ប្រសិន​បើ Zidane មក​ដឹកនាំ PSG នោះ​គាត់​នឹង​លក់​ខ្សែ​ប្រយុទ្ធ​ម្នាក់​នេះ!!!

អតីត​គ្រូ​បង្វឹក​របស់​ក្លឹប Real Madrid លោក Zinedine Zidane ត្រូវ​បាន​គេរាយការណ៍​ថា គាត់​ចង់​លក់​ខ្សែប្រយុទ្ធ Neymar របស់​ក្លឹប Paris Saint-Germain ចេញ ប្រសិន​បើ​គាត់​ក្លាយ​ជា​គ្រូ​បង្វឹក​​ថ្មី​របស់​ក្លឹប​នៅ​រដូវក្តៅនេះ។

ដោយ​ឡែក PSG មាន​បំណង​ចង់​តែង​តាំង Zidane ជា​គ្រូ​ថ្មី​របស់​ពួក​គេ ខណៈ​ដែល​ក្លឹប​ម្ចាស់ជើង​ឯក Ligue 1 របស់​បារាំង​មួយនេះ គ្រោង​នឹង​បណ្តេញ​គ្រូ​បង្វឹក​បច្ចុប្បន្ន Mauricio Pochettino ចេញ​មុន​បើក​រដូវកាល​ថ្មី។

Pochettino មិន​អាច​ជួយ​ក្លឹប​ឲ្យ​ឈ្នះ​ពាន UEFA Champions League ដែល​ក្លឹប​មិន​ធ្លាប់​បាន​ឈ្នះ​ឡើយ។ ទន្ទឹម​នឹង​នេះ​ដែរ លោក Zinedine Zidane ធ្លាប់​បាន​ដឹកនាំ​ក្រុម Real Madrid ឲ្យ​ឈ្នះពាន UEFA Champions League នេះ​ចំនួន​បី​រដូវកាល​ជាប់​គ្នា​ចន្លោះ​ឆ្នាំ 2016 ដល់ 2018។

អតីត​គ្រូ​បង្វឹក​សញ្ជាតិ​បារាំង Zinedine Zidane បាន​ចាកចេញ​ពី​កីឡដ្ឋាន Santiago Bernabeu បន្ទាប់​ពី​ដឹកនាំ​ជា​លើកទីពីរ​របស់​ខ្លួន​នៅ​រដូវក្តៅ​ឆ្នាំ 2021 ហើយ​បន្ត​ពី​នោះ​មក គាត់​មិន​ទទួល​ការងារ​ទៅ​ដឹកនាំ​នៅ​ក្លឹប​ណា​ឡើយ ទោះ​បី​ជា​ក្លឹបធំៗ​មួយ​ចំនួន​ចង់​បាន​គាត់​ក៏​ដោយ។ Zinedine Zidane ត្រូវ​បាន​គេ​គិត​ថា គាត់​ចង់​ដឹកនាំ PSG និង​ក្រុម​ជម្រើស​ជាតិ​បារាំង។

យោងតាម​សារព័ត៌មាន El Nacional លោក Zidane បាន​ត្រៀម​ខ្លួន​រួច​ហើយ​សម្រាប់​ធ្វើ​ជា​គ្រូ​បង្វឹក​ថ្មី និង​ត្រៀម​លក់ Neymar ផង​ដែរ។

ដោយ​ឡែក Neymar ត្រូវ​បាន​អ្នក​គាំទ្រ​មួយ​ចំនួន​មិន​ពេញ​ចិត្ត​ឡើយ ជា​មួយ​នឹង​ទម្រង់​លេង​របស់​គាត់ ហើយ​ត្រូវ​បាន​គេ​ហៅ​ឈ្មោះ​គាត់​ថា “ចៀមខ្មៅ” នៃ Parc Des Princes។

ប្រភព: Dailypost