កីឡាករ 5 រូប​ដែល Sir Alex Ferguson បង្ករ​កំហុស​ក្នុង​ការ​លក់​ចេញ

ក្លឹប​បិសាចក្រហម Manchester United ជា​ក្លឹប​ដ៏​ធំ​បំផុត​មួយ​ក្នុង​ពិភពលោក ហើយ​រជ្ជកាល​ដែល​អ្នក​គាំទ្រ​តែងតែ​ចង​ចាំ​មិន​ភ្លេច​នោះ គឺ​ជា​ពេល​ដែល​លោក Sir Alex Ferguson កាន់​តំណែង​ជា​គ្រូ​បង្វឹក​នៅ Old Trafford។

យុគសម័យ​របស់ Sir Alex Ferguson មាន​កីឡាករ​ដ៏អស្ចារ្យ​ជាច្រើន​ដូចជា Eric Cantona, Cristiano Ronaldo, Ole Gunnar Solskjaer និង Edwin van der Sar។ គ្រូ​បង្វឹក​រូប​នេះ​ត្រូវ​បាន​គេ​គិត​ថា ជា​មនុស្ស​ម្នាក់​ដែល​ពូកែ​ក្នុង​ការ​មើល​កីឡាករ និង​នាំ​យក​កីឡាករ​ចំណូល​ថ្មី​មិន​សូវ​ខុស​ឡើយ។

ទន្ទឹម​នឹង​ចំណុច​ល្អ​នេះ​ដែរ Sir Alex Ferguson ក៏​ធ្លាប់​បាន​បង្ករ​កំហុស​មួយ​ចំនួន​ក្នុង​ការ​លក់​កីឡាករ​ចេញ​ផង​ដែរ។ ខាង​ក្រោម​នេះ ជា​កីឡាករ​ទាំង 5 រូប​ដែល Sir Alex Ferguson ធ្លាប់​បាន​លក់​ចេញ​ខុស។

5. Jaap Stam

Jaap Stam គឺ​ជា​ខ្សែការពារ​ដ៏​ជោគជ័យ​បំផុត​ម្នាក់​នៃ​យុគសម័យ Premier League។ គាត់​គឺ​ជា​ផ្នែក​មួយ​ដ៏​សំខាន់​នៃក្រុម​បិសាចក្រហម។ ក្រោយ​មក Sir Alex Ferguson មាន​ភាព​ល្អក់កករ​ជាមួយ​ខ្សែការពារ​រូប​នេះ។ Stam សម្រេច​ចិត្ត​បាន​ផ្លាស់​ទៅ Lazio ក្នុង​កិច្ច​ព្រមព្រៀង​ផ្ទេរ 16.5 លានផោន ក្នុង​ឆ្នាំ 2001។ បន្ទាប់​មក​គាត់​លេច​ធ្លោរ​យ៉ាងខ្លាំង​នៅ​លីគ​អ៊ីតាលី រហូត​បន្ត​លេង​ឲ្យ​ក្លឹប AC Milan និង​ជួយ​ឲ្យ​ក្លឹប​ឈាន​ដល់​វគ្គ​ផ្តាច់ព្រ័ត្រ UEFA Champions League នៅ​ឆ្នាំ 2005 ទៀត​ផង។

4. Gerard Pique

Gerard Pique គឺ​ជា​ខ្សែការពារ​វ័យក្មេង​ដ៏​លេច​ធ្លោរ​ម្នាក់​នៅ​ក្នុង​ក្របខ័ណ្ឌ Premier League ពេល​ដែល​គាត់​បាន​បង្ហាញ​ខ្លួន​ជា​លើក​ដំបូង​ឲ្យ​បិសាចក្រហមនៅ​ឆ្នាំ 2004។ នៅ​ឆ្នាំ 2008 ក្លឹប​បិសាចក្រហម Manchester United បាន​លក់​គាត់​ឲ្យ​ទៅ Barcelona។ អ្នក​គាំទ្រ​បិសាចក្រហម​បាន​សោក​ស្ដាយ​ចំពោះ​ក្លឹប​ដែល​លក់​ខ្សែការពារ​រូប​នេះ បន្ទាប់​ពីគាត់​មាន​ទម្រង់​លេង​ដ៏​ល្អ​នៅ Barcelona និង​បាន​ជួយ​ក្រុម​ជម្រើស​ជាតិ​អេស្ប៉ាញ​ឲ្យ​ឈ្នះ​ពាន FIFA World Cup ក្នុងឆ្នាំ 2010 និង​ពាន European Championship ក្នុង​ឆ្នាំ 2012។

3. David Beckham

David Beckham ជា​កីឡាករ​របស់​ក្លឹប​បិសាចក្រហម Manchester United តាំង​ពី​អាយុ 16 ឆ្នាំ។ គាត់​បាន​ផ្លាស់​ទៅ​លេង​នៅ Real Madrid ក្នុងឆ្នាំ 2003 បន្ទាប់​ពី​ក្លឹប​បិសាចក្រហម​មិន​ផ្ដល់​ឱកាស​ឲ្យ​គាត់​លេង​បាន​ច្រើន។ ក្រោយ​មក​គាត់​បាន​ទទួល​ជោគជ័យ​បួន​ឆ្នាំ​ជាមួយ Real Madrid ដែល​បាន​ឈ្នះពាន La Liga ក្នុង​ឆ្នាំ 2007។

2. Paul Pogba

Paul Pogba គឺ​ជា​កំហុស​ដ៏​ធំ​មួយ​ដែល​បង្ករ​ឡើង​ដោយ​លោក Sir Alex Ferguson។ Manchester United បាន​លក់​គាត់​ក្នុង​តម្លៃ 80 ម៉ឺនផោន ទៅ​ឲ្យ Juventus ក្នុង​ឆ្នាំ 2012។ ភាព​លេចធ្លោរ​របស់ Paul Pogba នៅ Juventus ធ្វើ​ឲ្យ​គាត់​មាន​តម្លៃ​ខ្លួន​រហូត​ដល់​ជាង 100 លាន​អឺរ៉ូ។

1. Cristiano Ronaldo

វា​ជា​ការ​បាត់បង់​មួយ​ដែល​អ្នក​គាំទ្រ​បិសាចក្រហម​មិន​អាចនឹង​​បំភ្លេច​បាន។ Cristiano Ronaldo បានចាកចេញពី Manchester United ទៅ Real Madrid នៅ​រដូវ​ក្តៅឆ្នាំ 2009 បន្ទាប់ពី​ចំណាយ​ពេល 6 ឆ្នាំ​ដ៏​ជោគជ័យ​នៅ Old Trafford។ Cristiano Ronaldo មាន​ក្តី​សុបិន្ត​ដ៏​ធំ​មួយ​នៅ​ពេល​នោះ ហើយ Sir Alex Ferguson មិន​អាច​បញ្ចុះ​បញ្ចូល​គាត់​ឲ្យ​នៅ​បន្ត​បាន។ ទី​បំផុត Ronaldo បាន​ចូលរួម​ជា​មួយ Real Madrid ក្នុង​តម្លៃ​ផ្ទេរ 90 លានអឺរ៉ូ។ នៅ​ជា​មួយ Real Madrid គាត់​បាន​ក្លាយ​ជា​ខ្សែបម្រើ​ស្លាប​ដ៏​ល្អ​បំផុត​ម្នាក់​នៅ​ក្នុង​ពិភព​បាល់ទាត់។ ពេល​នោះ​ដែរ គាត់​ក៏​បាន​ឈ្នះ​ពានរង្វាន់ Ballon d’Or ជា​លើក​ដំបូង​របស់​ខ្លួន​ទៀត​ផង។

ប្រភព: Sportskeeda