ប្រធាន​សហព័ន្ធ​បាល់ទាត់​បារាំង​ប្រាប់​ថា Mbappe ធ្លាប់​ចង់​ដើរ​ចេញ​ពី​ក្រុម​ជម្រើសជាតិ

ប្រធាន​សហព័ន្ធ​កីឡា​បាល់ទាត់​បារាំង ហៅកាត់​ថា FFF លោក Noel Le Graet បាន​បង្ហើបថា Kylian Mbappe បាន​ត្រៀម​ខ្លួន​រួច​ជា​ស្រេច​ក្នុង​ការ​ដើរ​ចេញ​ពី​ក្រុម​ជម្រើស​ជាតិ បន្ទាប់​ពី​រូប​គេ​បាន​ទាត់​បាល់ប៉េណាល់ទី​មិន​ចូល​ជាមួយ​ក្រុម​ជម្រើស​ជាតិ​ស្វីស ក្នុង​ព្រឹត្តិការណ៍ Euro 2020 កន្លង​ទៅ។

មួយ​គ្រាប់​ដែល​ខកខាន​ប៉េណាល់ទី​មិន​ចូល​របស់ Kylian Mbappe បាន​ធ្វើ​ឲ្យ​ក្រុម​ជម្រើស​ជាតិ​បារាំង​ធ្លាក់​ចេញ​ពី​ការ​ប្រកួត។

ពេល​នោះ​កីឡាករ​វ័យ 23 ឆ្នាំ​បាន​ក្លាយ​ជា​គោលដៅ​នៃ​ការរិះគន់ និង​កំហឹង​យ៉ាង​ខ្លាំង​ពី​អ្នក​គាំទ្រ ដែល​ស្ទើរ​តែ​ធ្វើ​ឲ្យ​គាត់​សុខ​ចិត្ត​បោះបង់​ការ​លេង​ឲ្យ​ក្រុម​ជម្រើស​ជាតិ​បារាំង។

លោក Le Graet បាន​ប្រាប់​កាសែត Le Journal du Dimanche ថា “ខ្ញុំ​បាន​ជួប​គាត់​បន្ទាប់​ពី Euros គាត់​មាន​អារម្មណ៍​ថា​សហព័ន្ធ​មិន​បាន​ការពារ​គាត់​បន្ទាប់​ពី​រឿង​រ៉ាវ​បាន​កើត​ឡើង និង​ការ​រិះគន់​នៅ​លើ​បណ្តាញ​សង្គម”។

Le Graet បាន​បន្ថែម​ទៀត​ថា “យើង​បាន​ជួប​គ្នា​ប្រាំ​នាទី​នៅ​ក្នុង​ការិយាល័យ​របស់​ខ្ញុំ។ គាត់​​ខឹង គាត់​​មិន​ចង់​លេង​ឲ្យ​ក្រុម​បារាំង​ទៀត​ទេ ដែល​គាត់​ច្បាស់​ជា​មិន​ចង់​បាន​អ្វីៗ​បន្ត​ទៀត​ឡើយ។…”

ដោយ​ឡែក​គិត​មក​ទល់​នឹង​ពេល​នេះ Kylian Mbappe បាន​បង្ហាញ​ខ្លួន​ក្នុង​ការ​ប្រកួត​សរុប 57 ប្រកួត​ហើយ​សម្រាប់​ក្រុម​ជម្រើស​ជាតិ​បារាំង ដោយ​ស៊ុត​បញ្ចូល​ទី​សរុប​បាន 27 គ្រាប់។

ប្រភព: Dailypost