Benfica បានតែងតាំងលោក Jose Mourinho ជាគ្រូបង្វឹករបស់ខ្លួន ជាមួយនឹងកិច្ចសន្យារហូតដល់រដូវកាលក្តៅឆ្នាំ ២០២៧

ក្លឹប Benfica បានតែងតាំងលោក Jose Mourinho ជាគ្រូបង្វឹករបស់ខ្លួន ជាមួយនឹងកិច្ចសន្យារហូតដល់រដូវកាលក្តៅឆ្នាំ ២០២៧។ គ្រូបង្វឹកវ័យ ៦២ ឆ្នាំរូបនេះ ចូលមកជំនួសតំណែងលោក Bruno Lage ដែលត្រូវបានបណ្តេញចេញ បន្ទាប់ពីចាញ់ការប្រកួតដ៏គួរឱ្យភ្ញាក់ផ្អើលក្នុងក្របខណ្ឌ Champions League ទល់នឹងក្រុម Qarabag កាលពីថ្ងៃអង្គារ។

អតីតគ្រូបង្វឹករបស់ក្លឹប Chelsea រូបនេះ វិលត្រឡប់មកកាន់អាជីពជាគ្រូបង្វឹកវិញ មិនដល់មួយខែផង បន្ទាប់ពីត្រូវបានក្លឹប Fenerbahce បញ្ចប់តំណែង ដោយសារចាញ់ក្រុមថ្មីរបស់ខ្លួន Benfica ក្នុងការប្រកួតជម្រុះ Champions League។

លោក Mourinho បានចាប់ផ្តើមអាជីពជាគ្រូបង្វឹកដំបូងជាមួយក្លឹប Benfica កាលពីឆ្នាំ ២០០០ ប៉ុន្តែដឹកនាំបានតែ ១០ ប្រកួតប៉ុណ្ណោះ ហើយបានចាកចេញ បន្ទាប់ពីមានជម្លោះជាមួយប្រធានក្លឹប។

កិច្ចសន្យាថ្មីរបស់លោកនៅ Benfica រួមបញ្ចូលទាំងជម្រើសមួយ ដែលអនុញ្ញាតឱ្យក្លឹបនិងលោក Mourinho អាចសម្រេចចិត្តមិនបន្តរដូវកាលមួយទៀត រហូតដល់ ១០ ថ្ងៃ បន្ទាប់ពីបញ្ចប់យុទ្ធនាការ ២០២៥-២៦។

លោក Lage ត្រូវបានបណ្តេញចេញ ទោះបីជាចាញ់ការប្រកួតតែមួយគត់ក្នុងគ្រប់ពានរង្វាន់ទាំងអស់នៅរដូវកាលនេះក្តី។ លោក Mourinho ត្រូវទទួលតំណែងដឹកនាំក្រុមដែលកំពុងឈរនៅលេខរៀងទី ៦ ក្នុងលីគ Primeira Liga តាមពីក្រោយក្រុម Porto ដែលជាក្រុមនាំមុខ ៥ ពិន្ទុ ប៉ុន្តែនៅសល់មួយប្រកួតក្នុងដៃ។

ការប្រកួតដំបូងរបស់គាត់នៅក្លឹបដែលមានមូលដ្ឋាននៅទីក្រុង Lisbon នេះ គឺនៅថ្ងៃសៅរ៍ វេលាម៉ោង ១៨:០០ BST នៅពេលដែលពួកគេនឹងធ្វើដំណើរទៅជួបក្រុម AVS ដែលឈរនៅលេខរៀងទី ១៧។