Dani Carvajal បញ្ជាក់​ថា ខ្លួន​នឹង​ចាកចេញ បើ​ក្លឹប​លែង​ត្រូវ​ការ

ខ្សែ​ការពារ​ស្លាប Dani Carvajal របស់​ក្លឹប Real Madrid បាន​និយាយ​ថា បើ​តាម​ចិត្ត​គំនិត​របស់​គាត់ ការ​ស្នាក់​នៅ Bernabeu គឺ​ជា​ជម្រើស​ដ៏​ល្អ​បំផុត ព្រោះ​វា​ជា​ផ្ទះ​របស់​គាត់​អស់រយៈពេលជាច្រើនឆ្នាំ​មក​ហើយ ប៉ុន្តែ​​កីឡាករ​សញ្ជាតិ​អេស្ប៉ាញ​រូបនេះ​បាន​បង្ហាញ​ពី​ចិត្ត​ចង់​ចាកចេញ​ពី​ទឹកដី​អេស្ប៉ាញ ដើម្បី​ស្វែងរក​ក្លឹប​ថ្មី​ដែរ។

យ៉ាង​ណា​មិញ Dani Carvajal ដែល​មាន​វ័យ 32 ឆ្នាំ ត្រូវ​បាន​គេ​ចាត់​ទុក​ថា​ជា​ខ្សែ​ការពារ​ស្តាំ​ដ៏​ល្អ​បំផុត​ម្នាក់​នៅ​ក្នុង​ពិភព​បាល់ទាត់ ហើយ​គាត់​បាន​ដើរ​តួ​យ៉ាង​សំខាន់​ក្នុង​ភាព​ជោគ​ជ័យ​របស់ Real Madrid ក្នុង​រយៈពេល​ប៉ុន្មាន​រដូវកាល​ចុង​ក្រោយ​នេះ រួម​ទាំង​រដូវកាល​មុន​ផង​ដែរ ដោយ​បាន​ឈ្នះពាន UCL និង​ពាន La Liga ផង​ដែរ។

ថ្មីៗ​នេះ Dani Carvajal បាន​និយាយ​ប្រាប់​ទៅ​កាន់​កាសែត The Athletic ថា កុងត្រា​របស់​គាត់​ជាមួយ Real Madrid នឹង​ត្រូវ​ផុត​កំណត់​នៅ​ចុង​បញ្ចប់​នៃ​រដូវកាល​នេះ ហើយ​មិនទាន់​មាន​ការ​ពិភាក្សា​លើ​កិច្ច​ព្រមព្រៀង​ថ្មី​នៅ​ឡើយ​ទេ។ Dani Carvajal បាន​បន្ថែម​ទៀត​ថា គាត់​មិន​គិត​ពី​ការ​ចូល​និវត្តន៍​ទេ ហើយ​នឹង​ជ្រើសរើស​បន្ត​នៅ Real Madrid ប៉ុន្តែ​បើ​កាលៈទេសៈ​មិន​អំណោយ​ផល​ទេ គាត់​ក៏​បើក​ចិត្ត​ក្នុង​ការ​បន្ត​អាជីព​នៅ​ក្លឹប​ផ្សេង​ទៀត​ដែល​មិន​ស្ថិត​នៅ​លីគ​កំពូល​នៃ​តំបន់​អឺរ៉ុប​ផង​ដែរ។

ប្រភព: Sportsmole