Carlo Ancelotti នឹង​បញ្ចប់​អាជីព​ជា​គ្រូ​បង្វឹក បន្ទាប់​ពី​អស់​ភារកិច្ច​ជាមួយ Real Madrid

នៅ​ថ្ងៃ​នេះ​លោក Carlo Ancelotti បាន​បង្ហើប​ថា គាត់​នឹង​ចូលនិវត្តន៍​ពី​ការ​កាន់​តំណែង​ជា​គ្រូ​បង្វឹក នៅ​ពេល​ដែល​គាត់​ឈប់​ដឹកនាំ​នៅ​ក្លឹប Real Madrid ខណៈ​ដែល​បច្ចុប្បន្ន​គ្រូ​បង្វឹក​រូប​នេះ​មាន​វ័យ 63 ឆ្នាំ​ទៅ​ហើយ។

ដោយ​ឡែក​លោក Carlo Ancelotti ត្រូវ​បាន​គេ​ចាត់​ទុក​ថា គឺ​ជា​គ្រូ​បង្វឹក​ដ៏អស្ចារ្យ​បំផុត នៅ​ក្នុង​ពិភព​បាល់ទាត់ ដោយ​គាត់​ធ្លាប់​ទទួល​បាន​បទពិសោធន៍​យ៉ាង​ជោគជ័យ គិត​ចាប់​តាំង​ពី​ចាប់ផ្តើម​អាជីព​មួយ​នេះ​ក្នុង​ឆ្នាំ 1992។

គាត់ គឺ​ជា​គ្រូ​បង្វឹក​តែ​ម្នាក់​គត់​ដែល​ឈ្នះពាន​គ្រប់​លីគ​កំពូល​ទាំង 5 របស់​ទ្វីបអឺរ៉ុប ដោយ​បាន​លើកពាន​ជាមួយ AC Milan, Chelsea, PSG, Real Madri និង Bayern Munich ហើយ​គាត់​ក៏​ជា​គ្រូបង្វឹក​ជោគជ័យ​បំផុត​ក្នុង​ប្រវត្តិសាស្ត្រ​នៃ​ក្របខ័ណ្ឌ UEFA Champions League ផង​ដែរ ដោយ​ដឹកនាំ​ក្រុម​ឲ្យ​ឈ្នះពាន​បាន​សរុប​ចំនួន 4 ដង។

ដោយ​មិន​មាន​អ្វី​នៅ​សល់ ដើម្បី​ជា​ការ​ចង់​សម្រេច​បាន​ពេល​នេះ​លោក Carlo Ancelotti បាន​បញ្ជាក់​ថា គាត់​មាន​គម្រោង​បញ្ចប់​អាជីព​ជា​គ្រូ​បង្វឹក នៅ​ពេល​ដែល​គាត់​ចាកចេញ​ពី Real Madrid។ កុងត្រា​បច្ចុប្បន្ន​របស់ Ancelotti នឹង​ផុត​កំណត់​នៅ​ឆ្នាំ 2024 ហើយ​គាត់​កំពុង​សប្បាយ​ចិត្ត​ជា​មួយ​នឹង​ជីវិត​នៅ Santiago Bernabeu។ គាត់​មិន​ទាន់​មាន​គម្រោង​ចាកចេញ​នៅ​អំឡុង​ពេល​នេះ​ឡើយ ដែល​អាច​ជា​ពេល​ដែល​ផុត​កុងត្រា​នៅ​រយៈពេល 2 ឆ្នាំ​ទៀត។

ប្រភព: 90 Min