Real Madrid ត្រៀម​នាំ​យក Jude Bellingham មក​ជំនួស​កន្លែង​របស់ Casemiro

ក្លឹប​បិសាចក្រហម Manchester United និង​ក្លឹប​តោខៀវ Chelsea ត្រូវ​បាន​គេ​រាយការណ៍​ថា អាច​នឹង​អស់​ឱកាស​ក្នុង​ការ​ចុះ​ហត្ថលេខា​លើ​ Jude Bellingham ដែល​ជា​កីឡាករ​ដែល​ពួក​គេ​ចង់​បាន នោះ​ក៏​ព្រោះ​តែ​ក្លឹប​អធិរាជ​ស Real Madrid គ្រោង​នឹង​ទិញ​យក​ខ្សែបម្រើ​ឆ្នើម​របស់ Borussia Dortmund រូប​នេះ មក​ជំនួស​កន្លែង​របស់ Casemiro ដែល​បាន​ចាកចេញ​ទៅ​កាន់​ទឹកដី​អង់គ្លេស​កាល​ពី​ពេល​ថ្មីៗ​នេះ។

ដោយ​ឡែក​កីឡាករ​សញ្ជាតិ​​ប្រេស៊ីល Casemiro ដែល​មាន​វ័យ 30 ឆ្នាំ បាន​សម្រេច​ចិត្ត​ចាកចេញ​ទៅ​កាន់​​ទឹកដី Old Trafford ជា​មួយ​នឹង​តម្លៃ​ផ្ទេរ 60 លានផោន។ កីឡាករ​​ចាស់​វស្សា​រូប​នេះ ត្រូវ​បាន​គេ​គិត​ថា​នឹង​អាច​ដោះស្រាយ​បញ្ហា​នៅ​តំបន់​បម្រើ​កណ្ដាល​របស់​ក្រុម​លោក Erik ten Hag បាន​ផង​ដែរ។

យ៉ាង​ណា​មិញ សម្រាប់​ខ្សែ​បម្រើ​វ័យ 19 ឆ្នាំ Jude Bellingham ធ្លាប់​ទទួល​បាន​ការ​ចាប់​អារម្មណ៍​យ៉ាង​ខ្លាំង​ពី​ក្លឹប​ធំៗ​នៅ​អង់គ្លេស ដូច​ជា Chelsea, Liverpool និង Manchester United ជា​ដើម។ ប៉ុន្តែ​របាយការណ៍​ចុងក្រោយ​មួយ​បាន​ឲ្យ​ដឹង​ថា Bellingham នឹង​ធ្លាក់​ក្នុង​ដៃ​របស់ Real Madrid ព្រោះ​ពួក​គេ​ត្រូវ​ការ​កីឡាករ​ចំណូល​ថ្មី​ម្នាក់ ដើម្បី​មក​បំពេញនៅ​ចំណុច​ខ្វះ​ខាត​ដែល​ជា​កន្លែង​របស់ Casemiro។ លើស​ពី​នេះ​ទៅ​ទៀត​លោក Carlo Ancelotti មើល​​ឃើញ​ថា ​Bellingham ជា​ជម្រើស​ដ៏​ល្អ​សម្រាប់​ការ​លេង​នៅតំបន់​បម្រើជាមួយ Aurelien Tchouameni និង Eduardo Camavinga។

ដូចគ្នា​នេះ​ដែរ របាយការណ៍​ពី Marca បាន​លើក​ឡើងថា តាម​រយៈ​ការ​ចុះ​ហត្ថលេខា​លើ Casemiro នឹង​ធ្វើ​ឲ្យ​ក្លឹប​បិសាចក្រហម បោះ​បង់​ការ​ចង់​បាន Jude Bellingham ខណៈ​ដែល​ពួក​គេ​ក៏​ពិបាក​ក្នុង​ការ​លួង​ចិត្ត​ខ្សែបម្រើ​រូប​នេះ​ផ្ទេរ​មក Old Trafford ដែរ។

ប្រភព: Thesun UK