ប្រធាន​ក្លឹប Brighton លើក​ឡើង​ថា Manchester City មិន​បាន​ដេញ​ថ្លៃ​លើ Cucurella នោះ​ទេ!!!

ម្ចាស់ក្លឹប Brighton និង​ជាប្រធាន​ក្លឹប​លោក Tony Bloom បាន​បង្ហើប​ថា ក្លឹប​របស់​លោក​មិន​បាន​ទទួល​ការ​ដេញថ្លៃ​ណាមួយ​ពី​ក្លឹប​មេឃខៀវ Manchester City សម្រាប់​ការ​ផ្ទេរ​ខ្សែការពារ Marc Cucurella ដូច​ដែល​សារពត៌មាន​បាន​ចុះ​ផ្សាយ​កន្លង​មក​នោះ​ឡើយ។

ដោយ​ឡែក​កីឡាករ​សញ្ជាតិ​អេស្ប៉ាញ Marc Cucurella បាន​ចូលរួម​ជាមួយ​ក្លឹប Brighton ដោយ​ផ្ទេរ​ពី​ក្លឹប Getafe កាល​ពី​រដូវ​ក្តៅ​ឆ្នាំ​មុន។ ទោះ​គាត់​ជា​កីឡាករ​ចំណូល​ថ្មី​របស់​ក្លឹប​ពិត​មែន ប៉ុន្តែ Cucurella បាន​បង្ហាញ​ខ្លួន​រហូត​ដល់ 35 ប្រកួត​ក្នុង​ក្របខ័ណ្ឌ Premier League កាល​ពី​រដូវកាល​មុន និង​បាន​ជួយ​ក្រុម​របស់​ខ្លួន​ឲ្យ​បញ្ចប់​រដូវកាល​ជាមួយ​នឹង​ចំណាត់​ថ្នាក់​លេខ 9 ក្នុង​លីគ ដែល​នេះ​ជា​ចំណាត់​ថ្នាក់​ល្អ​បំផុត​មិន​ធ្លាប់​មាន​ក្នុង​ប្រវត្តិសាស្ត្រ​របស់​ក្លឹប Brighton។

ទម្រង់​លេង​ដ៏​លេច​ធ្លោរ​របស់​ខ្សែការពារ​ស្លាប​សញ្ជាតិ​អេស្ប៉ាញ បាន​ធ្វើ​ឲ្យ​មាន​ពាក្យ​ចចាម​អារ៉ាម​ជា​ច្រើន​លើក​ឡើង​ថា ក្លឹប Manchester City កំពុង​ដំណើរ​ការ​លើ​កិច្ច​ព្រមព្រៀង​ផ្ទេរ Cucurella ខណៈ​ដែល​លោក Pep Guardiola ក៏​បាន​ពេញ​ចិត្ត​នឹងខ្សែការពារ​រូប​នេះ​ផង​ដែរ។

ទោះ​បី​ជា​យ៉ាង​ណា​ក៏​ដោយ​លោក Bloom ដែល​ជា​ប្រធាន​ក្លឹប Brighton បាន​បង្ហាញ​ឲ្យ​ដឹង​ថា ក្លឹប Manchester City មិន​ទាន់​មាន​ការ​ដេញ​ថ្លៃ​ជា​ផ្លូវការណ៍​ណាមួយ​សម្រាប់​ខ្សែ​ការពារ​របស់​ពួក​គេ​នៅ​ឡើយ​ទេ។

លោក Tony Bloom បាន​និយាយ​ប្រាប់​វិទ្យុ BBC Radio Sussex ថា៖ “Cucurella ធ្លាប់​បង្ហើប​ថា គាត់​ពិត​ជា​ពិបាក​នឹង​បដិសេធ​ការ​ផ្ទេរ​ទៅ Manchester City ប្រសិន​បើ​មាន​ឱកាស​មួយ​កើត​ឡើង​មែន។ Manchester City ជា​ក្រុម​ដែល​អ្នក​មិន​អាច​និយាយ​ឆ្លើយ​ថា​ទេ​បាន។ និយាយ​ដោយ​ស្មោះ លោក Pep Guardiola មិន​​បាន​​ខលទូរស័ព្ទ​​មក​​ទេ ប្រាកដ​​ណាស់ គ្រប់យ៉ាង​មាន​តែ​​ពាក្យ​ចចាម​អារ៉ាម​ប៉ុណ្ណោះ”។

ប្រភព: 90 Min