្តិ៍​ឈ្មោះ និង​លេច​ធ្លោរ​ខ្លាំង ក្នុង​អំឡុង​ពេល​ដែល​គាត់​លេង​ឲ្យ​ក្លឹប Real Madrid។ ក្នុង​ពេល​ប្រកប​អាជីព​នៅ​ទឹកដី​អេស្ប៉ាញ​ជាមួយ Real Madrid គាត់​បាន​ឈ្នះ​ពាន UCL ចំនួន 3 និង​ពាន La Liga ចំនួន 3 ដូចគ្នា ហើយ​មាន​ឱកាស​ចូល​លេង​សរុប​រហូត​ដល់ 334 ប្រកួត ដោយ​ស៊ុត​បញ្ចូលទី​បាន 15 គ្រាប់ និង​បញ្ជូន​បាល់​ឲ្យ​មិត្ត​រួម​ក្រុម​បាន​ចំនួន 20 ដង។

ប្រភព: Sportsmole