មកដឹងខ្លះៗអំពីក្រុមបាល់ទះជម្រើសជាតិកម្ពុជានៅក្នុងលីគបាល់ទះអាស៊ីអាគ្នេយ៍ (SEA V League)

លីគបាល់ទះអាស៊ីអាគ្នេយ៍ (SEA V League) គឺជាការប្រកួតបាល់ទះថ្នាក់តំបន់ដែលរៀបចំឡើងដោយសមាគមបាល់ទះអាស៊ីអាគ្នេយ៍ (Southeast Asian Volleyball Association – SAVA) ដែលជាស្ថាប័នគ្រប់គ្រងកីឡាបាល់ទះក្នុងតំបន់នេះ និងស្ថិតនៅក្រោមសមាគមបាល់ទះអាស៊ី (Asian Volleyball Confederation – AVC)។ លីគនេះត្រូវបានបង្កើតឡើងដើម្បីលើកកម្ពស់កីឡាបាល់ទះនៅក្នុងបណ្តាប្រទេសអាស៊ីអាគ្នេយ៍ និងផ្តល់ឱកាសឱ្យក្រុមជម្រើសជាតិនៃប្រទេសសមាជិកប្រកួតប្រជែងដើម្បីបង្ហាញសមត្ថភាព និងជំរុញការអភិវឌ្ឍកីឡានេះ។

ការប្រកួត SEA V League បានចាប់ផ្តើមជាផ្លូវការនៅឆ្នាំ២០២៣ ដោយមានប្រទេសចំនួន៤ចូលរួម គឺ ឥណ្ឌូនេស៊ី ថៃ វៀតណាម និងហ្វីលីពីន។ លីគនេះត្រូវបានរៀបចំឡើងជាពីរវគ្គ (Legs) ក្នុងមួយឆ្នាំ ដោយក្រុមនីមួយៗប្រកួតប្រជែងដើម្បីពិន្ទុ និងចំណាត់ថ្នាក់។ ក្រុមដែលស្ថិតនៅបាតតារាងអាចប្រឈមនឹងការកាត់ចោលទៅកម្រិត SEA V League Challenge។ នៅឆ្នាំ២០២៥ លីគនេះបានពង្រីកដល់៥ក្រុម ដោយកម្ពុជាបានក្លាយជាក្រុមទី៥ និងជាក្រុមថ្មីបំផុតដែលបានចូលរួម។

ក្រុមបាល់ទះជម្រើសជាតិកម្ពុជាបានបង្ហាញខ្លួនជាលើកដំបូងនៅក្នុង SEA V League ឆ្នាំ២០២៥ បន្ទាប់ពីបានឈ្នះជើងឯកនៅក្នុងការប្រកួត SEA V League Challenge ឆ្នាំ២០២៤។ ការប្រកួត SEA V League ឆ្នាំ២០២៥ បានចាប់ផ្តើមវគ្គទី១នៅទីក្រុង Candon ប្រទេសហ្វីលីពីន ចន្លោះថ្ងៃទី៩ ដល់ថ្ងៃទី១៣ ខែកក្កដា និងវគ្គទី២នឹងធ្វើឡើងនៅទីក្រុងហ្សាកាតា ប្រទេសឥណ្ឌូនេស៊ី ចន្លោះថ្ងៃទី១៦ ដល់ថ្ងៃទី២០ ខែកក្កដា។ កម្ពុជាបានប្រកួតបើកឆាកជាមួយវៀតណាមនៅថ្ងៃទី១០ ខែកក្កដា ឆ្នាំ២០២៥ ប៉ុន្តែបានចាញ់ក្នុងលទ្ធផល ៣-០ បន្ទាប់មក កម្ពុជាក៏បានប្រកួតជាមួយឥណ្ឌូនេស៊ីនៅថ្ងៃទី១១ ខែកក្កដា ហើយចាញ់ ៣-០ ទៀត និង ចុងក្រោយបង្អស់ ប្រកួតជាមួយ ហ្វីលីពីន ចាញ់ក្នុងលទ្ធផល ២-៣ កាលពីថ្ងៃទី ១២ ខែកក្កដា។ ប្រកួតបន្ទាប់ កម្ពុជាត្រូវជួបជាមួយក្រុមថៃ ថ្ងៃទី ១៣ ខែកក្កដា។

មុនពេលចូលរួម SEA V League ក្រុមបាល់ទះជម្រើសជាតិកម្ពុជាបានសម្រេចបាននូវសមិទ្ធផលគួរឱ្យកត់សម្គាល់នៅក្នុងការប្រកួតកីឡាស៊ីហ្គេម។ ពួកគេបានឈ្នះមេដាយសំរឹទ្ធ នៅក្នុងស៊ីហ្គេមឆ្នាំ២០២១ នៅប្រទេសវៀតណាម និងមេដាយប្រាក់នៅក្នុងស៊ីហ្គេមឆ្នាំ២០២៣ ដែលកម្ពុជាធ្វើជាម្ចាស់ផ្ទះ។ សមិទ្ធផលទាំងនេះបានបង្ហាញពីការរីកចម្រើននៃកីឡាបាល់ទះកម្ពុជា និងបានជួយជំរុញទឹកចិត្តក្រុមក្នុងការប្រកួតប្រជែងនៅកម្រិតតំបន់។

ការចូលរួមរបស់កម្ពុជានៅក្នុង SEA V League ឆ្នាំ២០២៥ គឺជាព្រឹត្តិការណ៍ដ៏សំខាន់មួយសម្រាប់កីឡាបាល់ទះកម្ពុជា។ ការឡើងមកប្រកួតនៅកម្រិតនេះបានបង្ហាញពីការប្តេជ្ញាចិត្ត និងសមត្ថភាពរបស់ក្រុមក្នុងការប្រកួតប្រជែងជាមួយក្រុមខ្លាំងៗនៅក្នុងតំបន់។ ទោះបីជាការប្រកួតដំបូងៗមានភាពលំបាកក៏ដោយ កម្ពុជានៅតែមានឱកាសបង្ហាញសមត្ថភាពនៅក្នុងវគ្គទី២ និងការប្រកួតនាពេលអនាគត។