Liverpool លើកពាន Community Shield ក្រោយ​យក​ឈ្នះ Manchester City 3-1 (មានវីដេអូ)

ក្លឹប​ហង្សក្រហម Liverpool បាន​ឈ្នះ​ពាន​មុន​ចាប់​ផ្ដើម​រដូវកាល 2022/23 ជា​មួយ​នឹងជ័យ​ជម្នះ​យ៉ាង​លំបាក​ក្នុង​លទ្ធផល 3-1 ទល់​នឹង​ក្លឹប​មេឃខៀវ Manchester City ដែល​ជាការ​ប្រកួត Community Shield។

ទម្រង់​លេង​របស់​លោក Jurgen Klopp ហាក់​ដូច​ជា​មាន​ភាព​មុតស្រួច​ជាង​គូ​ប្រកួត ដែល​ដឹកនាំ​ដោយ​លោក Pep Guardiola។ គុណភាព​លេង​ដ៏​ល្អ​របស់ Liverpool បាន​ធ្វើ​ឲ្យ​ពួក​គេ​ដណ្តើម​យក​ជ័យជម្នះ និង​លើក​ពាន​នៅ​កីឡដ្ឋាន King Power។

បីគ្រាប់​របស់​ក្លឹប​ហង្សក្រហម Liverpool ជាការ​ស៊ុត​បញ្ចូល​ទីពី Trent Alexander-Arnold នៅ​នាទីទី 21, Mohamed Salah នៅ​នាទីទី 83 (ប៉េណាល់ទី) និង Darwin Nunez នៅ​នាទីទី 90+4។ សម្រាប់​មួយ​គ្រាប់​របស់​ក្លឹប Manchester City គឺ​ជា​ការ​ស៊ុត​បញ្ចូល​ទី​របស់​ខ្សែ​ប្រយុទ្ធ Julian Alvarez នៅ​នាទីទី 70។

ដោយ​ឡែក​នៅ​ក្នុង​ការ​ប្រកួត​នោះ អ្វី​ដែល​គួរ​ឲ្យ​ចាប់​អារម្មណ៍​សម្រាប់​ក្លឹប​ហង្សក្រហម Liverpool គឺ​ទម្រង់​លេង​របស់​ខ្សែ​ប្រយុទ្ធ​ចំណូល​ថ្មី Darwin Nunez។ ខណៈ​ដែល​ក្រុម​ទាំង​ពីរ​មាន​គ្រាប់បាល់ 1 ទល់នឹង 1 នោះ លោក Jurgen Klopp បាន​សម្រេច​ចិត្ត​ប្ដូរ Darwin Nunez ចូល​ជំនួស Roberto Firmino។

បន្ត​ពី​នោះ​មក នៅ​តំបន់​ប្រយុទ្ធ​របស់​ក្លឹប​ហង្សក្រហម​ចាប់​ផ្ដើម​មាន​ឱកាស​ជា​បន្ត​បន្ទាប់ ហើយ​នៅ​នាទីទី 82 ខ្សែ​ប្រយុទ្ធ Darwin Nunez បាន​បង្កើត​ឲ្យ​មាន​ឱកាស​បាល់ប៉េណាល់ទី ដោយ​គាត់​បាន​តែត​បាល់​ទៅ​ប៉ះ​នឹង​ដៃ​របស់​ខ្សែការពារ Roben Dias។ ក្រោយ​មក នៅ​ចុង​ម៉ោង​ស្ទើរ​តែ​បញ្ចប់​ទៅ​ហើយ Nunez បាន​តែត​បាល់មួយ​គ្រាប់​ទៀត​ដែល​ធ្វើ​ឲ្យ​ប្រាកដ​ថា ក្រុម​របស់​ពួក​គេ​នឹង​ទទួល​ជ័យ​ជំនះ​ក្នុង​ការ​ប្រកួត​នោះ​តែ​ម្ដង។

ប្រភព: 90 Min