Cristiano Ronaldo ស្នើរ​ឲ្យ​ក្លឹប Al-Nassr ចុះ​ហត្ថលេខា​លើ​កីឡាករ​មួយ​រូប​របស់​បិសាចក្រហម

តារា​ឆ្នើម Cristiano Ronaldo ត្រូវ​បាន​គេ​រាយការណ៍​ថា បាន​ផ្ដល់​យោបល់​ដល់​ថ្នាក់​លើ​របស់​ក្លឹប Al-Nassr ឲ្យ​ព្យាយាម​ចុះ​ហត្ថលេខា​លើ​ខ្សែបម្រើ Casemiro របស់​ក្លឹប​បិសាចក្រហម Manchester United។ យ៉ាង​ណា​មិញ អ្នក​ទាំង​ពីរ​ជា​អតីត​មិត្ត​រួម​ក្រុម​ដែល​ជោគជ័យ​ជាមួយ​គ្នា​ខ្លាំង​នៅ Real Madrid ក្នុង​អំឡុង​ពាក់​កណ្តាល​ទសវត្សរ៍​ឆ្នាំ 2010។

ពួកគេ​ក៏​បាន​ជួប​ជុំ​គ្នា​ម្ដង​ទៀត​ផង​ដែរ ប៉ុន្តែ​រយៈពេល​ខ្លី​នៅ Man United កាល​ពី​ដើម​រដូវកាល 2022-2023 មុន​ពេល Cristiano Ronaldo ចាកចេញ​ទៅ​លេង​នៅ​ទឹកដី​មជ្ឃឹមបូព៌ា។ ខ្សែប្រយុទ្ធ Cristiano Ronaldo បាន​ចាកចេញ​ពី​បិសាចក្រហម ប៉ុន្តែ Casemiro នៅ​តែ​បន្ត​នៅ Old Trafford បើ​ទោះ​បី​ជា​មិន​ស្ថិត​ក្នុង​ជម្រើស​នៃ​ការ​ប្រើប្រាស់​របស់​គ្រូ​បង្វឹក និង​មាន​ឱកាស​លេង​មិន​ទៀងទាត់​ក្នុង​រយៈពេល 18 ខែ​ចុង​ក្រោយ​នេះ​ក៏​ដោយ។

ឈានចូល​ដល់​វ័យ 33 ឆ្នាំ​ក្នុង​ខែ​កុម្ភៈ ខាង​មុខ ពេល​វេលា​បង្ហាញ​សមត្ថភាព​របស់ Casemiro អាច​នឹង​កាន់​តែ​ថមថយ​ថែម​ទៀត ខណៈ​ដែល​បន្ទាប់​ពី​ការ​​មក​ដល់​របស់​លោក Ruben Amorim គាត់​មាន​ឱកាស​លេង​ក្នុង​ជម្រើស​ដំបូង​ត្រឹមតែ 3 ប្រកួត​ប៉ុណ្ណោះ ក្នុង​ចំណោម 12 ប្រកួត​របស់​ខ្លួន។

ដោយ​ឡែក​សម្រាប់ Cristiano Ronaldo មាន​កុងត្រា​ជាមួយ​នឹង​ក្លឹប Al-Nassr ដល់​ចុង​រដូវកាល​នេះ​ប៉ុណ្ណោះ ហើយ​របាយការណ៍​ពី MARCA បាន​អះអាង​ថា ជាមួយ​នឹង​ហេតុផល​ជិត​ផុត​កុងត្រា កីឡាករ​វ័យ 39 ឆ្នាំ​រូបនេះ​ត្រូវ​បាន​ផ្សារ​ភ្ជាប់​ជាមួយ​នឹង​ការ​ផ្ទេរ​ទៅ​កាន់​លីគ​អាមេរិក MLS។ Cristiano Ronaldo បាន​ស្នើ​ឲ្យ​ក្លឹប​របស់​ខ្លួន​ចុះ​ហត្ថលេខា​លើ Casemiro ជា​មុន​សិន ទើប​​គាត់​ព្រម​ចុះ​ហត្ថលេខា​លើ​ការ​បន្ត​កុងត្រា​ថ្មី​ជាមួយ​ក្លឹប Al-Nassr។

ប្រភព: Sportsmole