ប្អូនប្រុស​របស់ Jude Bellingham ចុះ​កុងត្រា​ផ្លូវការណ៍​ជាមួយ​ក្លឹប Birmingham City

ខ្សែ​បម្រើ​ប្រយុទ្ធ Jobe Bellingham ត្រូវ​ជា​ប្អូន​ប្រុស​បង្កើត​របស់ Jude Bellingham ដែល​ជា​កីឡាករ​របស់​ក្លឹប Borussia Dortmund បាន​ចុះ​ហត្ថលេខា​ជា​មួយ​ក្លឹប​អាជីព​ពេញ​លេញ ដែល​ជា​ឈុតយុវជន U-23 ​របស់​ក្លឹប Birmingham City និង​ជា​ក្លឹប​របស់​គាត់​ទាំង​ពី​កុមារភាព។

Jobe Bellingham ត្រូវ​បាន​ក្លឹប​នាំ​យក​មក​លេង​ជា​មួយ​ឈុត​យុវជន ដែល​នៅ​ពេល​នេះ គាត់​ទើប​តែ​មាន​អាយុ 16 ឆ្នាំ​តែ​ប៉ុណ្ណោះ។ កីឡាករ​រូបនេះ​បាន​បង្ហាញ​ខ្លួន​ជា​លើក​ដំបូង​សម្រាប់ក្រុម​យុវជន U-23 របស់​ក្លឹប Birmingham City កាល​ពី​រដូវកាល​មុន ដោយ​បាន​លេង​ត្រឹម​តែ​ជា​កីឡាករ​បម្រុង​ក្នុង​ការ​ប្រកួត Championship ចំនួន​ពីរដង និង​លេង​បាន 50 នាទី ក្នុង​ការ​ប្រកួត​ក្របខណ្ឌ FA Cup ដែល​ចាញ់​ក្រោម​ស្នាដៃ​ក្លឹប Plymouth Argyle។

យ៉ាង​ណា​ក្ដី Jobe Bellingham ត្រូវ​បាន​ក្លឹប​ចុះ​ហត្ថលេខា​កុងត្រា ដែល​មាន​កុងត្រា​ដល់​ឆ្នាំ 2024។ កីឡាករ​រូប​នេះ ត្រូវ​បាន​គេ​មើល​ឃើញ​ថា កំពុង​ដើរ​តាម​គន្លង​របស់​បងប្រុស​របស់​គាត់ គឺ​កីឡាករ Jude Bellingham ដែល​ប្រសូត្រ​ចេញ​ពី​ថ្នាល​យុវជន​របស់​ក្លឹប Birmingham City ដូចគ្នា។

ដោយ​ឡែក​សម្រាប់​ក្លឹប Birmingham City ត្រូវ​បាន​គេ​ដឹង​ថា គឺ​ជា​ក្លឹប​ដ៏​ល្បី​មួយ​ក្នុង​ការ​អភិវឌ្ឍន៍​​សមត្ថភាព​កីឡាក្មេងៗ និង​ផលិត​បាន​នូវ​កីឡាករ​ដែល​មាន​ទេពកោសល្យ​លេច​ធ្លោរ​ទៅ​ថ្ងៃ​ក្រោយ។

ប្រភព: 90 Min