កីឡាករ 5 រូប​ដែល​មាន​កំណត់ត្រា​គ្រាប់បាល់​ស៊ុតបញ្ចូលទី​ល្អ​បំផុត​សម្រាប់​ឆ្នាំ 2022

នៅ​ក្នុង​ពិភព​បាល់​ទាត់ ពី​មួយ​រដូវកាល​ទៅ​មួយ​រដូវកាល​តែងតែ​មាន​រឿង​ប្លែកៗ​ជា​ច្រើន​កើត​ឡើង។ រដូវកាល​ឆ្នាំ 2021/22 ក៏​ដូច​គ្នា​ដែរ។ ជាមួយ​នឹង​ការ​ប្រកួត​ប្រជែង​ដ៏​ស្វិតស្វាញ​នោះ ក៏​មាន​គ្រាប់បាល់​ស៊ុត​បញ្ចូលទី​ដ៏​អស្ចារ្យ​ជា​ច្រើន​កើត​ឡើង​ផង​ដែរ។

មាន​ក្រុម​ចំនួន 4 នៅ​ទូទាំង​លីគ​កំពូល​ទាំង 5 របស់​ទ្វីបអឺរ៉ុប​រក​បាន​គ្រាប់​បាល់​ស៊ុត​បញ្ចូល​ទី​ច្រើន​ជាង 90 គ្រាប់។ Manchester City និង Liverpool ជា​អធិរាជ​ប្រចាំ​នៅ Premier League ដែល​មាន​គ្រាប់​បាល់​ស៊ុតបញ្ចូលទី​សរុប​រហូត​ដល់ 99 គ្រាប់ និង 94 គ្រាប់។ ដោយ​ឡែក Bayern Munich មាន​គ្រាប់​បាល់​សរុប 97 គ្រាប់ ហើយ Paris Saint-Germain ស៊ុតបាន​គ្រាប់​សរុប 90 នៅ Ligue 1។

ទន្ទឹម​នឹង​គ្រាប់​បាល់​ដ៏​ច្រើន​សម្រាប់​ក្លឹប​នីមួយៗ​នេះ​ដែរ យើង​ចោល​ភ្នែក​ក្រឡែក​មក​មើល​កំពូល​ខ្សែ​ប្រយុទ្ធ​ទាំង 5 រូប ដែល​មាន​ស្ថិតិ​ល្អ​បំផុត ក្នុង​ការ​រក​គ្រាប់​បាល់ ប្រចាំ​ឆ្នាំ 2022 នេះ។

5. Ciro Immobile (កីឡាករ​របស់​ក្លឹប Lazio)

ខ្សែ​ប្រយុទ្ធ​សញ្ជាតិ​អ៊ីតាលី​រូប​នេះ​បាន​ក្លាយ​ជា​កីឡាករ​ម្នាក់​ក្នុង​ចំណោម​កីឡាករ​ដែល​មាន​ទម្រង់​លេង​ស៊ីសង្វាក់​គ្នា​បំផុត​ក្នុង​ក្របខ័ណ្ឌ Serie A អស់​រយៈពេល​ប៉ុន្មាន​ឆ្នាំ​កន្លង​មក​នេះ។ ក្នុងឆ្នាំ 2022 នេះ​ខ្សែប្រយុទ្ធ Ciro Immobile មាន​ស្ថិតិ​ស៊ុត​បញ្ចូល​ទី​ជាមធ្យម 0.84 គ្រាប់​ក្នុង​មួយ​ប្រកួត។

4. Darwin Nunez (អតីត​កីឡាករ​របស់ Benfica/ បច្ចុប្បន្ន​ផ្ទេរ​មក Liverpool)

Darwin Nunez គឺ​ជា​កីឡាករ​ម្នាក់​ក្នុង​ចំណោម​កីឡាករ​ Liverpool ហ៊ាន​ចំណាយ​លុយ​ទិញ​រហូត​ដល់ 85 លានផោន។ ខ្សែប្រយុទ្ធ​វ័យ 23 ឆ្នាំ​រូបនេះ​មាន​ស្ថិតិ​ស៊ុត​បញ្ចូល​ទី​ជាមធ្យម 0.84 គ្រាប់​ក្នុង​មួយ​ប្រកួត​នៅ​ឆ្នាំ 2022 នេះ។

3. Robert Lewandowski (កីឡាករ​របស់​ក្លឹប Bayern Munich)

Robert Lewandowski គឺ​ជា​ខ្សែប្រយុទ្ធ​សញ្ជាតិ​ប៉ូឡូញ ដែល​ស៊ុត​បញ្ចូលទី​បាន 50 គ្រាប់ នៅ​គ្រប់​ការ​ប្រកួត​ទាំង​អស់​កាល​ពី​រដូវកាល​មុន។ ហើយ​រដូវកាល​នេះ គាត់​នៅ​តែ​បង្ហាញ​ភាព​លេចធ្លោរ​ដដែល ក្នុង​នាម​ជា​ខ្សែ​ប្រយុទ្ធ​កណ្ដាល​ដ៏​មាន​គុណភាព។ ខ្សែប្រយុទ្ធ Bayern Munich រូប​នេះ​មាន​ស្ថិតិ​គ្រាប់​បាល់​ជាមធ្យម 0.95 គ្រាប់​ក្នុង​មួយ​ប្រកួត។

2. Karim Benzema (កីឡាករ​របស់​ក្លឹប Real Madrid)

គ្មាន​អ្វី​គួរ​ឲ្យ​សង្ស័យ​ទេ​ថា Karim Benzema មាន​ឥទ្ធិពល​យ៉ាង​ណា​សម្រាប់ Real Madrid កាល​ពី​រដូវកាល​មុន​នេះ។ គាត់​បាន​ជួយ​ក្លឹប​ឲ្យ​ឈ្នះ​​ពាន La Liga និង UEFA Champions League។ ក្នុងឆ្នាំ 2022 នេះ Benzema មាន​ស្ថិតិ​គ្រាប់​បាល់​ជា​មធ្យម​គឺ 1.04 គ្រាប់​ក្នុង​មួយ​ប្រកួត។

1. Kylian Mbappe (កីឡាករ​របស់​ក្លឹប PSG)

Kylian Mbappe ទើប​តែ​នឹង​ចុះកុងត្រា​ថ្មី​ជាមួយ Paris Saint-Germain រហូត​ដល់​ឆ្នាំ 2025។ ខ្សែ​ប្រយុទ្ធ​រូប​នេះ បាន​រួម​ចំណែក​យ៉ាង​សំខាន់​សម្រាប់​ក្លឹប​របស់​ខ្លួន​កាល​ពី​រដូវកាល​មុន។ គាត់​មាន​ស្ថិតិ​គ្រាប់​បាល់​ជា​មធ្យម 1.09 គ្រាប់​ក្នុង​មួយប្រកួត។

ប្រភព: Sportskeeda