Andy Goldstein លើក​ឡើង​ថា គាត់​មិន​ចូល​ចិត្ត​កីឡាករ​ណា ដែល​ចាត់​ទុក​ខ្លួន​ឯង​ធំជាង​ក្លឹប​ដូច Ronaldo ឡើយ!!!

កាល​ពី​ពេល​ថ្មីៗ​នេះ អ្នក​វិភាគ​បាល់ទាត់ Andy Goldstein បាន​រិះគន់​តារា​ឆ្នើម Cristiano Ronaldo ដោយ​និយាយ​ថា គាត់​មិន​ចូលចិត្ត​កីឡាករ​បាល់ទាត់​ណា​ដែល​ដូចខ្សែប្រយុទ្ធ​សញ្ជាតិ​ព័រទុយហ្គាល់​រូប​នេះ​ឡើយ។

ដោយ​ឡែក​យើង​បាន​ដឹង​ហើយ​ថា Cristiano Ronaldo ទទូច​ចង់​ចាកចេញ​ពី​ក្លឹប​បិសាចក្រហម Manchester United នៅ​រដូវក្តៅ​នេះ ទោះ​បី​ជា​អ្នក​ចាត់ការ​ថ្មី​លោក Erik ten Hag សុំ​ឲ្យ​គាត់​ស្នាក់​នៅ និង​សន្យា​ដាក់​គាត់​ឲ្យ​លេង​បាន​ទៀត​ទាត់​ក៏​ដោយ។

ខ្សែ​ប្រយុទ្ធ​សញ្ជាតិ​ព័រទុយហ្គាល់​រូប​នេះ បាន​ត្រឡប់​ទៅ​ទីលាន​ហ្វឹកហាត់​នៅ Old Trafford វិញ​កាល​ពី​ថ្ងៃអង្គារ​សប្ដាហ៍​នេះ ជាមួយ​ភ្នាក់ងារ​របស់​គាត់​គឺ​លោក Jorge Mendes ហើយ​ត្រូវ​បាន​គេរាយការណ៍​ថា ពួក​គេ​នៅ​តែ​ព្យាយាម​ទាក់ទង​ទៅ​កាន់​ក្លឹប​ផ្សេងៗ ដើម្បី​ធ្វើ​ឲ្យ Cristiano Ronaldo អាច​ចាកចេញ​ពី​ក្លឹប​បិសាចក្រហម​បាន។

Cristiano Ronaldo ត្រូវ​បាន​គេ​និយាយ​ថា នឹង​ចាកចេញ​ពី​បិសាចក្រហម​នៅ​រដូវក្ដៅ​នេះ បើទោះបី​ជា​មាន​វត្តមាន​របស់​អតីត​គ្រូបង្វឹក​លោក Sir Alex Ferguson ចេញ​មក​និយាយ​សម្រប​សម្រួល​ជា​មួយ​គាត់​ក៏​ដោយ។

សម្រាប់​អ្នក​វិភាគ​បាល់ទាត់ Goldstein មាន​អារម្មណ៍​ថា កីឡាករ​វ័យ 37 ឆ្នាំ Cristiano Ronaldo កំពុង​បង្ហាញ​អំណាច​ធំ​ជាង​ក្លឹប ហើយ​ក្លឹប​គួរតែ​​អនុញ្ញាត​ឲ្យ​គាត់​ទៅ។ Goldstein ដែល​ជា​អ្នក​គាំទ្រ​ម្នាក់​របស់​ក្លឹប Manchester United ដែរនោះ បាន​និយាយថា៖ “ខ្ញុំ​មិន​ចូលចិត្ត​កីឡាករ​ណា​ដែល​គិត​ថា​ពួកគេ​ធំ​ជាង​ក្លឹប​នោះទេ។… ប្រសិន​បើ​អ្នក​មាន​កីឡាករ​ដូច Ronaldo នោះ​អ្នក​នឹង​មាន​​អារម្មណ៍​ថា មាន​កាតព្វកិច្ច​មួយ​ ​ដែល​ត្រូវ​ជ្រើសរើស​យក​គាត់”។

ប្រភព: Dailypost