Premier League នឹង​ឈប់​ឲ្យ​កីឡាករ​លុត​ជង្គង់​មុន​ការ​ប្រកួត​ចាប់​ពី​រដូវកាល​នេះ​តទៅ

ប្រធាន​ក្រុម​របស់​ក្លឹប​នៅ Premier League ត្រៀម​​សម្រេច​ចិត្ត​ឯកភាព​គ្នា​លែង​លុត​ជង្គង់ មុន​ពេល​ចាប់​ផ្ដើម​ការ​ប្រកួត​ទាំង​អស់​ចាប់​ពីរដូវកាល​ថ្មី​នេះ​ត​ទៅ ទោះបី​ជា​វា​ជាទង្វើ​ដែល​បាន​អះអាង​ពី​ការ​ប្តេជ្ញាចិត្ត​ក្នុង​ការ​ប្រយុទ្ធ​ប្រឆាំង​នឹង​ការ​រើសអើង​ជាតិ​សាសន៍ និង​ការរើសអើង​នានា​ក៏​ដោយ។

ដោយ​ឡែក​ក្លឹប​ធំៗ​បាន​ចាប់​ផ្តើម​ធ្វើ​កាយ​វិការ​លុត​ជង្គង់​បែប​នេះ ក្នុង​អំឡុង​ពេល​នៃ​ការ​រីករាលដាល​នៃ​ជម្ងឺ​កូវីដ​លើក​ទីមួយ ដើម្បីគាំទ្រ​ចលនា Black Lives Matter ដែល​ពាក់ព័ន្ធ​នឹង​ការ​រើស​អើង​ជាតិសាសន៍ បន្ទាប់​ពី​ការ​ស្លាប់​របស់ George Floyd ក្នុង​ខែ​ឧសភា​ឆ្នាំ 2020។

ទោះ​ជា​យ៉ាង​ណា​ក៏ដោយ កីឡាករ​មួយ​ចំនួន​ដូចជា Wilfried Zaha របស់​ក្លឹប Crystal Palace មាន​អារម្មណ៍​ថា ការ​លុត​ជង្គង់​បែប​នេះ គ្មាន​សារៈ​សំខាន់​ឡើយ ហើយ​ខ្សែប្រយុទ្ធ​រូប​នេះ​បាន​ឈប់​ធ្វើ​កាយ​វិការ​បែប​នោះ តាំង​ពី​ខែកុម្ភៈ ឆ្នាំ 2021។ Wilfried Zaha ថែម​ទាំង​បាន​​និយាយ​ថា៖ “វា​មិន​មាន​បញ្ហា​ថា​តើ​យើង​លុត​ជង្គង់ រឺ​ឈរ​នោះ​ទេ មនុស្ស​យើង​មួយ​ចំនួន​នៅ​តែ​បន្ត​ទទួល​រង​ការ​រំលោភ​បំពាន​ដដែល”។

មុន​ពេល​ចាប់​ផ្តើម​រដូវកាល​ថ្មី​នៃ​ក្របខ័ណ្ឌ Premier League នៅ​ចុង​សប្តាហ៍​នេះ ប្រធាន​ក្រុម​នៃ​ក្លឹប​នីមួយៗ​នឹង​ជួប​ប្រជុំ​គ្នា ដើម្បី​ពិភាក្សា​អំពី​ប្រធាន​បទ​ផ្សេងៗ រួម​ទាំង​ការ​លុតជង្គង់​នេះ​ផង​ដែរ ហើយ​នឹង​សម្រេច​ចិត្ត​លើ​ការ​កំណត់​លក្ខខណ្ឌ​ជាក់លាក់​ណា​មួយ សម្រាប់​រដូវកាល​ថ្មី​នេះ។

ប្រភព: Metro