គ្រូ​បង្វឹក 5 រូប​ដែល​ដឹកនាំ​ក្លឹប​ឲ្យ​ឈ្នះពាន​ច្រើន​ជាង​គេ ក្នុង​ប្រវត្តិសាស្ត្រ​បាល់ទាត់

បាល់ទាត់ ជា​កីឡាករ​មួយ​ប្រភេទ ដែល​យើង​មើល​ឃើញ​ជា​ការ​ប្រើប្រាស់​កម្លាំង, ថាមពល និង​បច្ចេក​ទេស​របស់​កីឡាករ​នៅ​លើ​ទីលាន ប៉ុន្តែ​វា​មិន​មែន​បែប​នោះ​ឡើយ ព្រោះ​មាន​បុគ្គល​ម្នាក់​ដ៏​សំខាន់​ផ្សេង​ទៀត​នៅ​ពី​ក្រោយ​នោះ គឺ​គ្រូ​បង្វឹក​ដែល​ដឹកនាំ និង​បញ្ជា​ទៅ​លើ​ក្រុម​ទាំង​មូល។

ក្រៅ​ពី​មាន​កីឡាករ​ល្អៗ​ហើយ​នោះ គ្រូ​បង្វឹក​ជា​ចំណែក​មួយ​ដ៏​សំខាន់​ក្នុង​ការ​រៀបយុទ្ធ​សាស្ត្រ​ដើម្បី​សម្រេច​ជោគជ័យ​ដល់​ក្រុម​តែ​ម្ដង។ ដោយ​ឡែក​ថ្ងៃ​នេះ​យើង​នឹង​ងាក​មក​មើល​គ្រូ​បង្វឹក​ដែល​ជោគជ័យ​ជា​ច្រើន​រូប​នៅ​ក្នុង​ពិភព​បាល់ទាត់ តាំង​ពី​អតីត​កាល​ដល់​បច្ចុប្បន្ន​ទាំង 5 រូប ដែល​ធ្លាប់​ដឹកនាំ​ក្រុម​ឲ្យ​ឈ្នះពាន​ច្រើន​បំផុត។

5. Jock Stein

លោក Jock Stein គឺ​ជា​ជើង​ខ្លាំង​ម្នាក់​នៅ​ក្នុង​វិស័យ​បាល់ទាត់​របស់​ស្កុតឡេន។ គ្រូ​បង្វឹក​រូប​នេះ​ធ្លាប់​ឈ្នះពាន​សរុប 26 ពាន ហើយ​គាត់​បាន​ដឹកនាំ​ក្លឹប Celtic រហូត​ដល់ 13 ឆ្នាំ។ គាត់​ក៏​ធ្លាប់​បាន​ទៅ​ដឹកនាំ​ក្លឹប Leeds United និង​ក្រុម​បាល់ទាត់​នៃ​ប្រទេស​ស្កុតឡែន​ផងដែរ។

4. Valeriy Lobanovskyi

ជា​គ្រូ​បង្វឹក​មក​ពី​ប្រទេស​អ៊ុយក្រែន Valeriy Lobanovskyi បាន​ឈ្នះ​ពាន​សរុប​ចំនួន 29 ពាន ក្នុង​នា​ជា​គ្រូ​បង្វឹក​អាជីព។ គាត់​ត្រូវ​បាន​គេ​ស្គាល់​ជា​ទូទៅ​ថា ជា​អ្នក​បង្កើត​នូវ​ទម្រង់​លេង “False 9” និង “Total Football”។

3. Mircea Lucescu

ចំណាត់​ថ្នាក់​ទី 3 នេះ​បាន​ទៅ​លើ​លោក Mircea Lucescu ដែល​ធ្លាប់​ដឹកនាំ​ក្រុម​ឲ្យ​ឈ្នះពាន​ចំនួន 32 ពាន នៃ​អាជីព​របស់​ខ្លួន។ បុរស​សញ្ជាតិ​រ៉ូម៉ានី​រូប​នេះ បច្ចុប្បន្ន​កំពុង​ដឹកនាំ​ក្លឹប Dynamo Kyiv នៅ​អ៊ុយក្រែន។ គាត់​ធ្លាប់​បាន​ជួយ​ក្លឹប Galatasaray ឲ្យ​ឈ្នះ​ពានរង្វាន់ UEFA Super Cup ក្នុង​ឆ្នាំ 2000 ដោយ​បាន​ផ្តួល Real Madrid នៅ​វគ្គ​ផ្ដាច់ព្រ័ត។

2. Pep Guardiola

លោក Pep Guardiola បាន​ប្រមូល​ពានរង្វាន់​ដែល​គិត​មក​ទល់​នឹង​ពេល​នេះ​មាន​ចំនួន​រហូត​ដល់ 40 ហើយ នៅ​ក្នុង​អាជីព​ជា​គ្រូ​បង្វឹក​របស់​គាត់។ បុរស​សញ្ជាតិ​អេស្ប៉ាញ​រូប​នេះ ត្រូវ​បាន​គេ​ចាត់​ទុក​ជា​គ្រូ​បង្វឹក​ដ៏​ល្អ​បំផុត​នា​ពេល​បច្ចុប្បន្ន ហើយ​គាត់​ធ្លាប់​បាន​ដឹកនាំ​ក្លឹប​ធំៗ​ជា​ច្រើនដូច​ជា Barcelona, ​​Bayern Munich និង​បច្ចុប្បន្ន​គឺ Manchester City។ បន្ថែម​លើស​ពី​នេះ​ទៀត Pep Guardiola ជា​គ្រូ​បង្វឹក​ដែល​មិន​ធ្លាប់​មាន​ប្រវត្តិ​ត្រូវ​បាន​ក្លឹប​បណ្ដេញ​ចេញ​ពី​តំណែង​នោះ​ទេ។

1. Sir Alex Ferguson

អតីត​គ្រូ​បង្វឹក​ឆ្នើម​រូប​នេះ គឺ​ជា​អ្នក​ដែល​ឈរ​នៅ​ចំណាត់​ថ្នាក់​លេខ 1 ជា​អ្នក​​ឈ្នះ​ពាន​ច្រើន​ជាង​គេ។ លោក Sir Alex Ferguson បាន​ចំណាយ​ពេល 27 ឆ្នាំ​នៅ Manchester United ដោយ​បាន​ឈ្នះ​ពាន​រង្វាន់​ចំនួន 38 ពាន។ បុរស​វ័យ 79 ឆ្នាំ​រូបនេះ​ក៏​ធ្លាប់​បាន​ដឹកនាំ​ក្លឹប Aberdeen ឲ្យ​ឈ្នះ​ពាន​ចំនួន 10 ពាន​ផង​ដែរ ដូច្នេះ​ហើយ​សរុប​ពាន​ដែល​គាត់​ឈ្នះ​គឺ​មាន​រហូត​ដល់ 48 ពាន​ឯណោះ។

ប្រភព: Khelnow