Bernardo Silva ចង់​​មក Barcelona ប៉ុន្តែ Man City ដាក់​តម្លៃ​ផ្ទេរ 100 លានអឺរ៉ូ

របាយការណ៍​ចុងក្រោយ​មួយ​បាន​ឲ្យ​ដឹង​ថា ខ្សែបម្រើ Bernardo Silva របស់​ក្លឹប Manchester City គ្រោង​នឹង​ចាកចេញ​ទៅ​ចូល​រួម​ជា​មួយ Barcelona នៅ​រដូវក្ដៅ​នេះ បើ​ទោះ​បី​ជា​គាត់​នៅ​មាន​ឱកាស​បង្ហាញ​ខ្លួន​ក្នុង​ការ​ប្រកួត​សំខាន់ៗ​សម្រាប់​ក្លឹប Manchester City ក៏​ដោយ។

ខ្សែបម្រើ​ប្រយុទ្ធ​សញ្ជាតិ​ព័រទុយហ្គាល់ Bernardo Silva ក៏​ស្ថិត​ក្នុង​ការ​ចង់​បាន​របស់​ក្លឹប​អ្នក​មាន​បុណ្យ Barcelona ដែរ ប៉ុន្តែ​ចំពោះ​ការ​ផ្ដល់​ជូន​របស់​ក្លឹប Barcelona ដែល​កំពុង​តែ​មាន​វិបត្តិ​ហិរញ្ញវត្ថុ​នោះ ប្រហែល​ជា​មិន​គាប់​ប្រសើរ​ដូច​ក្រុម​អ្នក​មាន Manchester City ឡើយ។

កីឡាករ​វ័យ 27 ឆ្នាំ​រូបនេះ គឺ​ជា​ផ្នែក​មួយ​ដ៏​សំខាន់​របស់​ក្លឹប Manchester City ដោយ​គាត់​បាន​ស៊ុតបញ្ចូលទី​បាន 13 គ្រាប់ ក្នុង​ការ​បង្ហាញ​ខ្លួន 50 លើក​សម្រាប់​ក្លឹប ក្នុង​ការ​ប្រកួត​គ្រប់​ក្របខណ្ឌ​ទាំង​អស់​កាល​ពី​រដូវកាល​មុន និង​បានជាប់​ឈ្មោះ​ជាកីឡាករ​ល្អ​បំផុត​ទាំង 11 នាក់ ប្រចាំ​ឆ្នាំ​របស់ PFA Premier League។

ក្លឹប Barcelona ចង់​បាន Bernardo Silva សម្រាប់​ជា​អ្នក​ជំនួស​តំណែង​របស់ Frenkie de Jong ដែល​អាច​នឹង​ផ្លាស់​ទៅ Manchester United នៅ​រដូវក្តៅ​នេះ។ សារ​ព័ត៌មាន Sports បាន​រាយការណ៍​ថា Silva បានបញ្ជាក់​ប្រាប់​ទៅ​កាន់​ភ្នាក់ងារ​របស់​គាត់​លោក Jorge Mendes ថា គាត់​ចង់​ចូលរួម​ជាមួយ Barcelona។

ទោះ​បី​ជា​យ៉ាង​ណា​ក៏ដោយ បច្ចុប្បន្ន Silva កំពុង​នៅ​មាន​កុងត្រា​ជាមួយ Man City រហូត​ដល់​ឆ្នាំ 2025 ហើយ​គ្រូ​បង្វឹក​លោក Pep Guardiola ចង់​រក្សា​ទុក​ខ្សែបម្រើ​រូបនេះ។ ក្លឹប Manchester City បាន​​ដាក់​តម្លៃ​ផ្ទេរ 100 លាន​អឺរ៉ូ សម្រាប់​ក្លឹប​ណា​ដែល​ចង់​បាន Silva។ តម្លៃ​នេះ ប្រហែល​ជា Barcelona នឹង​គ្មាន​លទ្ធភាព​ដើម្បី​ចំណាយ​នោះ​ទេ។

ប្រភព: Dailypost