Nottingham Forest ប្រកាស​ពី​ការ​ចុះ​ហត្ថលេខា​លើ​ខ្សែ​បម្រើ​កណ្ដាល​ចំណូល​ថ្មី​សញ្ជាតិ​បែលហ្ស៊ិក

កាល​ពី​ប៉ុន្មាន​ម៉ោង​មុន​នេះ​ក្លឹប Nottingham Forest បាន​ប្រកាស​ពី​ការ​ចុះ​ហត្ថលេខា​លើ​ខ្សែ​បម្រើ​កណ្ដាល​ថ្មី​ម្នាក់​ទៀត​ហើយ​គឺ​កីឡាករ Orel Mangala ដែល​ផ្ទេរ​ពី​ក្លឹប Stuttgart ជាមួយ​នឹង​កុងត្រា​រយៈពេល​វែង។

យ៉ាង​ណា​មិញ​ខ្សែបម្រើ​សញ្ជាតិ​បែលហ្ស៊ិក​រូបនេះ​បាន​ក្លាយជា​កីឡាករ​ទី 12 ហើយ​ដែល Nottingham Forest ផ្ទេរ​មក​នៅ​រដូវក្តៅ​នេះ។ Nottingham Forest ទើប​នឹង​ត្រូវ​បាន​ប្រូម៉ូត​ឡើង​មក​លេង​នៅ​ក្របខ័ណ្ឌ Premier League កំពុង​ព្យាយាម​ពង្រឹង​ក្រុម​ឲ្យ​កាន់​តែ​ខ្លាំង ដើម្បី​ប្រជែង​ជា​មួយ​នឹង​ក្រុម​ខ្លាំងៗ​ដទៃ​ទៀត​នៅ​អង់គ្លេស។

កាល​ពី​ដើម​​សប្តាហ៍​នេះ Nottingham Forest បាន​ពិភាក្សា​ជាមួយ Stuttgart លើ​កិច្ចព្រមព្រៀង​សម្រាប់​កីឡាករ​វ័យ 24 ឆ្នាំ Orel Mangala ដោយ​បាន​ចំណាយ​ប្រហែល 15 លានអឺរ៉ូ ហើយ​គ្រប់យ៉ាង​បាន​បិទ​បញ្ចប់​សម្រេច​កាល​ពី​ម្សិលមិញ​នេះ។

Nottingham Forest គឺ​ជា​ក្លឹប​ដែល​ចំណាយ​ប្រាក់​ដ៏​ធំ​បំផុត​សម្រាប់​ក្លឹប​នៅ​ទ្វីប​អឺរ៉ុប​រដូវក្តៅ​នេះ ហើយ​ពួក​គេ​ហាក់​ដូចជា​នៅ​ចង់​នាំ​យក​កីឡាករ​ចំណូល​ថ្មី​បន្ថែម​ទៀត​ផង​ដែរ។ របាយការណ៍​ពី​គេហទំព័រ 90min.com លើក​ឡើង​ថា ក្លឹប Nottingham Forest កំពុង​ពិភាក្សា​ជាមួយ Real Betis ដើម្បី​ផ្ទេរ William Carvalho និង Alex Moreno ទៀត​ផង។

ដោយ​ឡែក​សម្រាប់​យុទ្ធនាការ Premier League របស់​ពួកគេ​នឹង​ចាប់ផ្តើម​នៅ​ថ្ងៃសៅរ៍ សប្ដាហ៍​ក្រោយ​នេះ​ហើយ ដែល​ប្រកួត​ដំបូង​ត្រូវ​ប៉ះជា​មួយ​ក្លឹប Newcastle United។

ប្រភព: 90 Min