Rodrygo កំពុង​មាន​ជម្រើស​អាច​ផ្លាស់​ទៅ​លេង​នៅ​ទឹកដី​អង់គ្លេស

ខ្សែប្រយុទ្ធ Rodrygo របស់​ក្លឹប​អធិរាជស Real Madrid ត្រូវ​បាន​គេ​រាយការណ៍​ថា នៅ​តែ​ចាប់​អារម្មណ៍​ចំពោះ​ចូល​រួម​ជាមួយ​​ក្លឹប​ចំនួន 2 នៅ​ក្នុង​ក្របខ័ណ្ឌ Premier League។ កីឡាករ​សញ្ជាតិ​ប្រេស៊ីល​រូប​នេះ បច្ចុប្បន្ន​អាច​និយាយ​បាន​ថា គាត់​ទទួល​បាន​ជោគជ័យ និង​ឈ្នះពាន​ស្ទើរ​ឆ្អែតឆ្អន់​ហើយ​ជាមួយ​ក្លឹប​របស់​ខ្លួន Real Madrid។

គិត​ចាប់​តាំង​ពី​បាន​ចូលរួម​ជាមួយ​ក្រុម​របស់​លោក Carlo Ancelotti ដល់​ពេល​នេះ Rodrygo រក​បាន​គ្រាប់បាល់​សរុប​ចំនួន 54 គ្រាប់ និង​បញ្ជូន​បាល់​ឲ្យ​មិត្ត​រួម​ក្រុម​បាន​ចំនួន 41 ដង ពី​ការ​បង្ហាញ​ខ្លួន 216 ប្រកួត​នៅ​គ្រប់​ព្រឹត្តិការណ៍​នៃ​ការ​ប្រកួត​ទាំង​អស់​របស់​ក្លឹប។ បន្ថែម​លើស​ពី​នេះ​ទៀត Rodrygo ក៏​ត្រូវ​បាន​គេ​ចាត់​ទុក​ជា​កីឡាករ​នៃ​អនាគត​ដ៏​វែង​ឆ្ងាយ​នៅ Real Madrid ផង​ដែរ ខណៈ​ដែល​កុងត្រា​របស់​គាត់​នៅ​មាន​សុពលភាព​រហូត​ដល់​ឆ្នាំ 2028។

ទោះ​ជា​យ៉ាង​ណា​ក៏ដោយ ការ​មក​ដល់​របស់ Kylian Mbappe នៅ​រដូវក្ដៅ​នេះ បាន​ធ្វើ​ឲ្យ Rodrygo មាន​ហានិភ័យ​ខ្ពស់ ក្នុង​ឱកាស​ចូល​លេង​បាន​តិច​ជាង​មុន។ យោងតាម​របាយការណ៍​ដែល​បាន​ចុះ​ផ្សាយ​ដោយ ​​Mundo Deportivo បាន​ឲ្យ​ដឹងថា ទាំង Rodrygo និង​ក្លឹប Real Madrid ក្ដី​សុទ្ធ​តែ​បញ្ជាក់​ថា កីឡាករ​ឆ្នើម​រូប​នេះ​នឹង​មិន​ចាកចេញ​ពី​ក្លឹប​នា​រដូវក្តៅ​នេះ​ឡើយ។

យ៉ាង​ណា​អ្វីៗ​ហាក់​បី​ដូច​ជា​សេណារីយ៉ូ​ដែល​មិន​ច្បាស់​លាស់ ហើយ Real Madrid ត្រូវ​បាន​គេ​សន្និដ្ឋាន​ថា នឹង​ផ្លាស់ប្តូរ​គំនិត​នៃ​ការ​រក្សា​ទុក Rodrygo ប្រសិន​បើ​ពួកគេ​ទទួល​បាន​សំណើរ​នៃ​ការ​ដេញ​ថ្លៃ​ដ៏​ខ្ពស់ និង​សមស្រប​មួយ​មក​លើ​ខ្សែ​ប្រយុទ្ធ​របស់​ខ្លួន។ មាន​របាយការណ៍​ច្បាស់ការណ៍​ជា​ច្រើន​បាន​ឲ្យ​ដឹង​ថា ក្លឹប​ធំៗ 2 នៅ​អង់គ្លេស​ដែល​មាន Liverpool និង Manchester City សុទ្ធតែ​កំពុង​ចង់​ចុះ​ហត្ថលេខា​លើ​កីឡាករ​វ័យ 23 ឆ្នាំ​ដែល​កំពុង​មាន​ភាព​លេច​ធ្លោរ​ខ្លាំង​ក្នុង​ពិភព​បាល់ទាត់​រូប​នេះ។

ប្រភព: Sportsmole