Real Madrid ជួប​​ពិភាក្សា​ជាមួយ​អ្នក​តំណាង​របស់ Joshua Kimmich

កុងត្រា​របស់ Joshua Kimmich ជាមួយ​ក្លឹប Bayern Munich នឹង​ត្រូវ​ផុត​កំណត់​នៅ​រដូវក្តៅ​ឆ្នាំ 2025 ហើយ​គិត​មក​ទល់​នឹង​ពេល​នេះ​គាត់​មិន​ទាន់​បាន​សម្រេច​ចិត្ត​បន្ត​កុងត្រា​ថ្មី​នៅ​ឡើយ​ទេ។ ជាមួយ​នឹង​ឱកាស ដែល​ក្លឹប​ផ្សេងៗ​អាច​ចុះ​ហត្ថលេខា​លើ​គាត់​ដោយ​គ្មាន​តម្លៃ​ខ្លួន ក្លឹប Real Madrid ក៏​ជា​​ក្លឹប​ចាប់​អារម្មណ៍​ចង់​ឆក់​យក​ឱកាស​នេះ​ដែរ។

យោង​តាម​ប្រភព​ច្បាស់​ការណ៍​មួយ​ពី​លោក Christian Falk បាន​ឲ្យ​ដឹង​ថា ក្លឹប Real Madrid បាន​ត្រៀម​គម្រោង​ក្នុង​ការ​ចរចា​ជាមួយ​អ្នក​តំណាង​របស់​ខ្សែបម្រើ​សញ្ជាតិ​អាឡឺម៉ង់​រូប​នេះ នា​ពេល​ឆាប់ៗ​ខាង​មុខ។ យ៉ាង​ណា​មិញ Kimmich ត្រូវ​បាន​គេ​ដឹង​ថា នឹង​ចូលរួម​ជាមួយ Real Madrid ប្រសិន​បើ​គាត់​មិន​បន្ត​កុងត្រា​ថ្មី ហើយ​ពិត​ជា​សម្រេច​ចិត្ត​ចាកចេញ​ពី​ក្លឹប​បច្ចុប្បន្ន​របស់​ខ្លួន។

ទោះជា​យ៉ាង​ណា​ក៏ដោយ Joshua Kimmich នៅ​តែ​ចាត់​ទុក​ការ​បន្ត​កុងត្រា​ថ្មី​ជាមួយ Bayern Munich ជា​អាទិភាព​សំខាន់​នៃ​ការ​សម្រេច​ចិត្ត​របស់​គាត់។ កាល​ពី​ពេលថ្មីៗ​កន្លង​ទៅ ក៏​មាន​រឿងរ៉ាវ​នៃ​ការ​ផ្ទេរ Alphonso Davies ទៅ Real Madrid ផង​ដែរ ដែល​​ខ្សែការពារ​ឆ្វេង​រូប​នេះ​ក៏​ជិត​ផុត​កុងត្រា​ដូច​គ្នា ប៉ុន្តែ​គាត់​ប្រហែល​ជា​សម្រេច​ចិត្ត​ទទួល​យក​សំណើរ​ដើម្បី​បន្ត​កុងត្រា​នៅ Bayern Munich បន្ត​ទៀត។

ប្រភព: Dailysports