Jurgen Klopp លើក​ឡើង​ថា កីឡាករ​មិន​មែន​ជា​ផ្នែក​មួយ​ដ៏​សំខាន់ ក្នុង​ការ​ធ្លាក់​ចុះ​នៃ​ទម្រង់​លេង​របស់​បិសាចក្រហមនោះ​ទេ

ក្លឹបបិសាចក្រហម Manchester United ជា​ក្លឹប​ដ៏​មាន​វ័យ​ចំណាស់ និង​កេរ្តិ៍​ឈ្មោះ​ដ៏​ល្បីល្បាញ​ក្នុង​ពិភព​បាល់ទាត់ ជា​ពិសេស​ការ​បង្កើត​កំណត់ត្រា​ឈ្នះពាន​លីគ​កំពូល​របស់​អង់គ្លេស Premier League ចំនួន 20 សម័យ​កាល​របស់​ខ្លួន។ ទោះ​ជា​យ៉ាង​ណា​ក៏​ដោយ នៅ​ប៉ុន្មាន​ឆ្នាំ​ចុង​ក្រោយ​នេះ បិសាចក្រហម បាន​ធ្លាក់​ចុះ​នូវភាព​ខ្លាំង​របស់​ខ្លួន ហើយ​ហាក់​ដូច​ជា​មាន​អ្វី​ម្យ៉ាង​ដែល​ជា​បញ្ហា​នៅ​មិន​ទាន់​អាច​រក​ឃើញ។

យ៉ាង​ណា​មិញ​លោក Jurgen Klopp ដែល​ជា​អតីត​គ្រូ​បង្វឹក​របស់ Liverpool បាន​បង្ហាញ​ការ​យល់​ឃើញ​ពី​វិបត្តិ​នៅ​បិសាចក្រហម ដែល​នោះ​ពាក់ព័ន្ធ​នឹង​គោល​នយោបាយ​ផ្ទេរ និង​អាកប្បកិរិយា​ដែល​ក្លឹប​បាន​ប្រព្រឹត្តិ​ចំពោះ​កីឡាករ​របស់​ពួកគេ។ បុរស​វ័យ 57 ឆ្នាំ​រូប​នេះ​បាន​លើក​ឧទាហរណ៍​ដោយ​រិះគន់​ពី​របៀប​ដែល Jadon Sancho ទទួល​បាន​នៅ Old Trafford។

យោងតាម​សម្ដី​របស់ Jurgen Klopp ដែល​ប្រាប់​ទៅ talkSPORT បាន​លើក​ឡើង​ថា៖ “ប្រសិន​បើ​ពិភពលោក​ទាំង​មូល​បាត់បង់​ទំនុក​ចិត្ត និង​ជំនឿ​ជាក់​លើ​កីឡាករ គ្រូ​បង្វឹក​ត្រូវ​ឈរ​ក្នុង​គោលជំហរ​នៃ​ការ​ទទួល​ខុស​ត្រូវ​ដ៏​ខ្ពស់​សម្រាប់​កីឡាករ។ ខ្ញុំ​មិន​ជឿ​ថា ​ក្លឹប​មួយ​ទិញ​កីឡាករ​ម្នាក់​ដែល​គ្មាន​ប្រយោជន៍​សុទ្ធ​សាធ ក្នុង​តម្លៃ 80 លាន​ផោន រួច​បញ្ជូន​គាត់​ឲ្យ​ខ្ចី​ជើង​ទៅ​ក្លឹប​ផ្សេង​នោះ​ឡើយ”។

ប្រភព: Dailysports