PSG ត្រៀម​ប្រកាស​ចែក​ផ្លូវគ្នា​ជា​មួយ​លោក Mauricio Pochettino

គ្រូ​បង្វឹក​លោក Mauricio Pochettino បាន​យល់​ព្រម​ចែក​ផ្លូវ​គ្នា​ជាមួយ Paris Saint-Germain បន្ទាប់​ពី​មាន​កិច្ចចរចារ​ដ៏​​តឹងតែង​មួយ​របស់​គ្រូ​បង្វឹក​សញ្ជាតិ​អាហ្សង់ទីន​រូប​នេះ និង​ក្រុមប្រឹក្សា​ភិបាល​របស់​ក្លឹប​កាល​ពី​សប្តាហ៍​មុន។

អតីត​គ្រូ​បង្វឹក​ក្រុម​មាន់ខ្នាយមាស Tottenham បាន​ចំណាយ​ពេល 18 ខែ នៅ​ក្នុង​ប្រទេស​បារាំង ប៉ុន្តែ​អ្វីៗ​មិន​ដូចការ​រំពឹង​ទុក​របស់​ក្លឹប ក៏​ដូច​ជា​អ្នក​គាំទ្រ​ឡើយ ដោយ​លោក Pochettino បាន​បរាជ័យ​ក្នុង​ការ​ប្រកួត​ប្រជែង​ពាន UEFA Champions League និង​ខកខាន​ឈ្នះ​ពានលីក​កាល​ពី​ឆ្នាំ​មុន (2021) ផងដែរ។

ក្លឹប PSG បាន​ធ្លាក់ចេញ​ពី UCL ក្រោម​ថ្វី​ជើង​របស់​ក្លឹប Real Madrid នៅ​រដូវកាល​នេះ ហើយ​ធ្វើ​ឲ្យ​លោក Pochettino មាន​សម្ពាធ​ជា​ខ្លាំង ដោយ​សារ​ពួក​គេ​មាន​កីឡាករ​ល្អៗ​ជា​ច្រើន ជា​ពិសេស​មាន​ខ្សែប្រយុទ្ធ​ដែល​មាន​គុណភាព​ទាំង​បី​រូប​ខាង​លើ។

គោល​ដៅ​របស់ PSG មិន​មែន​ជា​ការ​ឈ្នះពាន Ligue 1 នោះ​ទេ ព្រោះ​ពាន​នេះ​គេ​ឈ្នះ​ច្រើន​ពេក​ទៅ​ហើយ ប៉ុន្តែ​សម្រាប់​ការ​ឈ្នះ UEFA Champions League គឺ​ជាក្ដី​ប្រាថ្នា​របស់​ក្លឹប ព្រោះ​ពាន​នេះ ក្លឹប​យក្ស​បារាំង​មិន​ដែល​ឈ្នះ​សូម្បី​តែ​ម្ដង។

បច្ចុប្បន្ន​កុងត្រា​របស់​លោក Pochettino នឹង​ត្រូវ​ផុត​កំណត់​នៅ​ឆ្នាំ 2023 ប៉ុន្តែ​របាយការណ៍​ពី Athletic បាន​លើក​ឡើង​ថា ក្រុម​ប្រឹក្សាភិបាល​របស់​ក្លឹប នឹង​ឲ្យ​គាត់​ចុះ​ចេញ​ពី​តំណែង។

ដោយ​ឡែក​លោក Zinedine Zidane នឹង​មក​ដឹកនាំ​ជំនួស​តំណែង​របស់​លោក Pochettino ដោយ​អតីត​គ្រូ​បង្វឹក​របស់​ក្លឹប Real Madrid នឹង​ត្រូវ​បាន​ក្លឹប​ទុក​ចិត្ត​ក្នុង​ការ​ជួយ​ឲ្យ​ពួក​គេ​អាច​ឈ្នះពាន UCL បាន។

ប្រភព: Metro