នេះ​ជា​ហេតុផល​មួយ​ដែល Dembele មាន​ស្តាយ​ញាក់បាល់​ស្រដៀង Riyad Mahrez

ខ្សែប្រយុទ្ធ Ousmane Dembele របស់​ក្លឹប​អ្នក​មានបុណ្យ Barcelona ធ្លាប់​បាន​លើក​ឡើង​ថា ខ្សែ​ប្រយុទ្ធ​របស់ Manchester City គឺ​កីឡាករ Riyad Mahrez ជាមនុស្ស​ម្នាក់​ដ៏​អស្ចារ្យ​នៅ​ក្នុង​ពិភព​បាល់ទាត់។

ដោយ​ឡែក កីឡាករ​សញ្ជាតិ​បារាំង​វ័យ 25 ឆ្នាំ​រូប​នេះ បាន​ផ្ទេរ​មក Barcelona ជា​មួយ​នឹង​ទឹកប្រាក់​ផ្ទេរដ៏ច្រើន កាល​ពី​ឆ្នាំ 2017។ Dembele ជា​ខ្សែ​ប្រយុទ្ធ​ស្លាប​ដែល​មាន​ល្បឿន​លឿន និង​មាន​ស្តាយ​ញាក់​បាល់ កឹបបត់​បែន​បាន​ល្អ​បំផុត ហើយ​ស្តាយ​នៃ​ការ​កឹបញាក់​របស់​គាត់​កម្រ​មាន​កីឡាករ​ណា​អាច​ធ្វើ​បាន​ណាស់។ ទោះ​យ៉ាង​ណា បើ​យើង​សង្កេត​ឲ្យ​មែនទែន​ទៅ ការ​លេង​របស់ Ousmane Dembele គឺ​ស្រដៀង​នឹង Riyad Mahrez ដែល​លេង​នៅ​​ក្លឹប Manchester City។

គ្មាន​អ្វី​គួរ​ឲ្យ​សង្ស័យ​ឡើយ ដោយ​ថ្លែង​ទៅកាន់ Bein Sports ទាក់​ទង​នឹង​សំណួរ​ពិសេស​មួយ​ចំនួន Ousmane Dembele បាន​និយាយ​ថា៖ “ខ្ញុំ​ចូល​ចិត្ត​មើល​ការ​ប្រកួត​របស់ Riyad Mahrez។ រាល់​ពេល​ដែល​ខ្ញុំ​មើល​គាត់ គាត់​ពិត​ជា​អស្ចារ្យ​ណាស់ មិន​​គួរ​ឲ្យ​ជឿ”។

ដូច្នេះ​ហើយ យើង​អាច​សន្មត់​បាន​ថា Ousmane Dembele ប្រហែល​ជា​រៀន​សូត្រ​បន្ថែម​ទៀត​ពី​ការ​ញាក់​បាល់របស់ Mahrez ហើយ​អាច​នឹង​ចាត់​ទុក​កីឡាករ​រូប​នេះ​ជា idol របស់​ខ្លួន​ផង​ក៏​មិន​ដឹង។

បច្ចុប្បន្ន Ousmane Dembele គឺ​ជា​កីឡាករ​ដ៏​សំខាន់​មិន​អាច​ខ្វះ​បាន​របស់​ក្លឹប Barcelona ហើយ​គាត់​ទើប​តែ​នឹង​បន្ត​កុងត្រា​ថ្មី​ជា​មួយ​ក្លឹប​កាល​ពី​ម្សិលមិញ​នេះ ដែល​កុងត្រា​នោះ​មាន​រយៈពេល​ពីរ​ឆ្នាំ បូក​រួម​ទាំង​ការ​កាត់​ប្រាក់​ខែ​មួយ​ចំនួន​ផង​ដែរ។

ប្រភព: Si.com