Barcelona ចុះ​ឈ្មោះ​កីឡាករ​ចំណូល​ថ្មី​របស់​ខ្លួន​រួច​រាល់​ហើយ លើក​លែង​តែ Jules Kounde ម្នាក់​ប៉ុណ្ណោះ

កាល​ពី​ម្សិល​មិញ​នេះ ក្លឹប​អ្នក​មាន​បុណ្យ Barcelona បាន​ចុះឈ្មោះ​កីឡាករ​ចំណូល​ថ្មី​ទាំងអស់​របស់​ពួកគេ​រួច​ហើយ លើក​លែង​តែ​ខ្សែការពារ Jules Kounde ម្នាក់ ដែល​មិន​ទាន់​បាន​ធ្វើ​ការ​ចុះ​ឈ្មោះ ខណៈ​ដែល​ការ​ប្រកួត​បើក​ឆាក La Liga នៃ​រដូវកាល​នេះ នឹង​ចាប់​ផ្ដើម​នៅ​ម៉ោង 2 រំលង​អាធ្រាត​នេះ​ហើយ។

ប្រកួត​ដំបូង​ក្នុង​ក្របខណ្ឌ​កំពូល​របស់​អេស្ប៉ាញ ក្លឹប Barcelona ត្រូវ​ប៉ះជាមួយ​នឹង​ក្លឹប Rayo Vallecano ដែល​ធ្វើ​ឡើង​ក្នុង​ដី​របស់​ខ្លួន​គឺ​កីឡដ្ឋាន Spotify Camp Nou។

ក្លឹប​យក្ស​កាតាឡាន់​មួយ​នេះ បាន​ព្យាយាម​នាំ​យក​កីឡាករ​ចំណូល​ថ្មី​ដ៏​ច្រើន ដើម្បី​ប្រកួត​ប្រជែង​ពាន​ក្នុងស្រុក និង​ក្នុង​ក្របខ័ណ្ឌ UEFA Champions League ដោយ​ចំណាយ​ទឹកប្រាក់​សរុប​ប្រហែល 150 លានអឺរ៉ូ ហើយ​ការ​ចំណាយ​នោះ​គឺ​ទៅ​លើ​កីឡាករ Robert Lewandowski, Raphinha និង Kounde។

មិន​តែ​ប៉ុណ្ណោះ Barcelona ក៏​បាន​នាំ​យក Andreas Christensen និង Franck Kessie ក្នុង​ការ​ផ្ទេរ​ដោយ​គ្នា​តម្លៃ​ខ្លួន ក៏​ដូច​ជា​ការ​ចុះ​កុងត្រា​ថ្មី​ឡើង​វិញ​ជាមួយ Ousmane Dembele និង Sergi Roberto ផង​ដែរ។

បញ្ហា​ផ្នែក​ហិរញ្ញវត្ថុ​របស់​ក្លឹប ធ្វើ​ឲ្យ​មាន​បញ្ហា​ក្នុង​ការ​នាំ​យក​កីឡាករ​ចំណូល​ថ្មី​ទាំងនោះ ដោយ​សារ​តែ​មាន​ច្បាប់​ដ៏​តឹងរឹង​របស់ La Liga ពាក់ព័ន្ធ​នឹង​ចំណូល​ចំណាយ​លើ​កីឡាករ។

ឥឡូវ​នេះ Lewandowski, Raphinha, Christensen, Kessie, Dembele និង Roberto អាច​ចូល​លេង​បាន​ពេល​ប៉ះ​ជា​មួយ​នឹង Rayo Vallecano ប៉ុន្តែ Kounde មិន​ទាន់​អាច​លេង​បាន​ទេ។ ខ្សែ​ការពារ​រូប​នេះ​អាច​លេង​បាន ក្នុង​ករណី Barcelona ដកប្រាក់​ខែ​របស់​គាត់​ឲ្យ​សមមូល​ទៅ​នឹង​ច្បាប់​កំណត់។

យ៉ាង​ណា​មិញ​ពេល​នេះ Barcelona នៅ​តែ​ដំណើរការ​ព្យាយាម​បញ្ជូន Memphis Depay ទៅកាន់ Juventus ខណៈ​ដែល Pierre-Emerick Aubameyang ក៏​ត្រូវ​បាន​ផ្សារភ្ជាប់​ជាមួយ​នឹង​ការ​ចាកចេញ​ផងដែរ។ Frenkie de Jong ក៏​អាច​នឹង​ចាកចេញ​ដែរ ដោយ​ក្លឹប​បិសាចក្រហម Manchester United និង Chelsea នៅតែ​ព្យាយាម​ចង់​បាន​គាត់។

ប្រភព៖ 90 Min