Napoli ចាប់​អារម្មណ៍​ចង់​ដោះដូរ Lozano ជាមួយ Cristiano Ronaldo

ក្លឹប Napoli អាច​នឹង​បាត់បង់​ខ្សែប្រយុទ្ធ​សំខាន់​ម្នាក់​របស់​ខ្លួន​នៅ​រដូវកាល​នេះ បន្ទាប់​ពី​មាន​សេចក្ដី​​រាយការណ៍​ចុងក្រោយ​មួយ​នៅ​ក្នុង​សារព័ត៌មាន​អង់គ្លេស​កាល​ពី​ថ្ងៃព្រហស្បតិ៍​កន្លង​ទៅ​​បាន​ឲ្យ​ដឹង​ថា ក្លឹប​បិសាចក្រហម Manchester United កំពុង​ចាប់​អារម្មណ៍​នាំយក​កីឡាករ​សញ្ជាតិ​ម៉ិកស៊ិក Chucky Lozano ហើយ​ការ​ផ្ទេរ​នោះ​អាច​នឹង​ជាប់​ពាក់ព័ន្ធ​ជាមួយ Cristiano Ronaldo ផង​ដែរ។

យោងតាម​សារព័ត៌មាន Sky Sports បាន​ឲ្យ​ដឹង​ថា ក្លឹប​បិសាចក្រហម​កំពុង​ព្យាយាម​យ៉ាង​ខ្លាំង ក្នុង​ការ​ស្វែងរក​ខ្សែប្រយុទ្ធ​ដែល​មាន​សក្ដានុពល​ម្នាក់ បន្ទាប់​ពី​ការ​ចាប់ផ្តើម​ដ៏​អាម៉ាស់​ក្នុង​ការ​ប្រកួត Premier League រដូវកាល​នេះ។

នៅ​ពេល​ថ្មីៗ​នេះ​ដែរ Chucky Lozano គឺ​ជា​កីឡាករ​ម្នាក់ ក្នុង​ចំណោម​កីឡាករ​មួយ​ចំនួន​ផ្សេង​ទៀត​ដែល​ក្លឹប​បិសាចក្រហម Manchester United ចង់​បាន។ ក្លឹប Napoli អាច​លក់​ខ្សែប្រយុទ្ធ​របស់​ខ្លួន​បាន ប្រសិន​បើ​ដំណើរ​ផ្ទេរ​មាន​ទំហំទឹកប្រាក់​ប្រហែល​ជា 30.22 លានដុល្លារ។

ដោយ​ឡែក មាន​ជម្រើស​មួយ​ទៀត​រវាង Napoli និង Manchester United គឺ​ជា​ការ​ដោះដូរ​រវាង Chucky Lozano និង Cristiano Ronaldo។ កាល​ពី​ប៉ុន្មាន​ថ្ងៃ​មុន​ក្លឹប Napoli ក៏​បាន​បង្ហាញ​ចំណាប់​អារម្មណ៍​ចំពោះ Cristiano Ronaldo ផង​ដែរ។

ទន្ទឹម​នឹង​នេះ Napoli ក៏​ជា​ជម្រើស​ល្អ​មួយ​សម្រាប់​តារា​ឆ្នើម​សញ្ជាតិ​ព័រទុយហ្គាល់ Cristiano Ronaldo ដែរ ដោយ​ពួក​គេ​មាន​កៅអី​លេង UEFA Champions League និង​ជា​ក្រុម​ដែល​មាន​ឥទ្ធិពល​ខ្លាំងនៅ Serie A។

យោងតាម​របាយការណ៍​ពី Sky Sports បាន​ឲ្យ​ដឹង​ថា ប្រសិន​បើ​កិច្ច​ព្រម​ព្រៀង​ផ្ទេរ​រវាង​ក្លឹប​ទាំង​ពីរ​អាច​កើត​ឡើង​មែន​នោះ ក្លឹប​បិសាចក្រហម​ត្រូវ​ថែម​លុយ​មួយ​ចំនួន​ឲ្យ​ទៅ Napoli ព្រោះ Chucky Lozano មាន​តម្លៃ​ផ្ទេរ​ច្រើន​ជាង Cristiano Ronaldo។

ប្រភព: Marca