Cristiano Ronaldo អាច​នឹង​ចាកចេញ​ពី​បិសាចក្រហម​ទៅ​ចូល​រួម​ជា​មួយ​លោក Jose Mourinho នៅ Roma

យោងតាម​របាយការណ៍​ពី La Repubblica ក្នុង​ប្រទេស​អ៊ីតាលី​បាន​ឲ្យ​ដឹង​ថា តារា​ឆ្នើម Cristiano Ronaldo កំពុង​ស្វែងរក​ក្លឹប​ថ្មី​មួយ​ផ្សេង​ទៀត​នៅ​រដូវក្តៅ​នេះ ដោយ​គាត់​មិន​ចង់​បន្ត​ស្នាក់​នៅ​ជា​មួយ​ក្លឹប​បិសាចក្រហម Manchester United ឡើយ។

របាយការណ៍​ដដែល​នោះ​បាន​ឲ្យ​ដឹង​ថា Cristiano Ronaldo មាន​អារម្មណ៍​ថា​គាត់​នឹង​បាត់បង់​ឱកាស​លេង និង​មិន​ស្ថិត​ក្នុង​ផែនការ​របស់​លោក Erik ten Hag នោះ​ទេ ដោយ​អតីត​គ្រូ​បង្វឹក Ajax រូប​នេះ កំពុង​ព្យាយាម​ស្វែងរក​កីឡាករ​ដែល​មាន​គុណភាព​លេង​ខ្ពស់​បំផុត​នៅ​តំបន់​ប្រយុទ្ធ​ខាង​លើ។

ភ្នាក់ងារ​របស់​ខ្សែប្រយុទ្ធ​វ័យ 37 ឆ្នាំ​លោក Jorge Mendes ឥឡូវ​នេះ​ប្រហែល​ជា​កំពុង​ស្វែងរក​ក្លឹប​នៅ​ទ្វីបអឺរ៉ុប​ដែល​ចាប់​អារម្មណ៍​លើ​ការ​ផ្ទេរ Cristiano Ronaldo។ ពេល​នេះ​កំពុង​មាន​ក្លឹប​ចំនួន​ពីរ​បានបង្ហាញ​ពី​ចំណាប់អារម្មណ៍​លើ​រឿង​នេះ ដោយ​មាន Roma និង Sporting CP។

យ៉ាង​ណា Roma គឺ​ជា​ក្លឹប​មួយ​ដែល​មាន​ភាគរយ​ខ្ពស់ ក្នុង​ការ​នាំ​យក Cristiano Ronaldo ដោយ​ពួក​គេ​នឹង​ប្រើប្រាស់​ឥទ្ធិពល​របស់​គ្រូ​បង្វឹក​លោក Jose Mourinho ដែល​ជា​អតីត​គ្រូ​បង្វឹក​របស់ Cristiano Ronaldo។

គួរ​រំលឹក​ផង​ដែរ​ថា កាល​ពី​ឆ្នាំ 2018 ខ្សែ​ប្រយុទ្ធ Cristiano Ronaldo ធ្លាប់​បាន​និយាយ​ថា “Jose Mourinho គឺ​គ្រូ​បង្វឹក​ដ៏​ល្អ​បំផុត​របស់​គាត់ ក្នុង​ចំណោម​គ្រូបង្វឹក​ទាំងអស់​ដែល​គាត់​ធ្លាប់​ចូលរួម​​ជា​មួយ”។

ប្រភព: EPSN