Xavi សន្យា​ថា នឹង​នាំ​យក Azpilicueta និង Marcos Alonso ឲ្យ​បាន​នៅ​ពេល​ឆាប់ៗ​នេះ

យោងតាម​របាយការណ៍​ចុងក្រោយ​មួយ​បាន​ឲ្យ​ដឹង​ថា គ្រូ​បង្វឹក​របស់​ក្លឹប Barcelona លោក Xavi Hernandez បាន​ប្រាប់​​ទៅ​កីឡាករ​របស់​ក្លឹប​តោខៀវ Cesar Azpilicueta និង Marcos Alonso ថា គាត់​នឹង​ធ្វើ​អ្វីៗ​គ្រប់​យ៉ាង​តាម​ដែល​អាច​ធ្វើ​ទៅ​បាន ដើម្បី​ចុះ​ហត្ថលេខា​លើ​ពួកគេ​នៅ​សប្តាហ៍​នេះ។

យ៉ាង​ណា​មិញ ទំនាក់ទំនង​រវាង​ក្លឹប​ទាំង​ពីរ​ដែល​មាន Barcelona និង Chelsea ហាក់​ដូច​ជា​កំពុង​ស្ថិត​ក្នុង​សង្គ្រាម​នៃ​ការ​ដណ្ដើម​កីឡាករ​គ្នា នា​ពេល​ថ្មីៗ​នេះ នៅ​ពេល​ដែល​ក្លឹប Barcelona បាន​លួច​ឆ្មក់​ផ្ទេរ​ខ្សែការពារ Jules Kounde របស់ Sevilla ដែល​ក្លឹប​តោខៀវ​បាន​ខិត​ខំ​ព្យាយាម​ផ្ទេរ និង​ចង់​បាន​ជា​ខ្លាំង។

ការ​ដែល Kounde ទៅ​ចូលរួម​ជាមួយ Barcelona គឺ​ជា​ការ​ប៉ះទង្គិច​ដ៏​ធំមួយ ចំពោះ​ផែនការ​ផ្ទេរ​របស់​ក្លឹប Chelsea ហើយ​ត្រូវ​បាន​គេ​ជឿថា ​ក្លឹបតោខៀវ​ពិត​ជា​ខឹងសម្បារ​យ៉ាង​ខ្លាំង ចំពោះ​ទង្វើរ​របស់ Barcelona បែប​នេះ។

ថ្វី​ត្បិត​តែ​បែប​នេះ​ក៏​ដោយ Barcelona ហាក់​ដូច​ជា​គិត​ថា មិន​មាន​រឿង​អ្វី​ធំ​ដុំ​ឡើយ ហើយ​ពួក​គេ​នៅ​ចង់​នាំ​យក​ខ្សែការពារ​ឆ្វេង និង​ស្ដាំ​ពីរ​រូប​ទៀត​ពី​ក្លឹប​តោខៀវ​ទៀត​ផង ដែល​មាន Azpilicueta និង Marcos Alonso។ គេ​ជឿ​ថា Chelsea ចង់​សងសឹក ហើយ​មិន​អនុញ្ញាត​ឲ្យ Barcelona នាំ​យក​កីឡាករ​របស់​គេ​ចេញ​បាន​នោះ​ឡើយ។

ទោះជាយ៉ាងណា​ក៏​ដោយ សារព័ត៌មាន Sport របស់​អេស្ប៉ាញ បាន​រាយការណ៍​ថា កិច្ចព្រមព្រៀង​ផ្ទេរ​ខ្សែការពារ​ទាំង​ពីរ​របស់​ក្លឹប​តោខៀវ នឹង​អាច​កើត​ឡើង ខណៈ​ដែល Xavi បាន​ទាក់ទង​ទៅ​និយាយ​ដោយ​ផ្ទាល់​ជាមួយ​នឹង Azpilicueta និង Marcos Alonso រួច​ហើយ។ លើស​ពី​នេះ​ទៅ​ទៀត Barcelona មាន​ក្បាច់​មួយ​ដែល​អាច​ឲ្យ​ក្លឹប​តោខៀវ Chelsea យល់​ព្រម​លើ​លក្ខខណ្ឌ​ផ្ទេរ​នេះ ដោយ​ពួក​គេ​ចង់​ប្រើប្រាស់ Frenkie de Jong ឲ្យ​ទៅ Chelsea ដើម្បី​ជា​ថ្នូរ​នៃ​ការ​ដោះដូរ​​យក Azpilicueta និង Marcos Alonso មកវិញ។

ប្រភព: Metro