មាន់ខ្នាយ​មាស Tottenham ចង់​ខ្ចី​ជើង Lenglet ប៉ុន្តែ Barcelona ចង់​លក់​ផ្ដាច់កុងត្រា

ក្លឹប​មាន់ខ្នាយមាស Tottenham Hotspur បាន​ធ្វើ​ការ​ទាក់​ទង​ទៅ​កាន់​ក្លឹប Barcelona ជុំវិញ​ការ​ចុះហត្ថលេខា​លើ​ខ្សែការពារ Clement Lenglet (នេះ​បើ​យោងតាម​របាយការណ៍​ពី 90min.com)។

ក្លឹប​មាន់ខ្នាយមាស​កំពុង​ស្វែងរក​ខ្សែការពារ​ស្លាប​ឆ្វេង​ម្នាក់​នៅ​រដូវក្តៅ​នេះ ហើយ​ដំបូង​ឡើយ​បាន​កំណត់​គោលដៅ​លើ​ខ្សែការពារ​សញ្ជាតិ​អ៊ីតាលី Alessandro Bastoni ប៉ុន្តែ​ឥឡូវ​នេះ ខ្សែការពារ Bastoni សម្រេច​ចិត្ត​បន្តនៅ Inter Milan។

បន្ត​មក​ទៀត​ក្លឹប​មាន់ខ្នាយ​មាស Tottenham Hotspur បាន​ពិភាក្សា​ជាមួយ Villarreal ជុំវិញ​ការ​ផ្ទេរ​ខ្សែការពារ Pau Torres ប៉ុន្តែ​តម្លៃ​ផ្ទេរ និង​លក្ខខណ្ឌ​មួយ​ចំនួន​ទៀត​ធ្វើ​ឲ្យ​ក្លឹប​មាន់ខ្នាយមាស​បរាជ័យ។ ពេល​នេះ​ពួក​គេ​បាន​ចាប់​អារម្មណ៍​លើ Lenglet វិញ​ម្ដង ហើយ​ការ​ផ្ទេរ​ខ្សែការពារ​សញ្ជាតិ​បារាំង​រូប​នេះ​ប្រហែល​ជា​មាន​ភាគរយ​ខ្ពស់​នឹង​ជោគជ័យ។

កីឡាករ​វ័យ 27 ឆ្នាំ Clement Lenglet បាន​បង្ហាញ​ខ្លួន 160 ប្រកួត​សម្រាប់​ក្លឹប Barcelona គិត​ចាប់តាំង​ពី​ការ​ផ្ទេរ​របស់​គាត់​ពី Sevilla FC កាល​ពី​ឆ្នាំ 2018។ រដូវកាល​ដំបូងៗ​ខ្សែការពារ​រូប​នេះ​មាន​ទម្រង់​លេង​ដ៏​ល្អ និង​លេចធ្លោរ​ខ្លាំង​បំផុត។ ប៉ុន្តែ​មួយ​រយៈ​ចុងក្រោយ​នេះ គាត់​ហាក់​ដូច​ជា​ធ្លាក់​ទម្រង់​លេង​ខ្លាំង និង​បាត់​បង់​ឱកាស​ក្នុង​ការ​បង្ហាញ​ខ្លួន​សម្រាប់​ក្លឹប។ លើស​ពី​នេះ​ទៅ​ទៀត ជា​មួយ​នឹង​វត្ត​មាន​របស់​គ្រូបង្វឹក​ថ្មី​លោក Xavier Hernandez ខ្សែការពារ Lenglet បាន​បង្ហាញ​ខ្លួន​ត្រឹមតែ 7 ដង​ប៉ុណ្ណោះ​នៅ La Liga រដូវកាល​មុន​នេះ។

យ៉ាង​ណា​មិញ​របាយការណ៍​ពី 90min.com បាន​លើក​ឡើង​ថា Tottenham Hotspur ចង់​ដាក់​សំណើរ​ខ្ចី​ជើង Clement Lenglet ប៉ុន្តែ Barcelona ចង់​បាន​ការ​ចរចា​លក់​ផ្ដាច់​កុងត្រា​ជំនួស​វិញ។

Tottenham Hotspur មិនមែន​ជា​ក្លឹប​តែ​មួយ​ដែល​ចង់​បាន​ខ្សែការពារ​បារាំង​រូប​នេះ​ទេ ដោយ​មាន​ក្លឹប Marseille របស់ Ligue 1 និង AC Milan ក៏​កំពុង​តាម​ដាន​ស្ថានភាព​ដែល​អាច​ផ្ទេរ​កីឡាករ​រូប​នេះ​បាន​ផង​ដែរ។

ប្រភព: 90 Min