De Paul អាច​នឹង​ខកខាន​មិន​បាន​លេង World Cup សម្រាប់​ក្រុម​ជម្រើស​ជាតិ​អាហ្សង់ទីន

ក្រុម​ជម្រើស​ជាតិ​អាហ្សង់ទីន​កំពុង​មាន​ទម្រង់​លេង​យ៉ាង​ល្អ ហើយ​ពួក​គេ​កំពុង​ក្លាយ​ជា​ក្រុម​ដែល​នឹង​មាន​ឥទ្ធិពល​ខ្លាំង​នៅ​ព្រឹត្តិការណ៍ World Cup 2022 នៅ​រដូវរងារ​នេះ។ ក្រៅ​ពី​ប្រធាន​ក្រុម Lionel Messi ដែល​ជា​តារា​ឆ្នើម​ប្រចាំ​ក្រុម​នោះ Rodrigo de Paul ក៏​ជា​ផ្នែក​មួយ​ដ៏​សំខាន់​សម្រាប់​តំបន់​បម្រើ​របស់​ក្រុម​ផង​ដែរ។

ទោះ​ជា​យ៉ាង​ណា កាល​ពី​ពេល​ថ្មីៗ​នេះ មាន​របាយការណ៍​មួយ​ចំនួន​បាន​លើក​ឡើង​ថា ខ្សែបម្រើ Rodrigo de Paul អាច​នឹង​ត្រូវ​បាន​ហាម​ឃាត់​មិន​ឲ្យ​ចូល​លេង World Cup ប្រសិន​បើ​គាត់​មិន​អាច​ដោះស្រាយ​ពាក្យ​បណ្ដឹង​ជាមួយ​អតីត​មិត្តស្រី​របស់​គាត់​ឲ្យ​បាន​ចប់​រួច​រាល់​ទេ​នោះ។

De Paul កំពុង​ជាប់​ពាក្យ​បណ្ដឹង​ដែល​ពាក់​ព័ន្ធ​នឹង​ផ្នែក​ច្បាប់​ជា​មួយ​អតីត​មិត្ត​ស្រី​របស់​ខ្លួន​គឺ​អ្នក​នាង Camila Homs ដែល​វា​មិនមែន​ជា​ឧក្រិដ្ឋកម្ម​ធ្ងន់ធ្ងរ​ណា​មួយ​រវាង អ្នក​ទាំង​ពីរ​នោះ​ទេ ប៉ុន្តែ Camila Homs កំពុង​ទាម​ទារ​ប្រាក់​បន្ថែម​ទៀត​ពី De Paul សម្រាប់​ការ​ថែទាំ​កូន​របស់​ខ្លួន។

យោងតាម​កាសែត Mundo Deportivo បាន​ឲ្យ​ដឹង​ថា បច្ចុប្បន្ន De Paul កំពុង​ជាប់​គាំង​នៅ​ក្នុង​រឿង​ក្ដី​នោះ ហើយ​វា​អាច​នឹង​រារាំង​គាត់​មិន​ឲ្យ​ចូល​រួម​នៅ​ក្នុង​ព្រឹត្តិការណ៍ World Cup។ ដូច្នេះ​ខ្សែបម្រើ​រូប​នេះ ត្រូវ​ព្យាយាម​ដោះស្រាយ​ឲ្យ​រួច​រាល់​មុន​ពេល World Cup មក​ដល់ ទើប​គាត់​អាច​មាន​ឱកាស​ហោះ​ទៅ​ប្រទេស​កាតា​ជា​មួយ​ក្រុម​ជម្រើស​ជាតិ​អាហ្សង់​ទីន​បាន។

​ប្រភព: Football-espana