Connect with us

បាល់ទាត់អន្តរជាតិ

កីឡាករ 5 រូប​ដែល Barcelona ធ្លាប់​ចំណាយ​លុយ​ទិញ​ខុស!!!

Published

on

មុន​ពេល​ដែល Barcelona បាត់បង់​កីឡា​ឆ្នើមៗ និង​មាន​បញ្ហាញ​ផ្នែក​ហិរញ្ញវត្ថុនានា កាល​ពី​ប៉ុន្មាន​ឆ្នាំ​ចុងក្រោយ​នេះ យើង​សង្កេត​ឃើញ​ពី​ភាព​ខ្ជះខ្ជាយ​របស់​ក្លឹប ក្នុង​ការ​ចុះ​ហត្ថលេខា​លើ​កីឡាករ​ដែល​មាន​តម្លៃ​ថ្លៃៗ ហើយ​ពេល​ពួក​គេ​មក​ដល់ Barcelona ទម្រង់​លេង​ហាក់​ដូច​ជា​មាន​ភាព​ប្រែប្រួល​ខុស​គ្នា​ខ្លាំង​កាល​ពី​នៅ​ក្លឹប​ចាស់ ហើយ​ធ្វើ​ឲ្យ​តម្លៃ​ខ្លួន​របស់​ពួក​គេ​ធ្លាក់​ចុះ។

ថ្វី​ត្បិត​តែ Barcelona ជា​ក្លឹប​ធំ រឺ​អាច​និយាយ​បាន​ថា ជា​អធិរាជ​នៅ​អេស្ប៉ាញ​ក៏​ដោយ ប៉ុន្តែ​ក្លឹប​មួយ​នេះ​មិន​ពូកែ​ក្នុង​ការ​ចាយលុយ​ទិញ​កីឡាករ​ប៉ុន្មាន​ឡើយ។ ខាង​ក្រោម​នេះ យើង​នឹង​បង្ហាញ​ជូន​អ្នក​ទាំងអស់​គ្នា​នូវ​កីឡាករ 5 រូប​ដែល Barcelona ធ្លាប់​ចាយលុយ​ទិញ​ខុស។

1. ចុះ​ហត្ថលេខា​លើ Philippe Coutinho – តម្លៃ​ផ្ទេរ 121 លានអឺរ៉ូ

ខ្សែ​ប្រយុទ្ធ​ស្លាប​សញ្ជាតិ​ប្រេស៊ីល​រូប​នេះ Barcelona បាន​ចំណាយ​លុយ​ដ៏​ច្រើន ដើម្បី​នាំ​យក​គាត់​មក​ពី Liverpool កាល​ពី​ឆ្នាំ 2018។ ការ​លេង​ជា​មួយ Barcelona កីឡាករ Philippe Coutinho ធ្វើ​មិន​បាន​ល្អ​ដូច​គាត់​នៅ Liverpool ឡើយ រហូត​ដល់​ធ្វើ​ឲ្យ​ក្លឹប​សម្រេច​ចិត្ត​ដាក់​គាត់​ឲ្យ​ខ្ចីជើង​ទៅ Bayern Munich រដូវកាល​ឆ្នាំ 2019-2020។ បច្ចុប្បន្ន​នេះ Philippe Coutinho បាន​ផ្ទេរ​ទៅ​អង់គ្លេស​វិញ ក្នុង​តម្លៃ​ផ្ទេរ​ត្រឹមតែ 20 លាន​អឺរ៉ូ​ប៉ុណ្ណោះ ដោយ​ចូលរួម​ជា​មួយ Aston Villa។

2. ចុះ​ហត្ថលេខា​លើ Ousmane Dembele – តម្លៃ​ផ្ទេរ 105 លានអឺរ៉ូ

ខ្សែ​ប្រយុទ្ធ​ល្បឿន​លឿន​រូប​នេះ ត្រូវ​បាន Barcelona នាំ​យក​មក​ពី​ក្លឹប​អាឡឺម៉ង់ Borussia Dortmund កាល​ពី​ឆ្នាំ 2017។ ក្លឹប Barcelona រំពឹង​ទុក​ថា Dembele នឹង​មក​ជំនួស​តំណែង​របស់ Neymar បាន។ ប៉ុន្តែ​ការ​រំពឹង​ទុក​មិន​បាន​សម្រេច​ឡើយ ព្រោះ​ខ្សែ​ប្រយុទ្ធ​សញ្ជាតិ​បារាំង​រូប​នេះ មាន​របួស​ដ៏​រុំាំរ៉ៃ ហើយ​ទើប​តែ​មាន​ទម្រង់​លេង​ប្រសើរ​ឡើង នៅ​មួយ​រដូវកាល​ចុង​ក្រោយ​ឆ្នាំ 2021-2022 នេះ​ប៉ុណ្ណោះ។ តម្លៃ​ខ្លួន​របស់ Dembele ធ្លាប់​ពី 105 លានអឺរ៉ូ មក​នៅ​ត្រឹម​តែ 50 រឺ 40 លានអឺរ៉ូ​ប៉ុណ្ណោះ ហើយ​បច្ចុប្បន្ន​នេះ គាត់​គឺ​ជា​កីឡាករ​ដែល​គ្មាន​តម្លៃ​ខ្លួន​បន្ទាប់​ពី​ផុត​កុងត្រា​ជា​មួយ​ក្លឹប Barcelona។

3. ចុះ​ហត្ថលេខា​លើ Andre Gomes – តម្លៃ​ផ្ទេរ 35 លានអឺរ៉ូ

ខ្សែ​បម្រើ​រូប​នេះ បាន​ផ្ទេរ​មក​ពី Valencia កាល​ពី​ឆ្នាំ 2016។ នៅ​ពេល​ដែល Barcelona ទិញ Andre Gomes មក​ក្នុង​តម្លៃ 35 លានអឺរ៉ូ​នោះ ក្លឹប​របស់​ពួកគេ​កំពុង​មាន​ខ្សែបម្រើ​ឆ្នើមៗ​រួច​ទៅ​ហើយ​ដែល​មាន​ដូច​ជា Ivan Rakitic, Sergio Busquets និង Andres Iniesta។ នេះ​បង្ហាញ​ឲ្យ​ឃើញ​ពី​ការ​ចំណាយ​ដ៏​ខ្ជះខ្ជាយ​របស់​ក្លឹប។ ទម្រង់​លេង​របស់ Gomes មិន​លេច​ធ្លោរ​ខ្លាំង​ឡើយ ហើយ​ក្រោយ​មក​នៅ​ឆ្នាំ 2019 ក្លឹប Barcelona បាន​ឲ្យ​គាត់​ខ្ជី​ជើង​ទៅ Everton និង​បាន​លក់​ផ្ដាច់​កុងត្រា​នៅ​ឆ្នាំ​បន្ទាប់។

4. ចុះ​ហត្ថលេខា​លើ Malcom – តម្លៃ​ផ្ទេរ 41 លានអឺរ៉ូ

ខ្សែ​ប្រយុទ្ធ​ស្លាប​សញ្ជាតិ​ប្រេស៊ីល Malcom បាន​ផ្លាស់​ទៅ Barcelona នៅ​រដូវក្តៅ​ឆ្នាំ 2018 បន្ទាប់​ពី Barcelona មើល​ឃើញ​គាត់​មាន​ទម្រង់​លេង​លេចធ្លោរ​ខ្លាំងនៅ Ligue 1 ជាមួយ​ក្លឹប Bordeaux។ ប៉ុន្តែ​ការ​លេង​ឲ្យ Bordeaux និង Barcelona គឺ​មានភាព​​ខុសគ្នា​ឆ្ងាយ​ណាស់។ គាត់​មាន​ទម្រង់​លេង​ធ្លាក់​ចុះ​ជា​ខ្លាំង ហើយ​ធ្វើ​ឲ្យ​ក្លឹប​សម្រេច​ចិត្ត​លក់​គាត់​ទៅ​ឲ្យ Zenit S-Pb នៅ​ឆ្នាំ 2019 ក្នុង​តម្លៃ​ផ្ទេរ 40 លានអឺរ៉ូ។

5. ចុះ​ហត្ថលេខា Zlatan Ibrahimovic – តម្លៃ​ផ្ទេរ 68 លានអឺរ៉ូ + Samuel Eto’o

វា​ជា​រឿង​ដ៏​អាក្រក់​បំផុត​មួយ​របស់​ក្លឹប Barcelona នៅ​ក្នុង​ការ​ចុះ​ហត្ថលេខា​លើ Zlatan Ibrahimovic កាល​ពី​ឆ្នាំ 2009។ ក្លឹប Barcelona បាន​ចំណាយ​ប្រាក់​រហូត​ដល់ 68 លានអឺរ៉ូ បូករួម​ទាំង Samuel Eto’o ម្នាក់ទៀត ដើម្បី​យក Zlatan Ibrahimovic។ ទោះបី​ជា​កំណត់ត្រា​ស៊ុត​បញ្ចូល​ទី​របស់ Zlatan គឺ​ល្អ ដោយ​មាន 21 គ្រាប់ ក្នុង​ការ​បង្ហាញ​ខ្លួន 45 ប្រកួត ប៉ុន្តែ​គាត់​មិន​មាន​អារម្មណ៍​លេង​ឲ្យ​ក្លឹប​បាន​យូរ​ឡើយ ហើយ​បាន​ចាកចេញ​ទៅ AC Milan នៅ​ឆ្នាំ​បន្ទាប់។

ប្រភព: Footballtransfers

Trending

© រក្សា​សិទ្ធិ​គ្រប់​យ៉ាង​ដោយ​ X-SPORT ឆ្នាំ​ ២០២២