កីឡាករ 5 ​នាក់ ដែល​ធ្លាប់​រងរបួស​រយៈពេល​យូរ​បំផុត

គ្រប់​យ៉ាង​នៅ​ក្នុង​ពិភពបាល់ទាត់ មិន​មែន​សុទ្ធ​តែ​ស្រស់​បំព្រង​គ្រប់​បែប​យ៉ាង​នោះ​ទេ។ នៅ​មាន​ផ្នែក​មួយ​ទៀត​ដែល​កីឡាករ​បាល់ទាត់​មិន​ចង់​ជួប​ប្រទះ នោះ​គឺ​ការ​រង​របួស។ បញ្ហា​នេះ មិន​ត្រឹម​តែ​ធ្វើ​ឲ្យ​កីឡាករ​បាត់បង់​ឱកាស​បង្ហាញ​ខ្លួន​នៅ​លើ​ទីលាន​មួយ​រយៈពេល​នោះ​ទេ កីឡាករ​ខ្លះ​ទៀត​អាច​នឹង​ធ្លាក់​ទម្រង់​លេង​ផង​ដែរ ពេល​វិល​ចូល​ការ​ប្រកួត​វិញ។

ការ​រងរបួស​ខ្លះ អាច​នឹង​ជា​សះស្បើយ​ក្នុង​រយៈពេល​ដ៏​ខ្លី អាច​តិច​ជាង​មួយ​សប្ដាហ៍ ប៉ុន្តែ​របួស​ខ្លះ​ទៀត ត្រូវ​សម្រាក​ព្យាបាល​ស្ទើរ​តែ​ពេញ​មួយ​រដូវកាល។ លើស​ពី​នេះ​ទៅ​ទៀត ប្រសិន​បើ​កីឡាករ​ព្យាបាល​របួស​របស់​ពួក​មិន​បាន​ជា​សះស្បើយ 100% ទេ​នោះ វា​អាច​នឹង​រើ​ឡើង​ជា​ថ្មី​ម្ដង​ទៀត ហើយ​ត្រូវ​ចំណាយ​ពេល​កាន់​តែ​យូរ​ជាង​មុន។ ខាង​ក្រោម​នេះ គឺ​ជា​កីឡាករ​ទាំង 5 រូប ដែល​ធ្លាប់​បាន​ចាយ​ពេល​លើ​ការ​រងរបួស​រយៈពេល​យូរ​បំផុត។

5. Thomas Vermaelen (របួស​សរុប 1366 ថ្ងៃ)

អតីត​ខ្សែ​ការពារ​របស់ Arsenal គឺ​កីឡាករ Thomas Vermaelen ដែល​បច្ចុប្បន្ន​កំពុង​ប្រកប​អាជីព​នៅ J-League ជាមួយ​ក្លឹប Vissel Kobe និង​ជា​មិត្តរួម​ក្រុម​ Andres Iniesta ធ្លាប់​ជា​កីឡាករ​ម្នាក់​ដែល​រង​របួស​រយៈ​ពេល​យូរ​បំផុតម្នាក់។ របួស​របស់​គាត់​ចាប់​ផ្ដើម​នៅ​​រដូវកាល 2010-11។ ការ​រង​របួស​របស់​គាត់​សរុប​ចំនួន 35 ដង ដែល​សរុប​ស្មើ​នឹង 1366 ថ្ងៃ។

4. Vincent Kompany (របួស​សរុប 1419 ថ្ងៃ)

Vincent Kompany ត្រូវ​បាន​គេ​ចាត់​ទុក​ថា​ជា​ខ្សែ​ការពារ​កណ្តាល​ដ៏​ល្អ​បំផុត​ម្នាក់​ និង​ធ្លាប់​បាន​​លើក​ពាន​ Premier League របស់​​អង់គ្លេស។ ក្រៅ​ពី​ការ​បង្ហាញ​សមត្ថភាព​ជា​ខ្សែ​ការពារ​ឆ្នើម​នោះ គាត់​ក៏​ធ្លាប់​រងរបួស​ដ៏​យូរ​ផង​ដែរ គឺ​សរុប​រហូត​ដល់ 1419 ថ្ងៃ។ របួស​របស់​ខ្សែការពារ​រូប​នេះ បាន​ចាប់​ផ្ដើម​ឡើង​នៅ​អំឡុង​ឆ្នាំ 2015។

3. Jack Wilshere (របួស​សរុប 1470 ថ្ងៃ)

បញ្ហា​របួស​របស់ Jack Wilshere បាន​ចាប់​ផ្តើម​នៅ​ក្នុង​រដូវក្តៅ​នៃ​ឆ្នាំ 2011 ដែល​វា​ជា​របួស​កជើង​រុំាំរ៉ៃ ក្នុង​អំឡុង​ការ​ប្រកួត​មុន​បើក​រដូវកាល​រវាង​ក្លឹប​កាំភ្លើងធំ Arsenal ជាមួយ​នឹង​ក្រុម New York Red Bulls។ Wilshere បាន​រង​របួស​ចំនួន 18 ដង​ផ្សេងៗ​គ្នា និង​ខកខាន​ធ្វើ​ការ​បង្ហាញ​​ខ្លួន​នៅ​លើទីលាន​រយៈពេល 1470 ថ្ងៃ។

2. Arjen Robben (របួស​រយៈពេល 1507 ថ្ងៃ)

ទាំង​អស់​គ្នា​ប្រហែល​ជា​មិន​ធ្លាប់​ដឹង​ថា​ទេ ខ្សែ​ប្រយុទ្ធ​ស្លាប​ដ៏​អស្ចារ្យ​ម្នាក់​នេះ ធ្លាប់​រងរបួស​សរុប​រហូត​ដល់ 1507 ថ្ងៃ ក្នុង​ចំណោម​របួស 58 ដង ផ្សេងៗ​គ្នា។ Arjen Robben គឺ​ជា​កីឡាករ​ដែល​ធ្លាប់​លេង​ឲ្យ​ក្លឹប Real Madrid, Chelsea និង Bayern Munich។ ក្លឹប​ចុងក្រោយ​ដែល​គាត់​លេង​មុន​ពេល​ចូលនិវត្តន៍ គឺ​ក្លឹប FC Groningen។

1. Abou Diaby (របួស​សរុប 1747 ថ្ងៃ)

អតីត​ខ្សែបម្រើ Arsenal និង​ជា​កីឡាករ​របស់​ក្រុម​ជម្រើស​ជាតិ​បារាំង Abou Diaby ជា​កីឡាករ​ដែល​រងរបួស​សរុប​ច្រើន​ជាង​គេ​បំផុត។ Diaby បាន​បង្ហាញ​ខ្លួន​ត្រឹមតែ 214 ប្រកួត​ប៉ុណ្ណោះ ពេញ​មួយ​អាជីព​បាត់ទាត់​របស់​គាត់ ហើយ​បាន​ខកខាន​ការ​ប្រកួត​សរុប​រហូត​ដល់ 1747 ថ្ងៃ​ជា​មួយ​នឹង​បញ្ហា​របួស។ គាត់​បាន​រង​របួស​ចំនួន 21 ដង ផ្សេងៗ​គ្នា​។

ប្រភព: Sportskeeda