ខ្លះៗ​ដែល​អ្នក​គួរ​ដឹង​ពី​លោក Christophe Galtier គ្រូ​បង្វឹក​ថ្មី​របស់​ក្លឹប PSG

នៅ​ក្នុង​ថ្ងៃ​តែ​មួយ​ជា​មួយ​នឹង​ការ​ប្រកាស​ចែក​ផ្លូវគ្នា​ជា​មួយ​អតីតគ្រូ​បង្វឹក​លោក Mauricio Pochettino ក្លឹប​យក្ស​បារាំង Paris Saint-Germain បាន​ប្រកាស​ពី​បេក្ខភាព​គ្រូ​បង្វឹក​ថ្មី​របស់​ក្លឹប គឺ​លោក Christophe Galtier ដែល​ជា​គ្រូ​បង្វឹក​របស់​ក្លឹប Nice កាល​ពី​រដូវកាល​មុន។

តើ Christophe Galtier ជា​អ្នក​ណា?

កាល​នៅ​ជា​កីឡាករ លោក Galtier គឺ​លេង​ក្នុង​តំណែង​ជា​ខ្សែការពារ​ចន្លោះ​ឆ្នាំ 1985 ដល់ឆ្នាំ 1999 ហើយ​ក្លឹប​ដែល​គាត់​ធ្លាប់​លេង​ជាមួយ​មាន​ដូច​ជា៖ Marseille, Lille, Toulouse, Angers, Nimes, Monza និង Liaoning។ គាត់​មិន​ធ្លាប់​ឈ្នះពាន​អ្វី​គួរ​ឲ្យ​កត់​សម្គាល់​ឡើយ កាល​នៅ​ជា​កីឡាករ។

Christophe Galtier មិន​បាន​ចំណាយ​ពេល​វេលា​ឲ្យ​ទំនេរ​យូរ​ឡើយ ពោល​គឺ​នៅ​ពេល​ឈប់​លេង​បាល់​ភ្លាម គាត់​បាន​ចាប់ផ្តើម​អាជីព​ជា​គ្រូបង្វឹក​តែ​ម្ដង ហើយ​បាន​ក្លាយ​ជា​គ្រូ​បង្វឹក​របស់​ក្លឹប Marseille នៅ​ឆ្នាំ 1999 ដែល​នេះ​ជា​អាជីព​គ្រូ​បង្វឹក​ដំបូង​របស់​គាត់។

ជាគ្រូ​បង្វឹក​មួយ​រូប​ដែល​ក្លឹប Lille ចងចាំ​មិន​ភ្លេច

នៅថ្ងៃទី 22 ខែធ្នូ ឆ្នាំ 2017 លោក Galtier បាន​ក្លាយជា​គ្រូ​បង្វឹក​ថ្មី​របស់​ក្លឹប Lille ដែល​ពេល​នោះ Lille ស្ថិត​នៅ​ចំណាត់​ថ្នាក់ទី 18 ក្នុង​លីគ។ ទីបំផុត​នៅ​ពេល​ចប់​រដូវកាល 2017-18 ពួក​គេ​បាន​គេច​ផុត​ពី​តំបន់​កាត់​ចោល។ រដូវកាល​បន្ទាប់​ឆ្នាំ 2018-19 គាត់​បាន​បន្ត​ដឹកនាំ Lille ឲ្យ​បញ្ចប់​ចំណាត់​ថ្នាក់​លេខ​ពីរ​ក្នុង​លីគ និង​មាន​កៅអីលេង UEFA Champions League ជា​លើក​ដំបូង ក្រោយ​ខកខាន​​លេង​ពាន​នេះ​អស់​រយៈពេល​ប្រាំពីរ​ឆ្នាំ។

លើស​ពី​នេះ​ទៅ​ទៀត Galtier បាន​ដឹក​នាំ Lille ឲ្យ​ឈ្នះ​ជើង​ឯក Ligue 1 នៅ​ឆ្នាំ 2021។ យ៉ាង​ណា​រដូវកាល​បន្ទាប់​នៅ​ថ្ងៃទី 28 ខែ​មិថុនា ឆ្នាំ 2021 គ្រូ​បង្វឹក​រូប​នេះ បាន​ចូល​កាន់​តំណែង​នៅ​ក្លឹប​ថ្មី Nice។

មិន​ធ្លាប់​ឈ្នះការ​ប្រកួត​សូម្បី​តែ​ម្ដង​នៅ UEFA Champions League

គ្រូ​បង្វឹក​រូប​នេះ មាន​ប្រវត្តិ​មិន​សូវ​ល្អ​ឡើយ​ជាមួយ​នឹង​ពាន UEFA Champions League។ លោក Christophe Galtier មិន​ដែល​ឈ្នះ​ការ​ប្រកួត​ក្នុង​ក្របខណ្ឌ UCL សូម្បី​តែ​មួយ​​ប្រកួត​ក្នុង​អាជីព​ជាគ្រូ​បង្វឹក​របស់​គាត់។ គាត់​ធ្លាប់​ដឹកនាំក្រុម​បាន​តែ 6 ប្រកួត​ប៉ុណ្ណោះ​នៅ UCL ដោយ​ពេល​នោះ​នៅ​រដូវកាល​ចុងក្រោយ​របស់​គាត់នៅ Lille ជា​មួយ​នឹង​លទ្ធផល​ចាញ់ 5 និងស្មើ 1។

ប្រភព: Si.com