Newcastle និង Southampton កំពុង​ប្រជែង​គ្នា ដណ្ដើម​យក​ខ្សែ​ប្រយុទ្ធ Goncalo Ramos

របាយការណ៍​ចុងក្រោយ​មួយ​បាន​ឲ្យ​ដឹង​ថា ក្លឹប Southampton កំពុង​ស្ថិត​ក្នុង​ស្ថានភាព​តាម​ប្រជែង​គ្នា​ជា​មួយ​ក្លឹប Newcastle ដើម្បី​ចុះ​ហត្ថលេខា​លើ​ខ្សែប្រយុទ្ធ​ដែល​កំពុង​ឡើង​ជើង Goncalo Ramos របស់​ក្លឹប Benfica (របាយការណ៍​ពី The Sun)។

ដោយ​ឡែក​បច្ចុប្បន្ន Southampton កំពុង​ត្រូវ​ការ​ខ្សែប្រយុទ្ធ​ថ្មី​ម្នាក់​ជា​ចាំ​បាច់ បន្ទាប់​ពី​ការ​ចាកចេញ​របស់ Armando Broja ដែល​ផុត​លក្ខខណ្ឌ​ខ្ចីជើង និង​បាន​ត្រឡប់​ទៅ Chelsea វិញ​កាល​ពី​ខែ​មុន។ ដូច្នេះ​ពួក​គេ​បាន​កំណត់​គោលដៅ​លើ Goncalo Ramos ដែល​ជា​កីឡាករ​សក្កានុពល និង​អាច​លេង​តំណែង​ប្រយុទ្ធ​បាន (របាយការណ៍​ពី The Athletic)។

ប្រធាន​ក្លឹប Southampton ត្រូវ​បាន​គេរាយ​ការណ៍​ថា បាន​ពិភាក្សា​ជាមួយ​ក្លឹប Benfica លើ​ការ​ផ្ទេរ​ដែល​មាន​ទំហំ​ទឹកប្រាក់​ប្រមាណ​ជា 25 លានផោន​កាល​ពី​សប្តាហ៍មុន បន្ទាប់​ពី​ការ​ប្រកួត​ជម្រុះ​ពានរង្វាន់ The Eagles’ Champions League ជា​មួយ Midtjylland។

ប្រសិន​បើ​ក្លឹប​ទាំង​ពីរ​ឈាន​ដល់​កិច្ចព្រមព្រៀង​ជាមួយ Ramos នោះ​គាត់​នឹង​ក្លាយ​ជា​ការ​ចុះ​ហត្ថលេខា​គួរ​ឲ្យ​កត់​សម្គាល់​មួយ​របស់​ក្លឹប Southampton ដែល​បាន​ចំណាយ​ប្រាក់​លើស​ពី 20 លានផោន។

ទោះ​ជា​យ៉ាង​ណា​ក៏ដោយ ក្រុម​របស់​លោក Hasenhuttl នឹង​ត្រូវ​ប្រឈម​មុខ​នឹង​ការ​ប្រកួត​ប្រជែង​ដ៏​តឹងតែង​ពី​គូប្រជែង​ក្នុង​ក្របខ័ណ្ឌ Premier League ដូចគ្នា គឺ​ក្លឹប Newcastle ដែល​កំពុង​ចង់​បាន Goncalo Ramos ដែរ។ Newcastle ត្រូវ​បាន​គេ​ដឹង​ថា កំពុង​មាន​ចំណាប់​អារម្មណ៍​ខ្លាំង​ក្នុង​ការ​ចុះហត្ថលេខា​លើ​កីឡាករ​សញ្ជាតិ​ព័រទុយហ្គាល់​រូប​នេះ​ដែរ ប៉ុន្តែ​ពួកគេ​មិន​ទាន់​បាន​ដាក់​សំណើរ​ដេញ​ថ្លៃ​ជា​ផ្លូវការណ៍​នៅ​ឡើយ​ទេ។

ប្រភព: Thesun UK