ខ្សែការពារ​ហូឡង់ Matthijs de Ligt កំពុង​ប្រឈម​មុខ​នឹង​ការ​ជាប់​ពន្ធនាគារ ដោយសារ…

កីឡាករ​ឆ្នើម Matthijs de Ligt ដែល​ជា​ខ្សែការពារ​កណ្តាល​សម្រាប់​ក្លឹប Bayern Munich និង​ក្រុម​ជម្រើស​ជាតិ​ហូឡង់ កំពុង​​ប្រឈម​មុខ​នឹង​ការ​ជាប់​ពន្ធនាគារ​សម្រាប់​ទោស​កំហុស​មួយ​ដោយ​គាត់​បាន​រត់​គេច​ចេញ​ពី​កន្លែង​កើត​ហេតុ​នៃ​គ្រោះ​ថ្នាក់​ចរាចរណ៍​ដែល​ខ្លួន​បាន​បង្ក​ឡើង (នេះ​បើ​យោងតាម​របាយការណ៍​ពី Bild)។

យោងតាម​ប្រភព​ដដែល​បាន​រាយការណ៍​​បន្ថែម​ថា ពេល​ចត​ឡាន​នៅ​តំបន់​ក្បែរ​​ការិយាល័យ​របស់​ក្លឹប Bayern Munich ខ្សែការពារ Matthijs de Ligt បាន​បើកបរ​ជ្រុល​ទៅ​បុក​ធ្វើ​ឲ្យ​ខូចខាត​​រថយន្ត​មួយ​គ្រឿង​ផ្សេង​ទៀត។ ក្រោយ​កើតហេតុ​សមត្ថកិច្ច​បាន​ហៅ​រថយន្ត​សាមុយ មក​ស្ទូច​យក​រថយន្ត​ដែល​ខូច​នោះ​ទៅ​​រក្សា​ទុក ហើយ​មិន​បាន​ឃើញ Matthijs de Ligt នៅ​ទីនោះ​ដើម្បី​ដោះស្រាយ​ទេ។ ប្រសិន​បើ​គេ​រក​ឃើញ​ថា គាត់​មាន​ចេតនា​គេច​ចេញ​ពី​កន្លែង​កើត​ហេតុ​នោះ​មែន គាត់​អាច​ប្រឈម​នឹង​ការ​ផាក​ពិន័យ រឺ​ជាប់​ពន្ធនាគារ​រហូត​ដល់ 3 ឆ្នាំ។

គួរ​រំលឹក​ផង​ដែរ​ថា កីឡាករ​វ័យ 24 ឆ្នាំ​រូបនេះ​បាន​រួមរស់​នៅ​ក្នុង​ទ្រនំ​ជាមួយ Bayern Munich តាំង​ពី​ឆ្នាំ 2022 ហើយ​គិត​ចាប់​តាំង​ពី​ពេល​នោះ​មក​ដល់​បច្ចុប្បន្ន គាត់​បង្ហាញ​ខ្លួន​សរុប​ឲ្យ​ក្លឹប​អាឡឺម៉ង់​មួយ​នេះ​បាន​ចំនួន 73 ប្រកួត ដោយ​ស៊ុតបញ្ចូលទី​បាន 5 គ្រាប់ និង​បាន​ឈ្នះពាន Bundesliga ក៏​ដូច​ជា German Supercup ផង​ដែរ។

ប្រភព: Telecomasia