Connect with us

បាល់ទាត់អន្តរជាតិ

Manchester City ត្រៀម​តម្លើង​ប្រាក់​ខែ​ឲ្យ Bernardo Silva ដើម្បី​កុំ​ឲ្យ​គាត់​ចាកចេញ​ទៅ Barcelona

Published

on

របាយការណ៍​ក្ដៅៗ​ចុងក្រោយ​មួយ​បាន​ឲ្យ​ដឹង​ថា ក្លឹប​មេឃខៀវ Manchester City គ្រោង​នឹង​បន្ត​កុងត្រា​ថ្មី​ដែល​មាន​ជា​ការ​តម្លើង​ប្រាក់​ពលកម្ម​បន្ថែម​ទៀត ​ជា​មួយ​ខ្សែបម្រើ​សញ្ជាតិ​ព័រទុយហ្គាល់ Bernardo Silva ដើម្បី​បញ្ចុះ​បញ្ចូល​គាត់​ឲ្យ​ស្នាក់​នៅ​ក្លឹប​បន្ត​ទៀត និង​រារាំង​គាត់​មិន​ឲ្យ​ចាកចេញ​ទៅ​ចូល​រួម​ជា​មួយ Barcelona។

ជាមួយ​គ្នា​នេះ​ដែរ លោក Pep Guardiola ដែល​ជា​គ្រូបង្វឹក​របស់ Manchester City ក៏​បាន​បញ្ជាក់​កាល​ពី​ដើម​ខែ​នេះ​ថា ក្លឹប​មិន​មាន​គម្រោង​លក់ ​Bernardo Silva នោះ​ទេ បើ​ទោះ​បី​ជា​មាន​​ការ​ចាប់​អារម្មណ៍​ពី Barcelona ក៏​ដោយ។

Bernardo Silva ត្រូវ​បាន​ផ្សារភ្ជាប់​ជាមួយ​នឹង​ការ​ផ្ទេរ​ក្នុង​ទំហំ​ទឹកប្រាក់ 80 លានអឺរ៉ូ​ពី Manchester City ទៅ​កាន់​ក្លឹប​អ្នក​មានបុណ្យ Barcelona។ ជាមួយ​គ្នា​នេះ​ដែរ Silva ក៏​បង្ហាញ​ពី​ចំណាប់​អារម្មណ៍​របស់​គាត់​ក្នុង​ការ​ចាកចេញ​ពី​ក្លឹប​ម្ចាស់​ជើងឯក Premier League ដើម្បី​ស្វែងរក​ការ​ប្រកួត​ប្រជែង​ថ្មី និង​អាច​មាន​ឱកាស​ឈ្នះពាន​ច្រើន​ជាង​នេះ។

ទោះ​ជា​យ៉ាង​ណា​ក្ដី​យោងតាម​របាយការណ៍​ពី Daily Star បាន​ឲ្យ​ដឹង​ថា ក្លឹប Manchester City បាន​ត្រៀម​ខ្លួន​រួច​ជាស្រេច ក្នុង​ការ​បើក​កិច្ចពិភាក្សា​លើ​ការ​បន្ត​កុងត្រា​ថ្មី​ជាមួយ​អ្នក​តំណាង​របស់ Silva ដោយ​មាន​ការ​កែប្រែ​តម្លើង​ប្រាក់​ខែ​ដ៏ច្រើន សម្រាប់​កីឡាករ​រូប​នេះ។

បច្ចុប្បន្ន​កុងត្រា​របស់ Bernardo Silva ​មាន​សុពលភាព​រហូត​ដល់​ឆ្នាំ 2025 ហើយ​កុងត្រា​ថ្មី​ដែល Manchester City ត្រៀម​បន្ថែម​ទៀត​នោះ គឺ​នឹង​បន្ត​រហូត​ដល់​ឆ្នាំ 2027។ សម្រាប់​ប្រាក់​ពលកម្ម​បច្ចុប្បន្ន​របស់ Silva គឺ​មាន​ចំនួន 150,000 ផោន​ក្នុង​មួយសប្តាហ៍។

ប្រភព: Football-espana

Trending

© រក្សា​សិទ្ធិ​គ្រប់​យ៉ាង​ដោយ​ X-SPORT ឆ្នាំ​ ២០២២