Magalhaes សរសើរ​​ខ្សែការពារ​កណ្ដាល William Saliba ថា ជា​កីឡាករ​វ័យ​ក្មេង​ដ៏​ល្អ​បំផុត

Gabriel Magalhaes ដែល​ជា​ខ្សែការពារ​កណ្តាល​របស់​ក្លឹប​កាំភ្លើងធំ Arsenal បាន​សរសើរ​ដៃ​គូ​ខ្សែការពារ​កណ្ដាល​របស់​ខ្លួន William Saliba ដោយ​លើក​ឡើង​ថា កីឡាករ​បារាំង​វ័យក្មេង​រូប​នេះជា​ខ្សែការពារ​ដ៏​ល្អ​បំផុត បន្ទាប់​ពី​ការ​បង្ហាញ​ខ្លួន​លើក​ដំបូង​នៅ Premier League ហើយ​ទទួល​បាន​ជ័យ​ជំនះ 2-0 ទៅ​លើ Crystal Palace។

ដោយ​ឡែក William Saliba បាន​ចូលរួម​ជាមួយ​ក្លឹប Arsenal តាំង​ពី​នៅ​ក្មេង ក្នុង​ឆ្នាំ 2019 ជាមួយ​នឹង​កិច្ច​ព្រមព្រៀង​ផ្ទេរ​ដែល​មាន​តម្លៃ​រហូត​ដល់ 27 លានផោន ប៉ុន្តែ​បន្ត​ពី​នោះ​មក គាត់​មិន​សូវ​មាន​ឱកាស​បង្ហាញ​ខ្លួន​ជាមួយ​ក្រុមឡើយ ហើយ​តែងតែ​ខ្ចីជើង​ទៅ​ក្លឹប​ផ្សេង។

ទោះ​ជា​យ៉ាង​ណា ទម្រង់​លេង​របស់ William Saliba ហាក់​ដូច​ជា​ល្អ​ប្រសើរ​ខ្លាំង ពេល​ដែល​ខ្ចីជើង​ទៅ Marseille ហើយ​ក្លឹប​កាំភ្លើងធំ​សម្រេច​ចិត្ត​នាំ​យក​គាត់​មក​ពី​ការ​ខ្ចីជើង​វិញ។ រដូវកាល​នេះ ខ្សែការពារ​កណ្ដាល​ដែល​ស្ថិត​ក្នុង​គម្រោង​ប្រើប្រាស់​របស់​គ្រូ​បង្វឹក ប្រហែល​ជា William Saliba គឺជា​កីឡាករ​ដែល​មិន​អាច​ខ្វះបាន។

Gabriel Magalhaes បាន​ប្រាប់​កាសែត Evening Standard ថា៖ “សម្រាប់ខ្ញុំ Saliba គឺ​ល្អបំផុត!!! គាត់​​នៅ​​ក្មេង​ខ្លាំង​ណាស់។ ជឿថា គាត់​នឹង​ក្លាយ​​ជា​កីឡាករ​ដ៏​ល្អ​ម្នាក់។ ខ្ញុំ​សប្បាយ​ចិត្ត​ណាស់​ដែល​បាន​លេង​ចាប់​ដៃ​គូ​ជាមួយ​គាត់…”។

ប្រភព: 90 Min