Arsenal ត្រៀម​ខ្លួន​រួច​ជា​ស្រេច ក្នុង​ការ​ចុះ​ហត្ថលេខា​លើ Kante ប្រសិន​បើ Chelsea លែង​ត្រូវការ​គេ​ហើយ

ក្លឹប​កាំភ្លើងធំ Arsenal កំពុង​ពិចារណា​សម្រាប់​ការ​ចុះ​ហត្ថលេខា​លើ​ខ្សែបម្រើ N’Golo Kante បន្ទាប់​ពី​ពួក​គេ​បាន​លឺ​ដំណឹង​ថា ក្លឹប​តោខៀវ Chelsea ចង់​លក់​ខ្សែ​បម្រើ​រូប​នេះ​ចេញ នៅ​រដូវក្ដៅ​នេះ។

ខ្សែ​បម្រើ​សញ្ជាតិ​បារាំង N’Golo Kante គឺ​ជា​មនុស្ស​ម្នាក់​ដ៏​សំខាន់​ក្នុង​ក្រុម​របស់​លោក Thomas Tuchel។ ប៉ុន្តែ​គាត់​នៅ​សល់​កុងត្រា​ជា​មួយ​ក្លឹប​តែ 12 ខែ​ទៀត​ប៉ុណ្ណោះ​លើ​កិច្ចព្រមព្រៀង​បច្ចុប្បន្ន​របស់​គាត់។ Kante ក៏​ជា​កីឡាករ​ដែល​មាន​ប្រាក់​ខែ​​ច្រើន​ជាង​គេ​របស់​ក្លឹប​ផង​ដែរ តែ​មួយ​រយៈចុងក្រោយ​នេះ គាត់​ទទួល​រង​នូវ​បញ្ហា​របួស​ជា​ញឹកញាប់។

ដោយ​ឡែក​លោក Mikel Arteta នៅ​តែ​សម្លឹង​មើល​ឃើញ​ថា ខ្សែបម្រើ​របស់​ក្លឹប​តោខៀវ​រូប​នេះ ជា​កីឡាករ​ដែល​មាន​គុណភាព​បំផុត​សម្រាប់​ក្រុម។ ក្លឹប​កាំភ្លើងធំ Arsenal បានត្រៀម​ខ្លួន​រួច​ជាស្រេច ដើម្បី​ចាំ​ទទួល​យក Kante ប្រសិន​បើ​ក្លឹបតោខៀវ​ចង់​បញ្ចេញ​កីឡាករ​រូប​នេះ។ លើស​ពី​នេះ​ទៅ​ទៀត ក្លឹប​បិសាចក្រហម Manchester United ក៏​ត្រូវ​បាន​គេ​រាយការណ៍​ថា កំពុង​​សម្លឹង​មើល​ខ្សែ​បម្រើ​ជើង​ចាស់​រូប​នេះ​ដែរ។ ប៉ុន្តែ​ពួក​គេ​រងចាំ​មើល​ស្ថានភាព​ផ្ទេរ Frenkie de Jong របស់ Barcelona សិន ដែល​ជា​អាទិភាព​ទីមួយ។

បច្ចុប្បន្ន Kante មាន​អាយុ 31 ឆ្នាំ គឺ​ជា​ខ្សែ​បម្រើ​ដែល​មាន​បទ​ពិសោធន៍​ជោគជាំ​បំផុត ជា​មួយ​នឹង​ការ​ប្រកួត​គ្រប់​បែប​យ៉ាង ទាំង​ជា​មួយ​ក្លឹប និង​ជា​មួយ​ក្រុម​ជម្រើស​ជាតិ​បារាំង ហើយ​មក​ទល់​នឹង​ពេល​នេះ​គាត់​ធ្លាប់​បង្ហាញ​ខ្លួន​ក្នុង​ការ​ប្រកួត​សរុប​ច្រើន​ជាង 400 ដង​ឯណោះ។ N’Golo Kante ធ្លាប់​ឈ្នះពាន Premier League ជាមួយ Chelsea ក្នុងឆ្នាំ 2017 និង​ជាមួយ Leicester ក្នុងឆ្នាំ 2016។

ប្រភព: Dailystar