Sevilla ដាក់​សំណើរ​ខ្ចីជើង Reguilon របស់​ក្លឹប​មាន់ខ្នាយមាស Tottenham Hotspur

របាយការណ៍​ចុងក្រោយ​មួយ​បាន​ឲ្យ​ដឹង​ថា ក្លឹប​នៅ​អេស្ប៉ាញ Sevilla កំពុង​ស្ថិត​ក្នុង​ការ​ពិភាក្សា ដើម្បី​ចុះហត្ថលេខា​ជា​ថ្មី​ម្ដង​ទៀត​លើ​ខ្សែ​ការពារ​ឆ្វេង Sergio Reguilon ក្នុង​លក្ខខណ្ឌ​ខ្ចីជើង​ពី​ក្លឹប​មាន់ខ្នាយមាស Tottenham Hotspur។

យ៉ាង​ណា​មិញ Sergio Reguilon ធ្លាប់​បាន​ខ្ចីជើង​ទៅ Sevilla ម្ដង​រួច​មក​ហើយ ពេល​ដែល​គាត់​នៅ​ជា​កីឡាករ​របស់ Real Madrid កាល​ពី​ឆ្នាំ 2019។ ពេល​នោះ​គាត់​លេង​បាន 38 ប្រកួត​ឲ្យ Sevilla និង​បាន​ជួយ​ក្លឹប​ឲ្យ​ឈ្នះពាន Europa League ផង​ដែរ។ ក្រោយ​មក Real Madrid ក៏​នាំ​យក​គាត់​ត្រឡប់​ទៅ​វិញ ហើយ​សម្រេច​លក់​ផ្ដាច់​កុងត្រា​របស់​គាត់​ទៅ​ឲ្យ Tottenham Hotspur ក្នុង​តម្លៃ​ផ្ទេរ​ប្រហែល 30 លានអឺរ៉ូ ខណៈ​ដែល​កាល​នោះ Manchester United ក៏ចាប់​អារម្មណ៍​លើ​គាត់​ដែរ។

ដោយ​ឡែក បច្ចុប្បន្ន​​​​ខ្សែការពារ​​សញ្ជាតិ​​អេ​ស្ប៉ា​ញ​រូប​នេះ ហាក់​ដូច​ជា​បាត់បង់​ឱកាស​បង្ហាញ​ខ្លួន​ដ៏​ច្រើន ចាប់​តាំង​ពី​ការ​មក​ដល់​របស់​គ្រូ​បង្វឹក​លោក Antonio Conte ហើយ​ភាគ​ច្រើន​គ្រូ​បង្វឹក​រូប​នេះ​ចូល​ចិត្ត​ប្រើប្រាស់ Ryan Sessegnon នៅ​តំបន់​ការពារ​ឆ្វេង​ជំនួស​កន្លែង​របស់ Reguilon។

របាយការណ៍​ពី​គេហទំព័រ 90min.com លើក​ឡើង​ថា Sevilla ពិត​ជា​ចាប់អារម្មណ៍​ខ្លាំង ក្នុង​ការ​នាំ​យក​គាត់​ត្រឡប់​ទៅ​ចូលរួម​ជា​មួយ​ពួក​គេ​វិញ ហើយ​ការ​ពិភាក្សា​កំពុង​ដំណើរ​ការ​ជិត​រួច​រាល់​ហើយ​ដែរ។ កីឡាករ​វ័យ 25 ឆ្នាំ​រូប​នេះ នៅ​កុងត្រា​ជាមួយ Tottenham Hotspur ដល់​ឆ្នាំ 2025 ហើយ​ក៏​មាន​ក្លឹប​ជា​ច្រើន​ចាប់​អារម្មណ៍​ចង់បាន​គាត់​ដែរ ប៉ុន្តែ​ចំពោះ Reguilon ផ្ទាល់ គាត់​ចង់​ចុះ​ហត្ថលេខា​ជាមួយ Sevilla ជាង​ក្លឹប​ផ្សេងៗ។

ប្រភព: 90 Min