បែកធ្លាយ​វីដេអូ Gabriel Jesus បង្ហាញ​ខ្លួន​នៅ​កីឡដ្ឋាន Emirates ដោយ​ពាក់​អាវ​លេខ 9

មាន​ខ្សែ​វីដេអូ​ខ្លី​មួយ​បង្ហាញ​ពី​ Gabriel Jesus ដែល​គេ​បាន​ឃើញ​គាត់​ពាក់​អាវ​លេខ 9 របស់ Arsenal នៅ​កីឡដ្ឋាន Emirates ខណៈ​ដែល​ក្លឹប​កាំភ្លើងធំ​មិន​ទាន់​បាន​ប្រកាស​ជា​ផ្លូវការណ៍​អំពី​ការ​នាំ​យក​ខ្សែ​ប្រយុទ្ធ​រូប​នេះ​ពី Manchester City នៅ​ឡើយ។

យ៉ាង​ណា​របាយការណ៍​ជា​ច្រើន​បាន​អះអាង​ថា ក្លឹប​កាំភ្លើងធំ Arsenal និង​ក្លឹប Manchester City បាន​បញ្ចប់​ការ​ព្រម​ព្រៀង​គ្នា​រួច​អស់​ហើយ ក្នុង​ផ្ទេរ​ខ្សែ​ប្រយុទ្ធ​សញ្ជាតិ​ប្រេស៊ីល​រូប​នេះ ក្នុង​តម្លៃ 45 លានផោន។

Gabriel Jesus បាន​ក្លាយ​ជា​គោលដៅ​ដំបូង​បំផុត​របស់​លោក Mikel Arteta នៅ​រដូវក្តៅ​នេះ បន្ទាប់​ពី​គ្រូ​បង្វឹក​រូប​នេះ​មើល​ឃើញ​ពី​ចំណុច​ខ្វះខាត​របស់​ក្រុម​នៅ​តំបន់​ប្រយុទ្ធ ជា​ពិសេស​ពួក​គេ​បាន​បាត់បង់​ខ្សែ​ប្រយុទ្ធ​មុតស្រួច​ពីរ​រូប​គឺ Pierre-Emerick Aubameyang និង Alexandre Lacazette។

ទន្ទឹម​នឹង​នោះ​ដែរ Gabriel Jesus នៅ​សល់​កុងត្រា​​មួយ​ឆ្នាំទៀតជាមួយ Manchester City ប៉ុន្តែ​ខ្សែ​ប្រយុទ្ធ​រូប​នេះ​ពិត​ជា​ចង់​ចាកចេញ ដើម្បី​ទទួល​ឱកាស​លេង​ច្រើន​ជាង​មុន។ ប្រសិន​បើ​គាត់​បន្ត​នៅ Manchester City ទៀត​នោះ រដូវកាល​ថ្មី​នេះ គាត់​កាន់​តែ​អស់​ឱកាស​លេង ហើយ​ក្លឹប​ក៏​ទើប​តែ​បាន​នាំ​ខ្សែ​ប្រយុទ្ធ​ចំណូល​ថ្មី Erling Haaland ផង​ដែរ។

Arsenal បាន​យល់​ព្រម​លើ​តម្លៃ​ខ្លួន​ដែល Manchester City ចង់​បាន​កាល​ពី​សប្តាហ៍មុន ហើយ​ Gabriel Jesus បាន​បញ្ចប់​ការ​ពិនិត្យ​សុខភាព​របស់​គាត់​ជាមួយ​នឹង​ក្រុម​កាំភ្លើងធំ ក្នុង​សប្តាហ៍​នេះ។

ខាង​ក្រោម​នេះ ជា​វីដេអូ​បែកធ្លាយ:

ប្រភព: Metro