ប្រសិន​បើ Van Dijk ចាកចេញ ហង្សក្រហម​នឹង​ព្យាយាម​ចុះ​ហត្ថលេខា​លើ​ខ្សែការពារ​រូប​នេះ

ក្លឹប​ហង្សក្រហម Liverpool ត្រូវ​បាន​គេ​រាយការណ៍​ថា នឹង​ចុះ​ហត្ថលេខា​លើ​​ខ្សែ​ការពារ​ថ្មី ដើម្បី​ជា​ការ​បម្រុង​ទុក​ពេល​ដែល​កីឡាករ​មួយ​ចំនួន​អាច​ចាកចេញ​នៅ​ពេល​ផុត​កុងត្រា។ ខណៈ​ដែល​បញ្ហា​ហិរញ្ញវត្ថុ​របស់ Sevilla កំពុង​កើត​ឡើង Liverpool ចង់​ឆក់​យក​​ឱកាស​នេះ ដើម្បី​ចុះ​ហត្ថលេខា​ជាមួយ​កីឡាករ​ឆ្នើម​មួយ​រូប​របស់​ពួក​គេ​គឺ​កីឡាករ Loic Bade។

បច្ចុប្បន្ន​ក្រុម​របស់​លោក Arne Slot កំពុង​ឈរ​នៅ​លើ​កំពូល​តារាង​នៃ​ក្របខណ្ឌ Premier League បន្ទាប់​ពី​ឆ្លង​កាត់​ការ​ប្រកួត​ចំនួន 7 ប្រកួត ដោយ​បាន​របូត​គ្រាប់​បាល់​តែ 2 គ្រាប់​ប៉ុណ្ណោះ​នៅ​ក្នុង​ចំណោម​ប្រកួត​ទាំង​នោះ ដែល​នេះ​សរ​បញ្ជាក់​ថា ប្រព័ន្ធ​ការពារ​របស់​ពួក​គេ​នៅ​តែ​រឹងមាំ​ល្អ។

ទោះ​ជា​យ៉ាង​ណា​ក៏​ដោយ ខ្សែការពារ​កណ្ដាល​ដ៏​សំខាន់​របស់​ក្លឹប​គឺ Virgil van Dijk នឹង​ផុតកំណត់​កុងត្រា​របស់​ខ្លួន នៅ​ចុង​បញ្ចប់​នៃ​រដូវកាល​នេះ​ហើយ ដោយ​អនាគត​របស់​កីឡាករ​វ័យ 33 ឆ្នាំ​រូប​នេះ បាន​ស្ថិត​ក្នុង​ស្ថានភាព​មិន​ច្បាស់លាស់។

ជា​លទ្ធផល យោងតាម​របាយការណ៍​ពី TodoFichajes បាន​អះអាង​ថា ប្រសិន​បើ​អ្វីៗ​ដំណើរ​ការ​ទៅ​តាម​ផែនការ Liverpool នឹង​ទិញ​យក Loic Bade នៅ​ដើម​ខែ​មករា ឆ្នាំ​ក្រោយ។ ​តម្លៃ​ខ្លួន​របស់​ខ្សែការពារ​រូប​នេះ​ប្រហែល​ជា 25 លាន​អឺរ៉ូ។ ការ​ចុះ​ហត្ថលេខា​លើ Loic Bade មិន​ត្រឹមតែ​ជួយ​ឲ្យ Liverpool មាន​ជម្រើស​ខ្សែការពារ​កាន់​តែ​សម្បូរ​បែប​ប៉ុណ្ណោះ​ទេ តែ​ក៏​អាច​ជា​ការ​បម្រុង​ទុក​មុន​ក្នុង​ករណី Virgil van Dijk សម្រេច​ចិត្ត​ចាកចេញ​ពី​ទឹកដី Anfield ផង​ដែរ។

ប្រភព: Sportsmole