បិសាច​ក្រហម Manchester United ស្គាល់​ជ័យ​ជំនះ​ជា​លើក​ដំបូង ក្រោយ​យក​ឈ្នះ Liverpool 2-1 (មានវីដេអូ)

នៅ​ទីបំផុត​ក្លឹប​បិសាចក្រហម​បាន​រំកិល​ចេញ​ពី​បាតតារាង Premier League ហើយ បន្ទាប់​ពី​​ធ្វើ​ការ​ប្រកួត​យក​ឈ្នះ​ក្រុម​ហង្សក្រហម Liverpool កាល​ពី​រំលង​អាធ្រាត​យប់​មិញ​នេះ ជាមួយ​នឹង​លទ្ធផល 2 ទល់​នឹង 1។

ជ័យ​ជំនះ​នេះ​ដែរ វា​ជា​លើក​ដំបូង​របស់​ក្លឹប​បិសាចក្រហម Manchester United នៅ​ក្របខណ្ឌ Premier League រដូវកាល​នេះ បន្ទាប់​ពី​បរាជ័យ​ពីរ​ប្រកួត​ដំបូង​ជា​មួយ Brighton និង Brentford ខណៈ​ដែល​ក្លឹប​ហង្សក្រហម Liverpool មិន​ទាន់​ស្គាល់​រស​ជាតិ​ឈ្នះ​ឡើយ​នៅ​រដូវកាល​នេះ ដោយ​ពួក​គេ​ស្មើ​ពីរ​ប្រកួត​ដំបូង​ជា​មួយ Fulham និង Crystal Palace ហើយ​ចុងក្រោយ​ចាញ់ Manchester United។

ដោយ​ឡែក​ទម្រង់​លេង​របស់​ក្លឹប​បិសាចក្រហម​កាល​ពី​យប់​មិញ​នេះ ហាក់​ដូច​ជា​មាន​ភាព​​ប្រែប្រួល​ខ្លាំង ខុស​ពី​ប្រកួត​មុនៗ ដោយ​ពួក​គេ​ព្យាយាម​តាម​ដេញ​បាល់​ពី​គូ​ប្រកួត និង​ព្យាយាម​វាយ​បក​ប្រកប​ដោយ​គុណភាព។ ដូចគ្នា​នេះ​ដែរ គ្រូ​បង្វឹក​លោក Erik ten Hag បាន​ផ្លាស់​ប្ដូរ​ខ្សែការពារ​កណ្ដាល​ឲ្យ Varane ចាប់​ដៃ​គូ​គ្នា​ជា​មួយ Lisandro Martinez និង​ឲ្យ Harry Maguire អង្គុយ​កៅអី​បម្រុង។ សម្រាប់​តំបន់​ប្រយុទ្ធ​ខាងលើ​មាន Elanga, Rashford និង Jadon Sancho ហើយ Cristiano Ronaldo អង្គុយ​កៅអី​បម្រុង។

គ្រាប់​បាល់​ពីរ​គ្រាប់​របស់​ក្លឹប​បិសាចក្រហម Manchester United គឺ​ជា​ការ​ស៊ុត​បញ្ចូល​ទីពី Jadon Sancho នៅ​នាទីទី 16 និង Marcus Rashford នៅ​នាទីទី 53។ ដោយ​ឡែក​មួយ​គ្រាប់​តាម​ពី​ក្រោយ​របស់ Liverpool គឺ​ជា​ការ​ស៊ុត​បញ្ចូល​ទីពី Mohamed Salah នៅ​នាទីទី 81។

ទស្សនា​វីដេអូ​ហាយឡាយ​ការ​ប្រកួត​ខាង​ក្រោម

អត្ថបទ​ដោយ: ក្រុមការងារ x-sportskh