Barcelona កំពុង​ទ័ល​ច្រក​ជាមួយ Ansu Fati! ចង់​លក់​ចេញ តែ​គ្មាន​អ្នក​ទិញ

កាល​ពី​ប៉ុន្មាន​ឆ្នាំ​មុន Ansu Fati ជា​ខ្សែ​ប្រយុទ្ធ​ស្លាប​ម្នាក់​ដ៏​ល្អ​បំផុត​របស់​ក្លឹប​អ្នក​មាន​បុណ្យ Barcelona រហូត​ត្រូវ​បាន​គេ​ចាត់​ទុក​ថា​ជា​កីឡាករ​ដែល​មាន​ទេពកោសល្យ អាច​កសាង​កេរ្តិ៍​ឈ្មោះ​បន្ត​ពី Lionel Messi ថែម​ទៀត​ផង។ ប៉ុន្តែ​អនាគត​មិន​អាច​មើល​ឃើញ​ឡើយ ហើយ​ឥឡូវ​នេះ​អនាគត​របស់​គាត់​ជា​មួយ​ក្លឹប​កាតាឡាន់ កំពុង​ស្ថិត​ក្នុង​ស្ថានភាព​ដ៏​យ៉ាប់យ៉ឺន​បំផុត​មួយ។

យ៉ាង​ណា​មិញ ថ្មីៗ​នេះ​យោង​តាម​សារព័ត៌មាន Diario Sport បាន​ឲ្យ​ដឹង​ថា ក្លឹប​អ្នក​មាន​បុណ្យ Barcelona មិន​សប្បាយ​ចិត្ត​នឹង​ស្ថានភាព​បច្ចុប្បន្ន​របស់ Ansu Fati នោះ​ទេ។ ការ​​ព្រួយ​​បារម្ភ​របស់​ពួក​គេ​ដែល​ក្រៅ​ពី​ទម្រង់​លេង​ដែល​មិន​អាច​ស្ដារ​ឡើង​វិញ​បាន​នោះ ​គឺ​ជា​​ប្រាក់​ខែ​ដ៏​ខ្ពស់​មិន​សមាមាត្រ​ទៅ​នឹង​អ្វី​ដែល​គាត់​បាន​ផ្ដល់​ឲ្យ​ក្លឹប​វិញ។

Barcelona ចង់​លក់ Ansu Fati ប៉ុន្តែ​ប្រាក់​ឈ្នួល​ខ្ពស់​របស់​គាត់ និង​ប្រវត្តិ​របួសញឹកញាប់​បាន​រារាំង​ក្លឹប​ផ្សេងៗ​ឲ្យ​រារែក​ចិត្ត​ចំពោះ​រឿង​នេះ។ សម្រាប់​ពេលនេះ Ansu Fati ត្រូវ​បន្ត​នៅ​ជាមួយ Barcelona រហូត​ដល់​ចុង​រដូវកាល។ បុគ្គលិក​គ្រូ​បង្វឹក បាន​សម្រេច​ចិត្ត​ថា រឿង​ដ៏​ល្អ​បំផុត គឺ​ជួយ​ដល់​ការ​អភិវឌ្ឍន៍​សមត្ថភាព​របស់​គាត់ និង​ជួយ​គាត់​ឲ្យ​ទទួល​បាន​ទម្រង់​ដ៏​ល្អ​ប្រសើរ​ឡើង​វិញ ដែល​គ្មាន​អ្វី​ជា​ជម្រើស​ល្អ​ជាងនេះ​ឡើយ។

ប្រភព: Dailysports