Jurgen Klopp ប្រាប់​ថា នឹង​មិន​ដាក់ Darwin Nunez ឲ្យ​លេង​ក្នុង​ជម្រើស 11 នាក់​ដំបូង​ពេល​ប៉ះ Fulham ឡើយ!!!

គ្រូ​បង្វឹក​របស់​ក្លឹប​ហង្សក្រហម Liverpool លោក Jurgen Klopp បាន​បង្ហើប​ថា ខ្សែប្រយុទ្ធ​ថ្មី Darwin Nunez អាច​នឹង​ស្ថិត​នៅ​កៅអី​បម្រុង សម្រាប់​ការ​ប្រកួត​បើក​ឆាក Premier League របស់​ពួកគេ​នៅ​កីឡាដ្ឋាន Craven Cottage របស់​ក្លឹប Fulham នៅ​ថ្ងៃ​ស្អែក​នេះ​ម៉ោង 6:30 រសៀល (ម៉ោង​នៅកម្ពុជា)។

យ៉ាង​ណា​មិញ Nunez គឺ​ជា​កីឡាករ​ចំណូល​ថ្មី ដែល​បាន​មក​ដល់ Anfield នៅ​រដូវក្តៅ​នេះ ដោយ​ផ្ទេរ​ពី​ក្លឹប Benfica ក្នុង​តម្លៃ 85 លានផោន។ ខ្សែ​ប្រយុទ្ធ​រូប​នេះ បាន​ស៊ុតបញ្ចូលទី​មួយ​គ្រាប់ ក្នុង​ការ​ប្រកួត​សំខាន់​របស់ Liverpool ដែល​ជា​ការ​ប្រកួត​ពានរង្វាន់ Community Shield ជាមួយ​ក្លឹប Manchester City កាល​ពី​ថ្ងៃសៅរ៍​សប្ដាហ៍​មុន​ផង​ដែរ។

កាល​ពី​ប្រកួត​ជា​មួយ Manchester City នោះ Darwin Nunez បាន​ប្ដូរ​ចូល​ជំនួស Roberto Firmino នៅ​នាទី​ទី 59 ហើយ​អ្នក​គាំទ្រ​ជា​ច្រើន​ក៏​រំពឹង​ថា គាត់​នឹង​បង្ហាញ​ខ្លួន​ជា​ជម្រើស 11 នាក់​ដំបូង​ពេល​ប៉ះ Fulham។

យ៉ាង​ណា​លោក Jurgen Klopp បាន​បញ្ជាក់​នៅ​ក្នុង​សន្និសិទ្ធ​កាសែត​កាល​ពី​ពេល​ថ្មីៗ​នេះ ដោយ​លើក​ឡើង​ថា ខ្សែ​ប្រយុទ្ធ​សញ្ជាតិ​អ៊ុយរូហ្គាយ​វ័យ 23 ឆ្នាំ​រូប​នេះ អាច​នឹង​ត្រូវ​​ដាក់​ឲ្យ​អង្គុយ​នៅ​កៅអី​ប្រុង​ដូច​មុន​ដដែល។

Jurgen Klopp បាន​និយាយ​ថា៖ “Darwin Nunez បាន​ត្រៀម​ខ្លួន​រួច​ស្រេច​អស់​ហើយ ប៉ុន្តែ​វា​មិន​មាន​ន័យ​ថា គាត់​ត្រូវតែ​លេង​ក្នុង​ជម្រើស 11 នាក់​ដំបូង​នោះ​ទេ។… គាត់​ធ្លាប់​បាន​និយាយ​ដោយ​​ខ្លួន​​ឯង​ថា គាត់​ភ័យ​នៅ​ពេល​លេង​ជា​ជម្រើស 11 នាក់​​ដំបូង”។

ប្រភព: Metro