នាយក​ប្រតិបត្តិ​ក្លឹប Inter Milan បញ្ជាក់​ពី​ការ​ចុះ​ហត្ថលេខា​លើ Lukaku និង Paulo Dybala

នាយក​ប្រតិបត្តិ​របស់​ក្លឹប Inter Milan លោក Giuseppe Marotta បាន​បញ្ជាក់​ពី​ការ​ចុះហត្ថ​លេខា​លើ​កីឡាករ Henrikh Mkhitaryan ពីក្លឹប AS Roma និង Andre Onana ពី​ក្លឹប Ajax នៅ​មុន​រដូវកាល 2022/23 នេះ ហើយ​គាត់​ក៏​បាន​និយាយ​ពី​ការ​ព្យាយាម​របស់​ក្លឹប​ដែល​កំពុង​នាំយក Romelu Lukaku និង Paulo Dybala ផងដែរ។

Marotta បាន​ផ្តល់​ការ​អាប់ដេត​ផ្ទេរ​ចុងក្រោយ​លើ Lukaku និង Dybala ដោយ​និយាយ​ថា៖ “យើង​កំពុង​ព្យាយាម​ចុះ​ហត្ថលេខា​លើ Lukaku និង Dybala ហើយ​វា​អាស្រ័យ​លើ​ស្ថានភាព​ហិរញ្ញវត្ថុ​ផងដែរ”។ (នេះ​ជា​សម្រង់​សម្ដី​ដែល​អ្នក​កាសែត​ច្បាស់ការណ៍ Fabrizio Romano បាន​លាត​ត្រដាង នៅ​ក្នុង​បណ្ដាញ​សង្គម​ Twitter នៅ​ថ្ងៃចន្ទ​នេះ)។

គួរ​រំលឹក​ផង​ដែរ​ថា Paulo Dybala បាន​ផុត​កុងត្រា​ជា​មួយ​ក្លឹប Juventus កាល​ពីដើម​ខែ​នេះ និង​សម្រេច​ចិត្ត​ចាកចេញ​ពី​ក្លឹប​ដោយ​មិន​បន្ត​កុងត្រា​ថ្មី​ឡើយ។ គាត់​កំពុង​ក្លាយ​ជា​កីឡាករ​ដែល​គ្មាន​តម្លៃ​ខ្លួន ហើយ​ក៏​ត្រូវ​បាន​ក្លឹប Inter Milan និង​ក្លឹប​ផ្សេងៗ​ជា​ច្រើន​នៅ Premier League ចាប់​អារម្មណ៍​ផង​ដែរ។

ដោយ​ឡែក Romelu Lukaku នៅ​មាន​កុងត្រា​រយៈពេល 4 ឆ្នាំ​ទៀត​ជា​មួយ​ក្លឹប​តោខៀវ Chelsea ប៉ុន្តែ​ខ្សែ​ប្រយុទ្ធ​រូប​នេះ មិន​សប្បាយ​ចិត្ត​ជា​មួយ​ក្លឹប​ឡើយ ហើយ​ក្លឹប​ក៏​ព្យាយាម​ចង់​លក់​គាត់​ចេញ​ដែរ ព្រោះ​ទម្រង់​លេង​របស់ Lukaku ខុស​គ្នា​ឆ្ងាយ​ពី​ពេល​ដែល​គាត់​លេង​នៅ Inter Milan បូក​ផ្សំ​ជា​មួយ​នឹង​របួស​ទៀត​នោះ គាត់​ស៊ុត​បញ្ចូល​ទី​បាន​តែ 8 គ្រាប់​ប៉ុណ្ណោះ​នៅ Premier League រដូវកាល​នេះ។

ប្រភព: Dailypost