ក្លឹប Charlotte FC ចង់​ចុះ​ហត្ថលេខា​នាំ​យក Miguel Almiron មក​ទឹកដី​អាមេរិក​វិញ

ក្លឹប Charlotte FC របស់ MLS ត្រូវ​បាន​គេ​រាយការណ៍​ថា បាន​ដាក់​សំណើរ​ដើម្បី​ចរចា​លើ​ខ្សែ​ប្រយុទ្ធ​ស្លាប Miguel Almiron ប៉ុន្តែ​ត្រូវ​បាន​បដិសេធ​ដោយ​ក្លឹប Newcastle។

យ៉ាង​ណា​មិញ Almiron គឺ​ជា​អតីត​កីឡាករ​ដែល​លេង​នៅ​លីគ​អាមេរិក ហើយ​បាន​ចូលរួម​ជាមួយ Newcastle ដោយ​ផ្ទេរ​ពី​ក្លឹប Atlanta United ក្នុង​តម្លៃ​ប្រហែល 20 លានផោន កាល​ពី​ឆ្នាំ 2019 ហើយ​ចាប់​តាំង​ពី​ពេល​នោះ​មក​គាត់​បាន​រួម​ចំណែក​ស៊ុតបញ្ចូលទី​បាន 30 គ្រាប់ និង Assist បាន​ចំនួន 12 ដង ពី​ការ​បង្ហាញ​ខ្លួន​សរុប 209 ប្រកួត។

កីឡាករ​វ័យ 30 ឆ្នាំ​រូបនេះ​នៅ​មាន​កុងត្រា​រយៈពេល 2 ឆ្នាំ​ទៀត​ជាមួយ Newcastle ប៉ុន្តែ​គាត់​ត្រូវ​បាន​ផ្សារ​ភ្ជាប់​ជាមួយ​នឹង​ការ​ចាកចេញ​នៅ​រដូវក្តៅ​នេះ ស្រប​ពេលដែល​មាន​ការ​ចាប់អារម្មណ៍​ពី​ក្លឹប​ជា​ច្រើន​នៅ​ក្រៅ​លីគ​របស់​អង់គ្លេស។ កន្លង​មក​មាន​ក្លឹប​នៅ Saudi Pro League បាន​ពិភាក្សា​ជាមួយ Newcastle លើ​កិច្ច​ព្រមព្រៀង​ជាមួយ Almiron ប៉ុន្តែ​ការ​ចរចា​ពី​ក្លឹប​នៅ​មជ្ឈឹមបូព៌ា​ត្រូវ​បរាជ័យ ហើយ​ធ្វើ​ឲ្យ​ខ្សែ​ប្រយុទ្ធ​ស្លាប​រូប​នេះ​ស្នាក់​នៅ​ក្លឹប​បច្ចុប្បន្ន​របស់​ខ្លួន​រហូត​មក​ដល់​ពេល​បច្ចុប្បន្ន។

Miguel Almiron បាន​ទទួល​ឱកាស​ត្រឡប់​ទៅ​ទឹកដី​នៃ​សហរដ្ឋអាមេរិក​វិញ ខណៈ​ដែល​ក្លឹប Charlotte FC ចង់​បាន​គាត់។ ទោះ​ជា​យ៉ាង​ណា​ក៏​ដោយ​របាយការណ៍​ពី Chronicle Live បាន​រាយការណ៍​ថា ក្លឹប Newcastle បាន​បដិសេធ​មិន​លក់​កីឡាករ​សញ្ជាតិ​ប៉ារ៉ាហ្គាយ​រូប​នេះ​ឡើយ។

ប្រភព: Sportsmole