Gavi នឹង​មិន​បន្ត​កុងត្រា​ថ្មី​ឡើយ ប្រសិន​បើ​ក្លឹប Barcelona ចុះ​ហត្ថលេខា​ផ្ទេរ Bernardo Silva

តារា​ឆ្នើម​របស់​ក្លឹប Barcelona គឺ​កីឡាករ Gavi មិន​សប្បាយ​ចិត្ត​ជាមួយ​នឹង​ការ​តាម​ប្រមាញ់​ខ្សែបម្រើ Bernardo Silva របស់​ក្លឹប Manchester City ឡើយ ហើយ​រូប​គេ​នឹង​អាច​ចាកចេញ​ពី​ក្លឹប ប្រសិន​បើ​ខ្សែ​បម្រើ​រូប​នោះ​ផ្ទេរ​មក Barcelona។

កីឡាករ​សញ្ជាតិ​អេស្ប៉ាញ​រូបនេះ​បាន​ឈាន​ចូលវ័យ 18 ឆ្នាំ​ហើយ កាល​ពី​ដើម​សប្តាហ៍​នេះ គាត់​ក៏​ត្រូវ​បាន​គេរាយការណ៍​ថា នឹង​ចុះហត្ថលេខា​លើ​កុងត្រា​ថ្មី​រយៈពេល 5 ឆ្នាំ​ជាមួយ​ក្លឹប​បច្ចុប្បន្ន​របស់​ខ្លួន។

ទោះ​ជា​យ៉ាង​ណា​ក៏ដោយ សារ​ព័ត៌មាន Catalan Beteve បាន​រាយ​ការណ៍​ថា Gavi បាន​ជូន​ដំណឹង​ដល់ Barcelona ថា គាត់​នឹង​មិន​បន្ត​កុងត្រា​ថ្មី​របស់​គាត់​ឡើយ ក្នុង​ករណី​ដែល​ក្លឹប​ចុះ​ហត្ថលេខា​លើ Bernardo Silva។

របាយការណ៍​ដដែល​នោះ​ក៏​បាន​បន្ថែម​ទៀត​ថា ខ្សែបម្រើ​កណ្តាល​មាឌល្អិត​ចិត្ត​ធំ​រូប​នេះ បាន​ជូន​ដំណឹង​ដល់​គ្រូ​បង្វឹក​លោក Xavi ពី​ការ​មិន​សប្បាយ​ចិត្ត​របស់​គាត់។ Gavi នឹង​រង់ចាំ​រហូត​ដល់​ថ្ងៃ​ចុងក្រោយ​នៃ​ទីផ្សារដោះដូរ​កីឡាករ​រដូវក្តៅ​នេះ​ជិត​ផុត​កំណត់ ទើប​គាត់​ចុះ​ហត្ថលេខា​លើ​កុងត្រា​ថ្មី។

បច្ចុប្បន្ន​នេះ​ក្លឹប​អ្នក​មាន​បុណ្យ Barcelona មាន​ជម្រើស​ខ្សែ​បម្រើ​ដ៏​ច្រើន ខណៈ​ដែល​ពួក​គេ​បាន​ចុះ​ហត្ថលេខា​នាំ​យក Franck Kessie ពី AC Milan ហើយ Frenkie de Jong ក៏​នៅ​ជាមួយ​ក្លឹប​ដដែល បើ​ទោះ​ជា​មាន​ពាក្យ​ចចាម​អារ៉ាម​ថា​គាត់​ចង់​ផ្លាស់​ទៅ Premier League ក៏ដោយ។ ទន្ទឹម​នឹង​នេះ​ដែរ Miralem Pjanic បាន​ត្រឡប់​ពី​ការ​ខ្ចីជើង​របស់​គាត់​ជាមួយ Besiktas វិញ​ដែរ ខណៈ​ដែល Nico Gonzalez កាន់​តែ​មាន​ទម្រង់​លេង​ល្អ​ឡើង និង​ត្រូវ​បាន​គ្រូ​បង្វឹក​ដាក់​ឲ្យ​លេង​ស្ទើរ​គ្រប់​ប្រកួត។

ស្រប​ពេល​ជា​មួយ​គ្នា​នេះ​ដែរ​លោក Pep Guardiola ដែល​ជា​គ្រូ​បង្វឹក​របស់​ក្លឹប Man City បាន​សារភាព​ថា Bernardo Silva អាច​ចាកចេញ​ពី​ក្លឹប​នៅ​រដូវក្ដៅ​នេះ។ Bernardo Silva ផ្ទាល់​ក៏​គាត់​ធ្លាប់​បាន​បង្ហាញ​ពី​ចំណាប់​អារម្មណ៍​ក្នុង​ការ​មក​ចូលរួម​ជា​មួយ Barcelona ដែរ។ ដូច្នេះ​យើង​មាន​តែរង​ចាំ​មើល​ថា តើ​រវាង Gavi និង Bernardo Silva ម្នាក់​ណា​ដែល Barcelona ចង់​ឲ្យ​នៅ​ជា​មួយ​ក្លឹប។

ប្រភព: 90 Min