ក្លឹប​ធំៗ​ទាំង 5 ដែល​មិន​ធ្លាប់​ស្គាល់​រសជាតិ​ឈ្នះពាន UCL សូម្បី​តែ​ម្ដង!!!

UEFA Champions League រឺ​ពាន UCL គឺ​ជា​ពាន​ដ៏​ធំ​បំផុត​មួយ​សម្រាប់​ក្លឹប​អាជីព​នៅ​តំបន់​អឺរ៉ុប ដែល​ក្លឹប​ជា​ច្រើន​ប្រាថ្នា​ចង់​បាន​វា។ ហើយ​សម្រាប់​ពាន​នេះ​ដែរ ក្លឹប​ដែល​ឈ្នះ​វា​បាន​ច្រើន​ជាង​គេ គឺ​អធិរាជស Real Madrid ដែល​មក​ពី​លីគ​កំពូល​នៃ​ប្រទេស​អេស្ប៉ាញ។ ចំនួន​ពាន UCL ដែល Real Madrid ឈ្នះ​មាន​រហូត​ដល់ 14 ដង ដោយ​ការ​ឈ្នះ​លើក​ដំបូង​បង្អស់​នៅ​ឆ្នាំ 1956 និង​ចុងក្រោយ​នៅ​ឆ្នាំ 2022 ថ្មីៗ​នេះ។

យ៉ាង​ណា UEFA Champions League មិន​មែន​ជា​ពាន​ដែល​គ្រប់​ក្លឹប​សុទ្ធ​តែ​មាន​ឱកាស​ឈ្នះ​វា​បាន​នោះ​ទេ ហើយ​មាន​ក្លឹប​ធំៗ​ជា​ច្រើន មិន​ធ្លាប់​ស្គាល់​រសជាតិ​ឈ្នះ​វា​សូម្បី​តែ​ម្ដង​ក៏​មាន។ ថ្ងៃ​នេះ​ក្រុម​ការងារ X-Sports នឹង​នាំ​អ្នក​ទាំងអស់​គ្នា​ឲ្យ​ស្គាល់​ពី​ក្លឹបធំៗ​ទាំង 5 ដែល​មិន​ធ្លាប់​ឈ្នះពាន UCL ទាល់តែ​សោះ។

1. ក្លឹប​កាំភ្លើងធំ Arsenal

ពួក​គេ​ធ្លាប់​បាន​បង្ហាញ​ខ្លួន​ក្នុង​ក្របខ័ណ្ឌ UEFA Champions League បាន​រយៈពេល 17 រដូវកាល​ជាប់ៗ​គ្នា​ក្រោម​ការ​ដឹកនាំ​របស់​លោក Arsene Wenger ប៉ុន្តែ​បាន​​ឈាន​ទៅដល់វគ្គពាក់កណ្តាល​ផ្តាច់ព្រ័ត្រ​ពីរ​ដង​ប៉ុណ្ណោះ​នៅ​ក្នុង​ពេល​នោះ។ Arsenal បាន​ឡើង​ដល់​វគ្គផ្តាច់ព្រ័ត្រ​តែ​ម្ដង​គត់​នៅ​ឆ្នាំ 2006 ហើយ​ស្ទើរ​តែ​អាច​ឈ្នះពាន​នេះ​ទៅ​ហើយ ប៉ុន្តែ​ត្រូវ​បរាជ័យ​ក្រោម​ថ្វីជើង​របស់​ក្លឹប Barcelona។

2. ក្លឹប Atletico Madrid

Atletico Madrid គឺ​ជា​ក្លឹប​ដែល​ត្រូវ​បាន​គេ​ចាត់​ទុក​ថា​ជា​បងធំ​ទី​បី​នៅ​លីគកំពូល​នៃ​ប្រទេស​អេស្ប៉ាញ។ ពួក​គេ​ធ្លាប់​ឈ្នះពាន​លីគកំពូល LaLiga រហូត​ដល់ 10 ដង ប៉ុន្តែ​​មិន​ធ្លាប់​បាន​ឈ្នះពាន UCL ឡើយ។ Atletico Madrid បាន​ឡើង​ដល់​វគ្គ​ផ្ដាច់ព្រ័ត្រ​ពីរដង។ លើក​ទី​មួយ​នៅឆ្នាំ 1974 ត្រូវ​ចាញ់ Bayern Munich ហើយ 40 ឆ្នាំ​ក្រោយ​មក ពួក​គេ​បាន​មក​​ដល់​វគ្គផ្តាច់ព្រ័ត្រ​ជា​ថ្មី​ម្ដង​ទៀត ហើយ​ត្រូវ​ចាញ់ Real Madrid។

3. ក្លឹប AS Roma

Roma គឺ​ជា​ក្លឹប​ធំ​មួយ​នៅអ៊ីតាលី ដែល​មិន​ធ្លាប់​ឈ្នះ​ពាន UEFA Champions League ខណៈ​ដែល Juventus, AC Milan និង Inter Milan សុទ្ធ​តែ​ធ្លាប់​ឈ្នះ​ពាន​នេះ​អស់​ហើយ។ Roma ធ្លាប់​ឈាន​ដល់​វគ្គ​ផ្ដាច់​ព្រ័ត​ម្ដង នៅឆ្នាំ 1984 ប៉ុន្តែ​ត្រូវ​ចាញ់​ក្រោម​ស្នាដៃ​របស់ Liverpool។

4. ក្លឹប Paris Saint-Germain

Paris Saint-Germain ត្រូវ​បាន​គេ​ចាត់​ទុក​ថា​ជា​ក្លឹប​យក្ស​នៅ​ប្រទេស​បារាំង និង​ជា​ក្លឹប​អ្នក​មាន​ដែល​ហ៊ាន​ចាយ​លុយ​ទិញ​កីឡាករ​កំពូលៗ​ជា​ច្រើន។ ពួក​គេ​ធ្លាប់​ឈ្នះ​ពាន​លីគ​កំពូល (League 1) 10 ដង ប៉ុន្តែ​មិន​ធ្លាប់​ឈ្នះ UEFA Champions League ឡើយ។

5. ក្លឹប Manchester City

មិន​សូវ​ខុស​គ្នា​ប៉ុន្មាន​ឡើយ​ពី PSG ក្លឹប​យក្ស​អង់គ្លេស​មួយ​នេះ បាន​ចំណាយ​ប្រាក់​ដ៏​ច្រើន​សម្រាប់​ការ​នាំ​យក​កីឡាករ​កំពូលៗ មក​ចូល​រួម​នៅ​ក្នុង​ក្រុម។ ក្រៅ​ពី​មាន​កីឡាករ​លំដាប់​កំពូលៗ​ផង​នោះ ក្លឹប Manchester City ថែម​ទាំង​មាន​លោក Pep Guardiola ដែល​ជា​គ្រូ​បង្វឹក​ឆ្នើម​ផង​ដែរ។ ថ្វី​ត្បិត​តែ​ពួក​គេ​ធ្លាប់​បាន​ឈ្នះពាន Premier League រហូត​ដល់ 6 ដង​ក៏​ដោយ ប៉ុន្តែ​ចំពោះ​ពាន UEFA Champions League គឺ​មិន​ធ្លាប់​ឈ្នះសូម្បី​តែ​ម្ដង។

ប្រភព: Bleacherreport