Barcelona ត្រៀម​ឆ្មក់​ឱកាស​ចុះ​ហត្ថលេខា​លើ Rafael Leao

ក្លឹប​យក្ស​អេស្ប៉ាញ FC Barcelona កំពុង​តាម​ដាន​ស្ថានភាព​របស់ Rafael Leao នៅ​ក្លឹប AC Milan ដែល​ជា​ក្លឹប​បច្ចុប្បន្ន​របស់​គេ។ កីឡាករ​វ័យ 25 ឆ្នាំ​រូបនេះ​ត្រូវ​បាន​គេ​រំពឹង​ថា នឹង​ផ្លាស់​ចេញ​ពី​ទឹកដី San Siro ដើម្បី​ផ្ទេរ​ទៅ​ចូលរួម​ជាមួយ​ក្លឹប​​នៅ​ក្របខ័ណ្ឌ Premier League រឺ​ក្លឹប​អ្នក​មាន​បុណ្យ Barcelona។

ក្លឹប​ម្ចាស់​ជើង​ឯក​នៃ​ប្រទេស​បារាំង Paris Saint-Germain ក៏​បាន​​ចាប់​អារម្មណ៍​លើ Rafael Leao ដែរ ប៉ុន្តែ​ក្លឹប PSG ប្រហែល​ជា​មិន​មែន​គោលដៅ​របស់​កីឡាករ​ឆ្នើម​រូប​នេះ​ឡើយ។ ខ្សែ​ប្រយុទ្ធ​ស្លាប Rafael Leao បាន​កសាង​កេរ្តិ៍​ឈ្មោះ​របស់​ខ្លួន ឲ្យ​ក្លាយ​ជា​កីឡាករ​សំខាន់​ម្នាក់​របស់​ក្លឹប AC Milan ហើយ​គិត​ចាប់​តាំង​ពី​បាន​ផ្ទេរ​ពី​ក្លឹប Lille ក្នុង​ខែ​សីហា ឆ្នាំ 2019 គាត់​បាន​ស៊ុត​បញ្ចូលទី​សរុប 59 គ្រាប់ និង​បញ្ជូន​បាល់​ឲ្យ​មិត្ត​រួម​ក្រុម​បាន 54 ដង ក្នុង​ការ​បង្ហាញ​ខ្លួន​សរុប 221 ប្រកួត។

យោងតាម​សារព័ត៌មាន​អេស្ប៉ាញ (Sport) បាន​ឲ្យ​ដឹង​ថា Rafael Leao ចាប់​ផ្តើម​ធុញ​ទ្រាន់​នឹង​ស្ថានភាព​ស្មុគស្មាញ​​មួយ​ចំនួន​នៅ AC Milan ហើយ​ចង់​ចាកចេញ​នៅ​រដូវក្ដៅ​ខាង​មុខ។ ដោយ​ដឹង​ពី​ស្ថានភាព​នេះ Barcelona កំពុង​យក​ចិត្ត​ទុក​ដាក់​យ៉ាង​ខ្លាំង​លើ​ឱកាស​ចុះ​ហត្ថលេខា​លើ Rafael Leao។ សម្រាប់​កីឡាករ​វ័យ 25 ឆ្នាំ​រូប​នេះ​ផ្ទាល់ មាន​ការ​ពេញ​ចិត្ត​ជាមួយ​នឹង​ភាព​រីក​ចម្រើន ក៏​ដូច​ជា​ទម្រង់​លេង​របស់ Barcelona។ ទន្ទឹម​នឹង​នេះ​ដែរ ប្រធាន​ក្លឹប​លោក Joan Laporta ក៏​ចង់​បាន Rafael Leao ជា​ខ្លាំង បន្ទាប់​ពី​បរាជ័យ​ក្នុង​ការ​ផ្ទេរ Nico Williams កាល​ពី​ដើម​រដូវកាល​កន្លង​ទៅ។

ប្រភព: Sportsmole