Valencia កំពុង​ពិចារណា​បញ្ចប់​កុងត្រា​ជាមួយ Rafa Mir បន្ទាប់​ពី​ខ្សែ​ប្រយុទ្ធ​រូប​នេះ​ត្រូវ​បាន​ប៉ូលីស​ចាប់​ខ្លួន

ខ្សែ​ប្រយុទ្ធ​សំខាន់​ម្នាក់​របស់​ក្លឹប Valencia គឺ​កីឡាករ Rafa Mir កំពុង​ស្ថិត​ក្នុង​រឿង​អាស្រូវ​ដ៏​ធំ​មួយ។ កីឡាករ​​សញ្ជាតិ​អេស្ប៉ាញ​រូប​នេះ​ត្រូវ​បាន​ប៉ូលីស​ចាប់​ខ្លួន​ពី​បទ​រំលោភ​សេពសន្ថវៈ។ យោង​តាម​របាយការណ៍​ពី ​​Mundo Deportivo បាន​ឲ្យ​ដឹង​ថា Rafa Mir នឹង​ខកខាន​មិន​បាន​ហ្វឹក​ហាត់​ជាមួយ​មិត្តរួម​ក្រុម​របស់​ខ្លួន ដែល​ធ្វើ​ឡើង​នៅ​ថ្ងៃព្រហស្បតិ៍ និង​ថ្ងៃ​សុក្រ នេះ​ទេ។

ទន្ទឹម​នឹង​នេះ​ដែរ ក្នុង​អំឡុង​ពេល​សម្រាក​ពី​ការ​ប្រកួត​មួយ​រយៈ​ពេល​ធំ ជិត​កន្លះ​ខែ​នេះ Valencia នឹង​មាន​ពេល​វេលា​គ្រប់គ្រាន់ ដើម្បី​ធ្វើ​ការ​ស៊ើប​អង្កេត​ផ្ទៃ​ក្នុង​របស់​ខ្លួន ដើម្បី​សម្រេច​ចិត្ត​ចាត់​វិធាន​ការ​ណា​មួយ​លើ​អនាគត​របស់ Rafa Mir។ ខ្សែប្រយុទ្ធ​វ័យ 27 ឆ្នាំ​រូបនេះ​ទើប​តែ​បាន​ចូលរួម​ជាមួយ Valencia ក្នុង​លក្ខខណ្ឌខ្ចី​ជើង​ពី Sevilla ប៉ុណ្ណោះ ហើយ​បើ​ស្ថានភាព​មិន​សម​ប្រកប​ទេ Valencia អាច​នឹង​បញ្ចប់​លក្ខខណ្ឌ​ជា​មួយ Rafa Mir ហើយ​បញ្ជូន​គេ​ឲ្យ​ទៅ​ក្លឹប​ចាស់​វិញ។

គួរ​រំលឹក​ផង​ដែរ​ថា បទល្មើស​របស់ Rafa Mir ដែល​ត្រូវ​បាន​គេ​ចោទ​ប្រកាន់​នោះ​បាន​កើត​ឡើង​កាល​ពី​ថ្ងៃ​អាទិត្យ​សប្ដាហ៍​មុន ក្នុង​អំឡុង​ពិធី​ជប់​លៀង​មួយ​នៅ​ផ្ទះ​របស់ Rafa Mir ដែល​មាន​ស្ត្រី 2 ​នាក់​អាយុ​ក្បែរ 25 ឆ្នាំ​ ជា​ជន​រងគ្រោះ​បាន​រាយការណ៍​ប្រាប់​ប៉ូលីស និង​សុំ​ចូល​ពេទ្យ​ពិនិត្យ​សុខភាព​ទៀត​ផង បន្ទាប់​ពី​កើត​ហេតុ។

ប្រភព: Dailysports